Read Angguruk Yali BILANGAN 31 Bible Online

BILANGAN 31 - Angguruk Yali bible

BILANGAN 31

²”Midian inaben hit Israel hinap siyahap heneptusa ane fahet haren ayeg waroho unusuhun. Unusuhunteg hat war aruhunteg humbasi men mangno aruhun,” ulug hiyag itfag.

³Hiyag itfagma Musa inowen Israel inap hiyag isaruk lit, ”NINIKNI Allahn Midian inap ayeg waroho unusuhuk peruk ane hikit toho it men tog abik lahuben wep toho welamek!

⁴Hit hununggul unuk wal-wal welahebon, hit wal tanehen honori tog abukon enebe teng-teng angge 1.000 en enebuhup,” ulug hiyag isibag.

⁵Hiyag isibag ane roho Israel inaben en enepfahon arimano obog toho enebe teng-teng angge 12.000 welatfag.

⁶Musa inowen ap arimano tog abik lahup ulug mon eneptuk lit Allah amingmingangge imam Pinehas hun Eleazar amloho ino it men lalihip ulug hiyag itfagma Pinehas inowen o sabo fanowon fam foroho angge minggiroho winon men pinggong ele hum toho uruk angge men wibareg Israel inap sehen senehon men libag.

⁷Libareg NINIKNI Allahn Musa hiyag itfag ane hikit toho Midian inap men tog aptuk lit ap angge obog toho unusibag.

⁸Unusuruk lit Midian inap onowesi suwon fuwaben ununuk Ewi, Rekem, Zur, Hur, Reba men, hun Beor amloho Bileam men oho unusibag.

⁹Unusibareg Israel inap arimanowen Midian inap enembohom men enenggengge obog toho men huhulangge hilalug unuhesi malik men ininggik hele waroho og eneplug watfag.

¹⁰Waharuk lit Midian inap inibam pumbuk men o sabo wiroho welatfag ambeg arimano men harep pisako olunap tibisibag.

¹¹Olunap tibisibareg Israel inap sehen senehon arimanowen abet wamet huhulangge hilibahon arimano obog toho walug

¹²Musa men imam Eleazar men Israel inap winon obog toho ik Yordan paloho o Yerikho fil la fug angge o Moab lekma o sabo wiroho weregma watfag.

¹³Waharukmu Musa men Eleazar men Israel inap onowesi men o sabo wiroho welatfag ambehen wilip atug it onolohotma libag.

¹⁴Libareg yet enesug lit Musa inowen olok hibareg ap sehen senehon palu wal toho milal eneptuk inap unubam ele uruk lit,

¹⁵”Nungge fahet hiyap aruma unusuk fug angge onoluk angge og eneplug wahep?

¹⁶Hiyap aruman hun Bileam inowen hiyag isarisi ane hikit toho nit Israel ninap ninindi kahal neneptusama NINIKNI Allah embeselug it unumba Baal-Peor wel turuk latukuk. Wel turukuk ane ari fahet nit Allah umalikisi welaheyon ouk alem suwon nunubam atisi.

¹⁷Ari fahet hiyap ap men ambi atuson men unumalikisi ap angge men obog toho unusiyek!

¹⁸Hilani malik ap men ambi atusa fuhon eneg unusuk fug angge hilalihip.

¹⁹Hit san ap eke ware feserikibon men ap warehon sen harikibon men o sabo wiroho welahe ambeg selma weregman eneg o sabirenam aruhu. Siyag angge hunubam tag tehon ino eleg amag ulug o hinahaneg angge men o sabir angge men puhunap tahup. Ari hag toho hilani malik og enesug wahebon aruma oho puhunap enebuhup.

²⁰Ari turuk lit henesum wan teg lahebon oho, wam ahap men, wam kambing oruk men, e men fam wirig angge arimano obog toho fene ik siyag angge elehap turuk ahik ketne isahup,” ulug hiyag isibag.

²¹Hiyag isibagma imam Eleazar inowen ap togman suhuloho watfahon arimano unubam ele uruk lit, ”NINIKNI Allahn Musa feneyen komo neneptisiyon tu holeg lamek:

²²Huhulangge hilaruk angge ili rurukon emas men perak men ine angge tembaga, besi, timah men

²³indoken naruk eleg angge arimano obog toho puhun amag ulug indokma iringguhupteg ik siyag angge elehap turuk ahik ketne isahup. Indoken naruk angge obog toho ikma yuhultuk lamuhup.

²⁴O sabir angge henesum wan teg lahebon ik umatuk lamuhup halug siyag angge hunubam tag tehon ino eleg aruhumu nin suhuloho o sabo wirigmu kik waharuk lamuhup,” ulug hiyag isibag.

²⁵Hiyag isibagma NINIKNI Allahn Musa fam ele uruk lit,

²⁶”Israel inaben abet wamet huhulangge hilaruson arimano obog toho hat men imam Eleazar men Israel inap ununggul unuk wal taneg werehon onowesi menen winag isalihip!

²⁷Winag isalihibon arimano obog toho pul ke minggiroho winon ap tog abik laruson og isaruk lit winon Israel inap pok atuson og isamihin.

²⁸Mun angge man angge ap tog abik laruson og isamihin angge ap men wam sapi keledai domba kambing men palu teng-teng angge 500 minggiri felug palu misig NINIKNI Allahn tohon ulug amingmingangge imam Eleazar og itmihin.

²⁹

³⁰Mun angge man angge Israel inap pok atuson og isamihin angge abet wamet palu teng piren minggiri felug palu misig Lewi inap o sabo fanowon fam NINIKNI Allah iyabuk turukon og isamihin,” ulug hiyag itfag.

³¹NINIKNI Allahn Musa hiyag itfag ane ino hikit toho Musa men imam Eleazar menen

³²mun angge man angge Midian inaben tohon Israel inaben huhulangge hilibahon winag isibag. Winag isibahon tu: wam kambing domba teng-teng angge 675.000 men,

³³wam sapi teng-teng angge 72.000 men,

³⁴wam keledai teng-teng angge 61.000 men,

³⁵hilani malik ap men ambi atfag fuhon enebe teng-teng angge 32.000 men winag isibag.

³⁶Winag isibag angge arimano pul ke minggiroho ap tog abik libahon og isibahon tu: wam kambing domba teng-teng angge 337.500 men, wam sapi teng-teng angge 36.000 men, wam keledai teng-teng angge 30.500 men, hilani malik teng-teng angge 16.000 men ap sehen senehon arimano ngi atfag. Ngi atfag angge minggiroho NINIKNI Allah og itfahon tu: wam kambing domba teng hinahaneg fimahen 675 men, wam sapi teng pirenman nubam hilag num fimahen 72 men, wam keledai teng pirenman nubam hilag sabiren 61 men, hilani malik teng misigmen nubam hilag fuwaben 32 men

³⁷

³⁸

³⁹

⁴⁰

⁴¹Musan NINIKNI Allahn hiyag itfag ane hikit toho imam Eleazar og itfag.

⁴²Ap tog abik libahon og isibag angge men Israel inap pok atfahon og isibag angge men ambi reg latfag.

⁴³

⁴⁴

⁴⁵

⁴⁶

⁴⁷Mun angge man angge abet wamet Israel inap pok atfahon og isibag angge arimano Musa inowen palu teng piren minggiri felug NINIKNI Allahn hiyag itfag ane hikit toho palu misig Lewi inap o sabo fanowon fam yabuk turukon og isibag.

⁴⁸Og isibagma Israel inap sehen senehon milal eneptuk inap arimano Musa ambeg watfareg

⁴⁹hiyag utuk lit, ”Nit hat hamingmingangge welaheyon tog elman suhuloho waharukukteg nunumalikisi sehen senehon arimano winag isarukmen misig oho eleg latusa fug.

⁵⁰Ari fahet nit wal tanehen Midian inap eneliliyangge emas fam wirihon huhulangge hilarukukon walug wahe. Walug wahe angge ahambol men sehene men sohomangge inggikmuwon men isanggomangge men pundul men aruma obog toho alem angginon nunubam aruhu rohon ulug NINIKNI Allah fahet emberuk lahe,” ulug hiyag isibareg

⁵¹emas fam wirig angge arimano obog toho Musa men imam Eleazar men og isibag.

⁵²Ap sehen senehon milal eneptuk inaben og isibag angge arimano obog toho anggin wirim tibahon 200 kilogram teg latfag.

⁵³Unumalikisi sehen senehon arimanowen huhulangge hilibag angge wal taneg umbat tibag.

⁵⁴Ari tibagma emas fam wirig angge ap sehen senehon milal eneptuk inaben Musa men Eleazar men og isibahon arimano NINIKNI Allahn yet haruk lit umalikisi Israel inap fahet wenggel haruk laruhu ulug Musa men Eleazar menen o sabo fanowon fam imbik libag.