Read Angguruk Yali BILANGAN 25 Bible Online

BILANGAN 25 - Angguruk Yali bible

BILANGAN 25

¹Israel inap o Sitim wereg lit Moab hiyap men yaying turuk ane ak tibag.

²Ak tibagma Moab hiyap arimanowen Israel inap hiyag isaruk lit, ”Nit nunumba fahet wam waroho osoko narukmu hir oho nit men nulen maniyek,” ulug wol enepfagma Israel inap arimano it men naruk lit unumba Baal-Peor tu Allah hag toho wereg ulug wel turuk angge iren oho wel turuk latfag. Ari roho turukmu yet isibareg NINIKNI Allahn Israel inap fahet olok hibareg

⁴Musa fam ele uruk lit, ”Israel inap onowesi obog toho sen eneplug mo uwan ubuk uk fugmu An niline unusimihinteg e fam ililoho song enepmihin. An nolok anggolowen nindimu inahan turukmu Israel inap obog toho elehap enebuhuk tohon!” ulug hiyag itfag.

⁵Hiyag itfagma Musa inowen unggum haloho emberuk inap hiyag isaruk lit, ”Hit wal tanehen honotsi Moab inap unumba Baal-Peor wel turuk latuson arimano unusiyek!” ulug hiyag isibag.

⁶Hiyag isibareg Musa men Israel inap obog toho men o sabo fanowon olohotman inindi siyahen uba yatuk lit yet harukmen Israel ahun ekeyen Midian hiyap misig hondoholug ori wereg ambeg libag.

⁷Larukmu yet hibareg itano hun Harun umbusag, Eleazar amloho Allah amingmingangge Pinehas ino ori sehelimu heriyeg latfag ambehen in atug fit wibareg

⁸Israel ahun ino ibam kulug ap inowet Midian hiyabet fit fam enehum kangguloho unusibagma war atfag. War atfagma ouk alem suwonen Israel inap unusuruk ane eleg atfag.

⁹Ouk alem suwonen unusibahon enebe teng obog sehelet obog 24.000 war atfag.

¹⁰War atfagma NINIKNI Allahn Musa fam ele uruk lit,

¹¹”An namingmingangge Pinehas, hun Harun umbusag, Eleazar amloho inowen An nolok hihi ane hikit toho aren oho olok hehekteg ap ino ware fesehek. Ware fesehek ane ino fahet An nindimu inahan turukmu Israel inap obog toho unusimin pihi ane imbisihi.

¹²Ari fahet haren Pinehas hiyag itmihinon tu: NINIKNI Allahn hat hubam sali emberuk lit, ’Hat An napma wereg lit fano welaruhun.

¹³Haren te An Nikni Allah unuk siyag aruhu rohon ulug holok toho tehen ane ariyen Israel inaben siyag ane turuson elehap tehen. Ari fahet hat men haren enderuhunonen endebuhubon arimano men An namingmingangge imam weregman eneg welamuhup,’ ulug ele tem toho ehek imihin,” ulug Musa hiyag itfag.

¹⁴Ap Pinehas inowen watfahon unuk Zimri welatfag. Zimri hun Saluwen endetfahon ino ununggul unuk Simeon inap minggiroho winon onowe roho welatfag.

¹⁵Midian hiyap Zimri men ambiyeg ware fisibahon unuk Kozbi welatfag. Kozbi ikni Zur ino Midian inap minggiroho winon onowe roho welatfag.

¹⁶Ari tibagma NINIKNI Allahn Musa fam ele uruk lit,

¹⁷”Midian inap arimanowen hit hinindi kahal heneptusama enerek Kozbi men yaying turuk lit unumba Baal-Peor oho wel turuk latikip. Wel turuk latikip ane ino fahet hit henebe anggolo ouk alem suwonen hunusirisi sambil Kozbi ino Pinehasen ware feserisi. Ari roho Midian inaben hit siyahap heneptusa ane wirim toho ketiya hiren hebeloho Midian inap arimano siyahap enebuhup,” ulug hiyag itfag.