Read Angguruk Yali BILANGAN 24 Bible Online

BILANGAN 24 - Angguruk Yali bible

BILANGAN 24

¹NINIKNI Allahn Israel inap arimano An nunuk fam hi enepmisi peruk ane ino Bileam indimu oluk tegma huluwap enepmin ano eleg ano ulug enehangge feneyen hiyag nitmisi ulug tam libag hag toho nin libag fug. La fug angge wereg lit lek fil yet harukmen

²Israel inap ununggul unuk man-man luhaloho o wirigmu weregma yet isibag. Yet isarukmen Allah ahime fanowon ubam atfagma

³ele uruk latfahon tu, ”An Beor amloho fulu roho yet haruk nahun Bileam inowen nele tu uruk lahi.

⁴Allahn ele hiyag nutukmu hol halug uruk lahi. An nebe yinggig lit weregman At mondabi ineyonen an nil fenggen naptukmu fulu roho yet haruk lahi.

⁵Yakuben ondohowonen ondohowon Israel inap aruma inibam fano anggolo wirigmu yet haruk lahi.

⁶E wali ineyon ik ayegma tonggo ke NIKNI Allah inggarehen yatil larukon hag toho inibam pumbuk wereg.

⁷Osit anggolo pilabik waharuk lit it enengginang oweyap turukmu yahongge arimano fano wilip atuk. O pumbuk winon onowe suwon Agag ino apma regma ap suwon Israel inap fer enesuhon raja ino unuk palimu weregma kinang hili yat toho seneg laruhu.

⁸Allahn o Mesiren hondog eneplug wilip atisiyon inowen wam sapi olokon farema werehonen ine roho turuk hag toho ine roho it inibil atuk. Ap seliyon unusuruk lit unuwag lilibug heheg eneminggin enentog oho fala roho hik isahu.

⁹Israel inap aruma mene olokon singa nohoruk hag toho weregma ap san elel enebuhu? Ap san hit Israel hinap Allah unuk fam hi henebuhu halug fano ane ubam aruhu. Ap san huluwap henebuhu halug inggareg siyag aruhu,” ibag.

¹⁰Ari ibagma Balak inowen olok hibareg wate ulug ayeg kilit matuk lit Bileam fam, ”Ap seliyon aruma huluwap enepmihin ulug wol haptikik angge famen haren hinggik hinahanam Allah unuk fam hi enebehen.

¹¹Ketiya hibam lag! Anden onggo fanowon og huruhuk irikik angge famen HIKNI Allahn hilamisi fug pehekma hilamihin fug,” ibag.

¹²Ibagma Bileamen te, ”Hotsi nambeg waharuson unubam anden hiyag isaruk lit,

¹³’Ili ruruk angge emas perak men hinikniyen ibam forohowon obog toho og netep halug oho NIKNI Allah ele embeseruk lit an nindimuwen wenggel haruk lahiyon hikit toho alem misig oho tuk fug teg lahi,’ irikik fug ano? NIKNI Allahn ele hiyag nutuk ane hikit toho eneg uk teg lahi,” ibag.

¹⁴Ari ibareg Bileamen nin Balak hiyag utuk lit, ”Ketiya an nori enembeg lamin. Lik oho lit Israel inap aruman fobik hat humalikisi unubam turuk lamuhup ane hiyag hitmin,” ibareg

¹⁵Bileamen te, ”An Beor amloho fulu roho yet haruk nahun Bileam inowen nele tu uruk lahi.

¹⁶Allahn ele hiyag nutukmu hol halug uruk lahi. At mondabi palimuwon inowen peruk ane an noluk. An nebe yinggig lit weregman At mondabi ineyonen an nil fenggen naptukmu fulu roho yet haruk lahi.

¹⁷Ap eke uwan inam am fugmu anden yatma yet haruk lahi. Anden yet haruk lahiyon ino Israel inap enesehelimuwen wap poholma laharuk hag toho ap suwon raja lahaku. At inowen Moab inap unuwal halog heheg Set umalikisi ununggul uwag arap heheg unusuruk laruhu.

¹⁸Edom inap at men seli roho werehon arimano enengginang at ngi aruhu. Umalikisi Israel inap arimano inine anggolo welamuhup.

¹⁹At ino Yakuben ondohowonen ondohowon wereg lit ap seliyon nonoluk welamuhuk ulug wilip atukon arimano oho siyahap enebuhu,” ibag.

²⁰Ari ibareg Bileam inowen Amalek inap unubam teko lahu ane fulu roho yet hibareg ele uruk latfahon tu, ”O pumbuk kinangma werehon obog toho apma regma Amalek inap eneg palimu wereg angge famen fobik mondabi eleg amuhup,” ibareg

²¹Kain umalikisi unubam teko lahu ane yet hibareg ele uruk latfahon tu, ”Hit hinibam suwe ei tom ayegma wirihon hag toho hinine roho wituk latikip angge famen

²²Asyur inaben hit Keni hinap hininggik hele waroho og henebuhupmu mondabi siyag amuhup,” ibag.

²³Bileamen nin ele uruk lit, ”Allahn alem ihiyon arimano turuk laruhu halug ap sa oluk welam teg?

²⁴O Siprus inap arimano kou fam ik suwon yenggelehon pali ke wamuhupteg Asyur inap men Heber inap men waroho unusuhup. Unusuhupmu it ininggareg oho siyag amuhup,” ibag.

²⁵Ari ibareg Bileam ino in atug ibam larukmu Balak oho libag.