Read Angguruk Yali BILANGAN 32 Bible Online

BILANGAN 32 - Angguruk Yali bible

BILANGAN 32

¹Ununggul unuk Ruben inap men Gad inap menen enembohom anggolo endetuk latfag. Endetuk lit yet harukmen kinang Yaezer men Gilead men wam endetuk ambeg fano anggolo regma yet hibareg

²Musa men Allah amingmingangge imam Eleazar men Israel inap onowesi men weregma libareg Musa hiyag utuk lit,

³”Kinang o pumbuk Atarot, Dibon, Yaezer, Nimra, Hesbon, Eleale, Sebam, Nebo, Beon men walinggoho werehon

⁴NINIKNI Allahn nit umalikisi welaheyon ilmig nisarisi ambeg aruma wam endetuk ambeg fano anggolo reg. Nit nenembohom anggolo werehen

⁵haren hindi nisaruk lit kinang ari hiyag nisahun. Kinang ik Yordan fuma fil hiyag nisahun fug,” ulug hiyag itfag.

⁶Hiyag itfagma Musa inowen Gad inap men Ruben inap men hiyag isaruk lit, ”Hiren te nonori ik Yordan paloho tog elma larukmu nit tuma fano welamuhuk peruk lahep ano?

⁷Hit tuma welamuhup halug Israel inap winon inindi nin aruhumu iren oho ik Yordan fuma fil kinang Kanaan NINIKNI Allahn og hisahuk ibahon fam welamuhuk fug peruk lamuhup.

⁸Ari hag toho nit o Kades-Barnea wereg lit Anden hit hiniknisi o Kanaan kinang aluwarik lalihip ulug mon eneptikikmu

⁹hiniknisi ik Eskol tonggoma lalug kinang ino yet hil larusareg suhuloho waharuk lit kinang ino fahet onori inindi angginap toho hiyag isarusama kinang NINIKNI Allahn og hisahuk ibahon fam lahuk fug perusa.

¹⁰Lahuk fug perusa ane ino fahet NINIKNI Allahn olok hibareg sali emberuk lit,

¹¹’Israel inap o Mesiren wilip atug waharuson aruman An nubam inindi wirik toho wenggel haruk elehen it indag atukon sali mo ilig am wirig am turukmu likin fimahen atuson famen pali filon kinang Anden Abraham, Ishak, Yakub men og hisahuk ulug sali imbiyahon fam kuhup fug.

¹²We o Kenas ahun Yefune amloho Kaleb men, Nun amloho Yosua menen An HINIKNI Allah nubam inindi wirik toho wenggel haruken kinang ino fam kuhup,’ irisi.

¹³Ari irisireg NINIKNI Allahn nit Israel ninap fahet olok haruk lit nirim ulug nunumbaharisimu nit lekma mase ril larukmen eneg mo teng misigmen nubam hilag nuwalen 40 atisimu hiniknisi NINIKNI Allah ele ying turuson arimano obog toho war atusa.

¹⁴Ketiya hiniknisi unubalmangge hit in atuk lahep. Hit ap siyag ane til laruk latfahon famen ondoko larikibon, hiren NINIKNI Allah ele ying turuk lahep ane ariyen At Israel inap fahet olok haruk ane su atuk.

¹⁵Hiren NINIKNI Allah henembol yig utuk lamuhup halug Aren Israel ninap amusun toho lekma welamuhup ulug mondabi nunumbahaku. Hiren uruk lahep ane ariyen Israel ninap obog toho siyag amuhuk,” ulug hiyag isibag.

¹⁶Hiyag isibagma Ruben inap men Gad inap men Musa iraham libareg hiyag utuk lit, ”Atamtam niren kinang tu fam wam ibam wibuhukteg o pumbuk nit nunuhesi malik men welamuhup ambeg wiroho

¹⁷elehet walinggoho oho fuhuk. Elehet walinggoho oho ambeg arimano nunuhesi malik men ap kinang tu fam werehonen elel eneptuk elehen inindi yuwag toho welamuhup. Weregma nit folo-folo sehen seneko tam amuhukmu nonori Israel inap winon men ik Yordan paloho nindig atug it men let toho tog aptukmen eneg Israel inap obog toho kinang wal taneg ngi amuhup.

¹⁸Ngi amuhup halug eneg nit ninibam suhuloho wamuhuk.

¹⁹Nit tuma ik Yordan yali fil kinang ngi amuhuk angge re ik Yordan hubula fil kinang hiyag nisahun fug,” ulug hiyag itfag.

²⁰Hiyag itfagma Musa inowen hebeloho hiyag isaruk lit, ”Hiren ehebon hikit toho turuk lamuhup halug fano. Ari fahet NINIKNI Allahn irisi ane hikit toho hit tog abuk teg lahebon obog tohowen henesehen seneko

²¹ik Yordan paloho nindig amuhupteg NINIKNI Allahn milal heneptukmu tog aptukmen eneg At men seli roho werehon obog toho yanggal enebuhureg

²²kinang obog toho Aren seneg laruhu. Seneg laruhu halug eneg NINIKNI Allah men nonori Israel inap men fahet tuk teg ane obog toho teberukuk ulug hinindi se roho tuma suhuloho wamuhupmu NINIKNI Allahn kinang tu hit hiyag hisahu.

²³Hiren ehebon hikit toho turuk lamuhup fug halug NINIKNI Allahn siyag ane turusa ulug alem siyahon hunubam umbuhu.

²⁴Ari fahet hiren atamtam wam ibam men o pumbuk hunuhesi malik men welamuhup ambeg men wibuhup. Wibuhupteg hiren ehebon hikit toho turuk lamuhup,” ulug hiyag isibag.

²⁵Hiyag isibagma Gad inap men Ruben inap menen Musa fam enele uruk lit, ”Ninikni, nit hat hamingmingangge welaheyonen haren hiyag nesehen ane hikit toho turuk lamuhuk.

²⁶Nunuhesi malik men nenembohom men o Gilead kinang tu fam welamuhup.

²⁷Weregma nit sehen seneg laheyon obog toho NINIKNI Allah olohotma ik Yordan paloho nindig amuhukteg haren ehen ane hikit toho tog aptuk lamuhuk,” ibag.

²⁸Ibagma Musa inowen imam Eleazar men Nun amloho Yosua men Israel inap ununggul unuk onowesi men unubam ele uruk lit,

²⁹”Gad inap men Ruben inap men oho hit men ambiyeg sehen seneko ik Yordan paloho nindig amuhupteg NINIKNI Allahn milal heneptukmu tog aptukmen eneg kinang obog toho hit hininggikmu aruhumu hiren kinang Gilead ik Yordan yali fil werehon aru Gad inap men Ruben inap men hiyag isahup.

³⁰Iren sehen seneko hit men ambiyeg lahup fug halug iret hiret kinang Kanaan fibir amuhup,” ulug hiyag isibag.

³¹Hiyag isibagma Gad inap men Ruben inap menen Musa fam enele uruk lit, ”Niren NINIKNI Allahn hiyag nesehekon hikit toho turuk lamuhuk.

³²Nit sehen seneko NINIKNI Allah olohotma ik Yordan paloho nindig atug o Kanaan kinangma kuhuk angge famen kinang nit yug toho welamuhuk ambeg tuma ik Yordan yali fil hiyag nisahun,” ulug hiyag itfag.

³³Hiyag itfagma Musa inowen Gad inap men Ruben inap men Yusuf amloho Manasye inowen ondohowonen ondohowon pul ke minggiroho men kinang ngi reg lamuhup ulug hiyag isibahon tu: Amori inap onowe suwon Sihon angginang men o pumbuk obog toho men, Basan inap onowe suwon Og angginang o pumbuk obog toho arimano hiyag isibag.

³⁴Hiyag isibagma Gad inap arimanowen o pumbuk Dibon, Atarot, Aroer,

³⁵Atarot-Sofan, Yaezer, Yogbeha,

³⁶Bet-Nimra, Bet-Haran men wiri feruk lit elehet walinggoho oho fibareg wam endetuk ambeg oho elehet huk toho wibag.

³⁷Ruben inaben o pumbuk Hesbon, Eleale, Kiryataim,

³⁸Nebo, Baal-Meon, Sibma men hebeloho wiri fibareg o ununuk keron suwalfag.

³⁹Manasye inowen ondohowonen ondohowon Makhir inap arimano o Gilead kinangma libareg Amori inap o Gilead welatfahon arimano yanggal enepfareg enengginang ilmig tibag.

⁴⁰Ilmig tibag ambeg ino Musa inowen hit ngi reg lamuhup ulug hiyag isibagma Makhir inap arimano yug toho welatfag.

⁴¹Manasye ahun Yair inowen o pumbuk ilmig tibahon arimano o Hawot-Yair suwalfag.

⁴²Manasye ahun eke unuk Nobah inowen o pumbuk Kenat men o pumbuk toron walinggoho werehon men ilmig tibareg inggareg unuk hikit toho o Nobah suwalfag.