Read Angguruk Yali BILANGAN 27 Bible Online

BILANGAN 27 - Angguruk Yali bible

BILANGAN 27

¹Yusuf inowen Manasye indag tibag. Manasye inowen Makhir indag tibag. Makhir inowen Gilead indag tibag. Gilead inowen Hefer indag tibag. Hefer inowen Zelafehad indag tibag. Zelafehad inowen aholani fuwaben Mahla, Noa, Hogla, Milka, Tirza men indag enepfag.

²Hiyap fuwaben itano Israel inap obog toho men onowesi men o sabo fanowon olohotma palu roho weregma watfareg Musa men Allah amingmingangge imam Eleazar men unubam enele uruk lit,

³”Nit o lekma larukmu ninikni ap umalik indag ta fug angge war atisi. Korah ori menen NINIKNI Allah ele ying turukmu nit ninikni it inibil am fug angge we inggarehen siyag ane tirisiyon fahet war atisi.

⁴War atisimu amloho eke wereg elehen ninikni unuk eleg aruhu rohon ulug ninikni ori enengginang iraham nir oho kinang eke hiyag nisahup,” ulug heng enepfag.

⁵Heng enepfag ane ino Musa inowen NINIKNI Allah hiyag itfagma

⁶NINIKNI Allahn Musa fam ele uruk lit,

⁷”Zelafehad aholani aruman fano ehesama inikni ori sehelimu iren oho kinang seneg lamuhuben inikni angginang og isahun.

⁸Haren Israel inap obog toho hiyag isamihinon tu: Ap eke ap umalik indag ta fug angge war atuk halug at angginang lin isarukon aholani og isaruk lamuhup.

⁹Hilani malik wereg eleg halug kinang lin isarukon at ori og isaruk lamuhup.

¹⁰Ori wereg eleg halug kinang ino at ikni ori og isaruk lamuhup.

¹¹Ikni ori wereg eleg halug ap unggul unukon at war atukon horogma werehon kinang ino og isaruk lamuhup. An HINIKNI Allahn kong toho emberuk lit hiyag hirihi ane ari Israel inaben senegman eneg welamuhup,” ulug hiyag itfag.

¹² NINIKNI Allahn Musa fam ele uruk lit, ”Tom Abarim fam lahakunteg kinang humalikisi Israel inap og isahuk ambeg ino yet hahun.

¹³Yet halug itano hot Harun ino war atisi hag toho har oho war aruhunteg humbasi men mangno aruhun.

¹⁴Zin lekma wereg lit hit pirenen An nele embeseruk latikip. Hunumalikisi Israel inaben ik elerukmu Meriba An nubam enele siyag toho uruk latusama hiren it onolohotman Allah ebe usa fulu rehon ino ine wereg ulug An wel naptikip fug,” ibag. Ibahon ari Zin lekma o pumbuk Kades horogma ik elerukmu Meriba teko libag.

¹⁵Ari ibagma Musa inowen sembahyang uruk lit,

¹⁶”NIKNI Allah, Haren mun angge man angge onoluk welamuhup ulug sat kilap eneptuk lahenon, ap tuwen fobik numalikisi aruma fer enesug laruhu ulug hiyag nitmihin.

¹⁷At inowen tog aptuk ane milal eneptuk laruhu. Hat humalikisi wam domba inikni elehon hag toho welamuhup tohon umbusuhun fug,” ulug hiyag itfag.

¹⁸Hiyag itfagma NINIKNI Allahn Musa fam, ”Hun Nun amloho Yosua ino wol timihin. At ino indi anggat teg. Watmisimu namingmingangge imam Eleazar men Israel inap obog toho men onolohotma unduhuk femihinteg Yosua aru nubalmangge welaruhu ulug ap obog toho hiyag isamihin. Hiyag isamihinteg hinggik unggulmu embemihinmu

²⁰hine hat hubam werehon minggiroho at ubam atuk halug Israel inap obog tohowen at ele holtuk lamuhup.

²¹Alem eke hag eke hag weregma Yosua ino Allahn peruk ane hiyag nitmisi ulug imam Eleazar ambeg larukmu at inowen enehangge Urim ino hik isaruk lit Yosua hiyag utuk laruhu. Aren hiyag utuk ane hikit toho eneg Yosua umalikisi Israel inap menen turuk lamuhuben hiyag isamihin,” ulug hiyag itfag.

²²NINIKNI Allahn hiyag itfag ane hikit toho Musa inowen Yosua ino imam Eleazar men Israel inap obog toho men onolohotma unduhuk fibareg

²³hun aru nubalmangge welaruhu ulug inggik unggulmu emberuk lit Allahn ibag ane obog toho hiyag itfag.