Read Angguruk Yali BILANGAN 29 Bible Online

BILANGAN 29 - Angguruk Yali bible

BILANGAN 29

¹Pikalem sabiron inam atuk sambil hiren yabuk wa fug angge An HINIKNI Allah wel nabul ulug mangno atuk lamuhup. O ino sambil pinggong ele hum toho watuk lamuhup.

²Watuk lit wam sapi kabiniyon misig men, wam domba yuhambukon misig men, wam domba mo misig atukon siyag teg elehon sabiren men waroho indokma yaltuk lamuhup. Yaltuk lamuhup halug An HINIKNI Allahn amben somug halug nindi yuwag aruhu.

³Wam sapi ino yaltuk lit nin sebe roho roti anggen fano roho lilibug tohon sum toron hinahan men e zaitun ahaluwe fanowon men mangno roho tag turukon yale feruk lamuhup. Wam domba yuhambukon ino yaltuk lit nin sebe roho roti anggen sum toron piren men e zaitun ahaluwe men mangno roho tag turukon yale feruk lamuhup.

⁴Wam domba umalik sabiren itano yaltuk lit enebe wal taneg fahet nin sebe roho roti anggen sum toron misig yale feruk lamuhup.

⁵Wam arimano obog toho yaltuk lit wamet roti anggenet pikalem keron inam atuk sambil emberukon men likiya hupmu subangge roho emberukon men nin sebe roho wam kambing yuhambukon siyag ane niren turuk latukukon Allahn ambolmayap tukag ulug emberukon men indokma yale felug Anden hiyag hisarikik ane hikit toho hele anggur ahaluwe hilili feruk lamuhup. Ari roho hubu lahaptuk lamuhup halug Anden amben fano peruk laruhuk.

⁷Pikalem sabiron fam hup numen atuk sambil ino hiniyabuk wa fug angge An HINIKNI Allah wel nabul ulug mangno atuk lamuhup. O ino sambil hininggareg apmayap taruk lit hiyangangge welamuhup.

⁸Wereg lit wam sapi kabiniyon misig men, wam domba yuhambukon misig men, wam domba mo misig atukon sabiren men indokma yaltuk lamuhup. Wam siyag teg elehon eneg waroho hubu lahaptuk lamuhup. Hubu lahaptuk lamuhup halug An HINIKNI Allahn amben somug halug nindi yuwag aruhu.

⁹Wam sapi ino yaltuk lit nin sebe roho roti anggen fano roho lilibug tohon sum toron hinahan men e zaitun ahaluwe fanowon men mangno roho tag turukon yale feruk lamuhup. Wam domba yuhambukon ino yaltuk lit nin sebe roho roti anggen sum toron piren men e zaitun ahaluwe men mangno roho tag turukon yale feruk lamuhup.

¹⁰Wam domba umalik sabiren itano yaltuk lit enebe wal taneg fahet nin sebe roho roti anggen sum toron misig yale feruk lamuhup.

¹¹Wam arimano obog toho yaltuk lit wam kambing yuhambukon siyag ane niren turuk latukukon Allahn ambolmayap tukag ulug emberukon men wamet roti anggenet likiya hupmu subangge roho emberukon men indokma yale felug hele anggur ahaluwe hilili feruk lamuhup. Nin sebe roho wam kambing siyag ane Israel inaben turukon fahet o ino sambil eneg emberukon eke waroho hubu lahaptuk lamuhup.

¹²Pikalem sabiron fam hup nuwal fimahen atuk sambil hiren yabuk wibuk fug angge wereg lit henebe mangno atuk lamuhup. O ino sambilen tulug An HINIKNI Allah wel naptuk lit weregman eneg o sabirenam aruhu.

¹³Hup misihon fam wam sapi kabiniyon nuwalen men, wam domba yuhambukon piren men, wam domba mo misig atukon nunggul huriken men indokma yaltuk lamuhup. Wam siyag teg elehon eneg waroho hubu lahaptuk lamuhup. Hubu lahaptuk lamuhup halug An HINIKNI Allahn amben somug halug nindi yuwag aruhu.

¹⁴Wam sapi nuwalen itano yaltuk lit enebe wal taneg fahet nin sebe roho roti anggen fano roho lilibug tohon sum toron hinahan men e zaitun ahaluwe fanowon men mangno roho tag turukon yale feruk lamuhup. Wam domba yuhambukon piren itano yaltuk lit enebe wal taneg fahet nin sebe roho roti anggen sum toron piren men e zaitun ahaluwe men mangno roho tag turukon yale feruk lamuhup.

¹⁵Wam domba umalik nunggul huriken itano yaltuk lit enebe wal taneg fahet nin sebe roho roti anggen sum toron misig yale feruk lamuhup.

¹⁶Wam arimano obog toho yaltuk lit nin sebe roho wam kambing yuhambukon siyag ane niren turuk latukukon Allahn ambolmayap tukag ulug emberukon men wamet roti anggenet likiya hupmu subangge roho emberukon men indokma yale felug hele anggur ahaluwe hilili feruk lamuhup.

¹⁷Hup pirenehon fam wam sapi kabiniyon nisanggowen men, wam domba yuhambukon piren men, wam domba mo misig atukon nunggul huriken men indokma yaltuk lamuhup. Wam siyag teg elehon eneg waroho hubu lahaptuk lamuhup.

¹⁸Wam arimano obog toho yaltuk lit hup misihon fam turuk lamuhup ane hikit toho roti anggen oho yale felug anggur ahaluwe hilili feruk lamuhup.

¹⁹Nin sebe roho wamet roti anggenet anggur ahaluweyet likiya hupmu subangge roho emberukon men wam kambing yuhambukon siyag ane niren turuk latukukon Allahn ambolmayap tukag ulug emberukon men indokma yale feruk lamuhup.

²⁰Hup hinahanehon fam wam sapi kabiniyon nanggoloben indokma yaltuk lit wam winonet roti anggenet hup misihon fam indokma yaltuk lamuhup ane hikit toho yale felug anggur ahaluwe hilili feruk lamuhup.

²³Hup uhanehon fam wam sapi kabiniyon numen indokma yaltuk lit wam winonet roti anggenet hup misihon fam indokma yaltuk lamuhup ane hikit toho yale felug anggur ahaluwe hilili feruk lamuhup.

²⁶Hup fuwabon fam wam sapi kabiniyon sohowen indokma yaltuk lit wam winonet roti anggenet hup misihon fam indokma yaltuk lamuhup ane hikit toho yale felug anggur ahaluwe hilili feruk lamuhup.

²⁹Hup falfalikon fam wam sapi kabiniyon likinen indokma yaltuk lit wam winonet roti anggenet hup misihon fam indokma yaltuk lamuhup ane hikit toho yale felug anggur ahaluwe hilili feruk lamuhup.

³²Hup sabiron fam wam sapi kabiniyon sabiren indokma yaltuk lit wam winonet roti anggenet hup misihon fam indokma yaltuk lamuhup ane hikit toho yale felug anggur ahaluwe hilili feruk lamuhup.

³⁵Hup likinon fam hiren yabuk wa fug angge wereg lit An wel nabul ulug henebe mangno atuk lamuhup.

³⁶Mangno atuk lit wam sapi kabiniyon misig men, wam domba yuhambukon misig men, wam domba mo misig atukon siyag teg elehon sabiren men waroho indokma yaltuk lamuhup. Yaltuk lamuhup halug An HINIKNI Allahn amben somug halug nindi yuwag aruhu.

³⁷Wam arimano obog toho yaltuk lit hup misihon fam turuk lamuhup ane hikit toho roti anggen oho yale felug anggur ahaluwe hilili feruk lamuhup.

³⁸Nin sebe roho wamet roti anggenet anggur ahaluweyet likiya hupmu subangge roho emberukon men wam kambing yuhambukon siyag ane niren turuk latukukon Allahn ambolmayap tukag ulug emberukon men indokma yale feruk lamuhup.

³⁹Ari roho An HINIKNI Allah wel nabul ulug mangno atuk lamuhup sambil arimano wam waroho hubu lahaptuk lit wam winon An nolohotman naruk lit roti anggen indokma yaltuk lit anggur ahaluwe hilili feruk lamuhup. Nin sebe roho hiren Allah fahet umbuhuk ulug sali emberuk lamuhubon men ninindiyen At fahet umbuhuk peruk lamuhubon men An nubahet imbik waharuk lamuhup,” ulug NINIKNI Allahn Musa hiyag itfag.

⁴⁰Hiyag itfag ane ino Musa inowen Israel inap hiyag isibag.