Read Angguruk Yali BILANGAN 3 Bible Online

BILANGAN 3 - Angguruk Yali bible

BILANGAN 3

¹NINIKNI Allahn tom Sinai famen Musa fam ele uruk latfag li owe Harun umalikisi ununuk tuma ul:

²Amloho tamon Nadab, fobikon Abihu men Eleazar men Itamar men welatfag.

³Harun umalikisi uhan itano inikni men Allah olohotman hubu lahaptuk lamuhup ulug e zaitun ahaluwe ununggulmu are reberuk lit imam lahap enepfag.

⁴Lahap enepfagma weregman Nadab men Abihu menen o Sinai lekman NINIKNI Allah ele sobir isalug indok anggen amuwon At olohotma walug waharukmen unumalikisi indag ta fug angge war atfag. War atfagma inikni Harun inowen milal eneptukmu umalikisi Eleazar men Itamar men imam wereg lit Allah olohotma hubu lahaptuk latfag.

⁵NINIKNI Allahn Musa fam ele uruk lit,

⁶”Ununggul unuk Lewi inap arimano wol enepmihinteg hiyag isamihinon tu: Hiren imam Harun let turuk lamuhuben iraham welamuhup.

⁷At iraham wereg lit o sabo fanowon Allah men Ambi Atuk Ibam ino foroho lamuhup. Foroho lit imam inap arimanowen o ino owahalman Allah umalikisi obog toho fahet hubu lahaptuk ane hiren let toho yabuk turuk lamuhup.

⁸Hiren Israel inap obog toho ununuk fam o sabo fanowon undama foroho angge arimano haltuk lit mun ane man ane o sabo fanowon iraham ke yabuk turuk ane seneg lamuhup ulug hiyag isamihin.

⁹Ari ulug hiyag isaruk lit Israel inap obog toho sehelimuwen Lewi inap arimano eneg Harun umalikisi let eneptuk lamuhuben ininggikmu embemihin.

¹⁰Harun umalikisi menen iniyabuk fano roho turuk lamuhuben komo enepmihin. We it eneg imam wereg lit An nolohotma waharuk lamuhup angge famen ap winon An horogma waharukon arimano unusuhup,” ulug hiyag itfag.

¹¹Hiyag itfareg NINIKNI Allahn Musa fam nin ele uruk lit,

¹²”Anden Mesir inap unumalikisi wandabon obog toho unusuruk lit Israel hinap hunumalikisi wandabon men henembohom tam indag atukon men An ngi enesug laruhuken onoluk welamuhup ulug embeserikik. Embeserikik angge re Israel hinap hunumalikisi monggiyon arimano obog toho An nanggengge wereg angge famen it unubalmangge An nanggengge welamuhuben hit Israel hinap sehelimuwen Lewi inap arimano mumal eneptikik ulug An HINIKNI Allahn nele uruk lahi,” ibag.

¹³

¹⁴NINIKNI Allahn o Sinai lekman Musa fam ele uruk lit,

¹⁵”Ununggul unuk Lewi inap onowesi wal taneg werehon unumalikisi men enebe winag isamihin. Ap angge indag atukon sali pikalem misig pali filon eneg winag isalug suwesingga fam haharoho embemihin,” ulug hiyag itfag.

¹⁶Hiyag itfag ane ari hikit toho Musa inowen enebe winag isaruk lit suwesingga fam haharoho imbibag. Haharoho imbibahon tu:

¹⁷Lewi umalikisi Gerson men Kehat men Merari men welatfag.

¹⁸Gerson umalikisi Libni men Simei men welatfag.

¹⁹Kehat umalikisi Amram, Yizhar, Hebron, Uziel men welatfag.

²⁰Merari umalikisi Mahli men Musi men welatfag. It Lewi inowen ondohowon arimano Lewi inap onowesi roho wereg latfag.

²¹Gerson inowen ondohowonen ondohowon Libni inap men Simei inap men welatfag.

²²Gerson inap ap angge indag atukon sali pikalem misig pali filon enebe teng-teng angge 7.500 welatfag.

²³Gerson inap arimano yali fil o sabo fanowon ambolma o sabo wiroho welatfag.

²⁴It onowe hun Lael amloho Elyasaf welatfag.

²⁵Gerson inap arimanowen o sabo fanowon asum men, wam domba ahap ungga altap toho hondo rurukon men, sok kurukon latuk asum men,

²⁶o ino men hubu lahaptuk ambeg men walinggoho elehet huk toho waruk asum men, sok ino latuk asum men, hele o sabo fanowon wituk lit ililtukon men, iniyabuk turuk lit wan turuk angge obog toho foroho lit o sabo fanowon ino wiri fil halog tibil laruk latfag.

²⁷Hun Kehat inowen ondohowonen ondohowon Amram inap, Yizhar inap, Hebron inap, Uziel inap men welatfag.

²⁸Kehat inap ap angge indag atukon sali pikalem misig pali filon o sabo fanowon owahalman yabuk turukon enebe teng-teng angge 8.600 welatfag.

²⁹Kehat inap arimano ik ambut fil o sabo fanowon iraham o sabo wiroho welatfag.

³⁰It onowe hun Uziel amloho Elisafan welatfag.

³¹Kehat inap arimanowen e seng toho wirihon peti Wene Numen haharehon elma kilabeg angge men, e tuwalehon roti emberuk ambeg men, iral men, hubu lahaptuk ambeg piren men, Allah wel turuk lit wan turuk angge men, Mondabi Fanoma suwaleg ambeg sok latuk asum men, iniyabuk turuk lit wan turuk angge obog toho foroho lit o sabo fanowon ino wiri fil halog tibil laruk latfag.

³²Lewi inap onowe suwon Harun amloho Eleazar inowen o sabo fanowon foroho inap obog toho sen enesug latfag.

³³Hun Merari inowen ondohowonen ondohowon Mahli inap men Musi inap men welatfag.

³⁴Merari inap arimano ap angge indag atukon sali pikalem misig pali filon enebe teng-teng angge 6.200 welatfag.

³⁵Merari inap arimano ik eleruk fil o sabo fanowon iraham o sabo wiroho welatfag. It onowe Abihail amloho Zuriel welatfag.

³⁶Merari inap arimanowen o sabo fanowon ubahat e anggeyon arimano men, tik ahandip turukon men, e sahi uwag men, uwag hutuk teberuk angge men, o sabo fanowon undama foroho angge men, elehet o sabo fanowon walinggoho hutuk teberukon uwag men hutuk teberuk angge men, elehet ino waruk lit hele ililtukon men, posiyemanggen kinangma yatukon men, iniyabuk turuk lit wan turuk angge obog toho foroho lit o sabo fanowon ino wiri fil halog tibil laruk latfag.

³⁷

³⁸Musa men Harun umalikisi men yali fil o sabo fanowon alukema o sabo wiroho welatfag. It arimanowen Israel inap obog toho unubahet o sabo fanowon undaman yabuk turuk latfag. It arimano eneg An nolohotma waharuk lamuhupmu ap winon An nibam horogma waharukon obog toho war atuk lamuhup ulug NINIKNI Allahn hiyag isibag.

³⁹NINIKNI Allahn hiyag isibag ane hikit toho Musa men Harun menen Lewi inap onowesi wal taneg werehon winag isibahon ap angge indag atukon sali pikalem misig pali filon obog toho enebe teng-teng angge 22.000 welatfag.

⁴⁰Welatfagma NINIKNI Allahn Musa fam ele uruk lit, ”Israel inap unumalikisi wandabon indag atukon sali pikalem misig pali filon enebe obog toho winag isamihinteg ununuk suwesingga fam haharoho embemihin.

⁴¹It enebe haharoho embemihinon men Israel inap enembohom tam indag atukon men An HINIKNI Allah nanggengge wereg. It unubalmangge An nanggengge welamuhup ulug Lewi inabet enembohomet mumal tarikik. Mumal tarikik ane hikit toho An niyabuk wituk lamuhuben hiyag isamihin,” ulug hiyag itfag.

⁴²Hiyag itfag ane ari hikit toho Musa inowen Israel inap unumalikisi wandabon obog toho winag isarukmen

⁴³indag atukon sali pikalem misig pali filon enebe teng-teng angge 22.273 welatfahon ununuk suwesingga fam haharoho imbibag.

⁴⁴Imbibagma NINIKNI Allahn Musa fam ele uruk lit,

⁴⁵”Israel inap unumalikisi wandabon men enembohom tam indag atukon men unubalmangge An nanggengge welamuhup ulug Lewi inabet enembohomet An ninggikmu embemihin. An HINIKNI Allahn nele ari uruk lahi.

⁴⁶Haren Israel inap unumalikisi wandabon arima men Lewi inap enebe men wirim teg ano ulug winag esehenma enebe teng numen 273 alindik ahason arimano An nanggengge wereg lit nolohotman yabuk wituk lalep angge famen selma welamuhubon fahet onggo embemihin.

⁴⁷Onggo arimano o sabo fanowon fam paltuk ane hikit toho it enebe misig-misig fahet uang perak fuwaben An Allah nubahet embemihin.

⁴⁸Allah fahet embemin ulug Harun umalikisi men og isamihin,” ulug hiyag itfag.

⁴⁹Hiyag itfag ane ari hikit toho Israel inap arimanowen unumalikisi wandabon Musan winag isarukmen alindik atfahon fahet onggo 1.365 uang perak Musa og itfagma Musan Harun umalikisi men og isibag.