Read Angguruk Yali BILANGAN 30 Bible Online

BILANGAN 30 - Angguruk Yali bible

BILANGAN 30

¹Musa inowen Israel inap ununggul unuk onowesi unubam ele uruk lit, ”NINIKNI Allahn komo nenebehekon tu:

²Ap ekeyen nungge-nungge tuhuk ulug NINIKNI Allah fam sali emberuk halug oho, mun ane man ane tuhuk fuhen nele tem toho ihi uruk halug oho un ane irikik ulug ele uwag oko wa fug angge tem toho urukon hikit toho eneg turuk laruhu.

³Hiyap eke tuhummu ikni ibam wereg lit nungge-nungge tuhuken nele tem toho ihi ulug NINIKNI Allah fam sali emberukon fahet

⁴ikniyen hol halug sali ehenon ari uwag oko wamihin uruk eleg halug sali emberuk ane ino eleg aruhu fug.

⁵Ikniyen hol halug o ino sambil eneg ahaloho fam, ’Sali ehenon ari uwag oko wamihin,’ uruk halug ahalohowen sali ino elehap tuhu. Ikniyen hiyag erehek ane hikit toho tehek ulug NINIKNI Allahn hiyap ino alem ubam emberuk laruhu fug.

⁶Hiyap ap hilarukon uwanma indimuwen fuki roho wenggel halug sali emberuk ano, fuki roho wenggel ha fug angge sali emberuk ano.

⁷Fobik hiyap ino ap ekeyen hilahureg sali emberukon fahet hol halug uhe ubam haren sali emberikinon uwag oko wamihin uhu fug halug sali ino eleg aruhu fug.

⁸Ahunen hol hahu sambil eneg uhe ubam haren sali emberikinon uwag oko wamihin uhu halug uheyen sali ino elehap tuhu. Ahunen hiyag erehek ane hikit toho tehek ulug NINIKNI Allahn hiyap ino alem ubam emberuk laruhu fug.

⁹Hiyap yuwohon men hiyap ahunen embeserukon menen sali emberuk ane eleg aruhu fug.

¹⁰Hiyap ahun werehonen nungge-nungge tuhuken nele tem toho ihi ulug NINIKNI Allah fam sali emberukon fahet

¹¹ahunen hol halug sali ehenon ari uwag oko wamihin uruk eleg halug sali emberuk ane ino eleg aruhu fug.

¹²Ahunen hol hahu sambil eneg uhe ubam haren sali embehenon uwag oko wamihin uhu halug uheyen sali ino elehap tuhu. Ahunen hiyag erehek ane hikit toho tehek ulug NINIKNI Allahn hiyap ino alem ubam emberuk laruhu fug.

¹³Hiyap ahun werehonen nungge-nungge tuhuk ulug sali emberukon obog toho men mun ane man ane tuhuk fuhen nele tem toho uruk ane obog toho men ahunen ineyap tuk teg, ahunen oho elehap tuk teg.

¹⁴Hiyap ekeyen sali emberukon fahet ahunen hol haruk sambil ino uhe ubam sali ehenon ari uwag oko wamihin uruk eleg halug sali ino ine atuk.

¹⁵Uheyen sali emberukon fahet ahunen hol hahu angge famen fobik eneg haren sali emberikinon uwag oko hilamihin uruk laruhu halug alem uhe ubam am fug angge at ubam aruhu,” ibag.

¹⁶Ibag ane ari hiyap tuhummu ikni ibam werehon men hiyap ahun werehon menen sali emberuk ane fahet NINIKNI Allahn Musa hiyag itfag. Hiyag itfag ane ino hikit toho Musan Israel inap onowesi hiyag isibag.