Read Angguruk Yali BILANGAN 28 Bible Online

BILANGAN 28 - Angguruk Yali bible

BILANGAN 28

¹NINIKNI Allahn Musa fam ele uruk lit,

²”Haren Israel inap hiyag isamihinon tu: Hiren likiya hupmu An nubahet tu men ari men emberuk lamuhup uruk lahi ane pisan isa fug angge naruk angge NINIKNI Allahn tohon ulug nungge-nungge emberuk lit Anden amben fano pukag ulug indok yaltuk lamuhup.

³Likiya hupmu subangge roho An HINIKNI Allah fahet wam domba mo misig atukon siyag teg elehon piren waroho indokma yale feruk lamuhup.

⁴Wam misig likiya yale feruk lit misig mo ubuk ik ohoma yale feruk lamuhup.

⁵Ari roho likiya hupmu An nibamen wam misig-misig yale feruk lit roti anggen fano roho lilibug tohon sum toron men e zaitun ahaluwe fanowon men mangno roho tag turukon oho yale felug hele anggur ahaluwe kubag misig hilili feruk lamuhup. Ari obog toho tam hiniknisiyen tom Sinai alman turusa ane hikit toho hiren likiya hupmu An fahet emberuk lit hubu lahaptuk lamuhupmu Anden amben somug halug nindi yuwag aruhu.

⁸Likiya wam misig waroho hubu lahaptuk lamuhup hag toho hupmu wam pirenehon ino men roti anggen men mangno roho indok yale feruk lit hele anggur ahaluwe hilili feruk lamuhupmu Anden amben fano peruk laruhuk.

⁹O sabir angge nin sebe roho wam domba mo misig atukon siyag teg elehon piren men roti anggen fano roho lilibug tohon sum toron piren men e zaitun ahaluwe fanowon men mangno roho tag turukon oho yale felug hele anggur ahaluwe hilili feruk lamuhup.

¹¹Pikalem keron inam atuk sambil An HINIKNI Allah fahet wam sapi kabiniyon piren men, wam domba yuhambukon misig men, wam domba mo misig atukon siyag teg elehon sabiren men waroho indokma yaltuk lamuhup.

¹²Wam sapi piren itano yaltuk lit enebe wal taneg fahet nin sebe roho roti anggen fano roho lilibug tohon sum toron hinahan men e zaitun ahaluwe fanowon men mangno roho tag turukon yale feruk lamuhup. Wam domba yuhambukon ino yaltuk lit nin sebe roho roti anggen sum toron piren men e zaitun ahaluwe men mangno roho tag turukon yale feruk lamuhup.

¹³Wam domba umalik sabiren itano yaltuk lit enebe wal taneg fahet nin sebe roho roti anggen sum toron misig men e zaitun ahaluwe men mangno roho tag turukon yale feruk lamuhup. Ari roho hubu lahaptuk lamuhup halug An HINIKNI Allahn amben somug halug nindi yuwag aruhu.

¹⁴Wam sapi misig fahet hele anggur ahaluwe kubag piren hilili feruk lamuhup. Wam domba yuhambukon misig fahet anggur ahaluwe kubag misigmen misig minggiroho hilili feruk lamuhup. Wam domba umalik misig fahet hele anggur ahaluwe kubag misig hilili feruk lamuhup. Ari roho pikalem keron inam atuk sambil subangge roho hubu lahaptuk lamuhup.

¹⁵Pikalem keron inam atuk sambil ino wam likiya hupmu emberukon men nin sebe roho wam kambing yuhambukon siyag ane niren turuk latukukon Allahn ambolmayap tukag ulug emberukon men indokma yaltuk lamuhup.

¹⁶ Pikalem misihon fam hup nunggul hurik atuk sambil An HINIKNI Allah fahet wam Paskah esetuk lamuhup.

¹⁷O nuwal fimahon sakan turuk halug roti suwap turuk angge embeselug wirako narukmen eneg o sabirenam aruhu.

¹⁸Roti ino narukon ak turuk lamuhup sambil ino yabuk wa fug angge An nubam sembahyang ul ulug mangno atuk lamuhup.

¹⁹Roti ino naruk li An HINIKNI Allah fahet wam sapi kabiniyon piren men, wam domba yuhambukon misig men, wam domba mo misig atukon sabiren men indokma yaltuk lamuhup. Wam siyag teg elehon eneg waroho hubu lahaptuk lamuhup.

²⁰Wam sapi piren itano yaltuk lit enebe wal taneg fahet nin sebe roho roti anggen fano roho lilibug tohon sum toron hinahan men e zaitun ahaluwe fanowon men mangno roho tag turukon yale feruk lamuhup. Wam domba yuhambukon ino yaltuk lit nin sebe roho roti anggen sum toron piren men e zaitun ahaluwe men mangno roho tag turukon yale feruk lamuhup.

²¹Wam domba umalik sabiren itano yaltuk lit enebe wal taneg fahet nin sebe roho roti anggen sum toron misig yale feruk lamuhup.

²²Wam arimano obog toho yaltuk lit wam likiya subangge roho emberukon men nin sebe roho wam kambing yuhambukon siyag ane niren turuk latukukon Allahn ambolmayap tukag ulug emberukon men indokma yale felug hele anggur ahaluwe hilili feruk lamuhup. Ari roho likiya hupmu An nolohotma hubu lahaptukmen eneg o sabirenam aruhu. Hiren NINIKNI Allah fahet naruk angge ulug emberuk lamuhup angge arimano obog toho indokma yaltuk lamuhupmu Anden amben somug halug nindi yuwag aruhu.

²⁵O sabirenam atuk sambil yabuk wa fug angge An nubam sembahyang ul ulug mangno atuk lamuhup.

²⁶Anden usayap tirikik sambil sabirenam welamuhupteg hiren An HINIKNI Allah wel nabul ulug mangno atuk lit roti anggen tamon paltuk lamuhubon An nubahet emberuk lamuhup. O ino sambil yabuk wa fug angge welamuhup.

²⁷Wereg lit wam sapi kabiniyon piren men, wam domba yuhambukon misig men, wam domba mo misig atukon sabiren men waroho indokma yaltuk lamuhup. Yaltuk lamuhup halug An HINIKNI Allahn amben somug halug nindi yuwag aruhu.

²⁸Wam sapi piren itano yaltuk lit enebe wal taneg fahet nin sebe roho roti anggen fano roho lilibug tohon sum toron hinahan men e zaitun ahaluwe fanowon men mangno roho tag turukon yale feruk lamuhup. Wam domba yuhambukon ino yaltuk lit nin sebe roho roti anggen sum toron piren men e zaitun ahaluwe men mangno roho tag turukon yale feruk lamuhup.

²⁹Wam domba umalik sabiren itano yaltuk lit enebe wal taneg fahet nin sebe roho roti anggen sum toron misig yale feruk lamuhup.

³⁰Wam arimano obog toho yaltuk lit wamet roti anggenet likiya hupmu subangge roho emberukon men nin sebe roho wam kambing yuhambukon siyag ane niren turuk latukukon Allahn ambolmayap tukag ulug emberukon men indokma yale felug hele anggur ahaluwe hilili feruk lamuhup. Wam siyag teg elehon eneg waroho hubu lahaptuk lamuhup.