Read Angguruk Yali BILANGAN 33 Bible Online

BILANGAN 33 - Angguruk Yali bible

BILANGAN 33

¹Israel inap o Mesir kinangman wilip atfareg Musa men Harun menen milal eneptukmu palu wal-wal lekma laruk lit o sabo eke witil eke halog til laruk latfag.

²Ari roho laruk lit Musa inowen NINIKNI Allahn hiyag itfag ane hikit toho o sabo wituk latfag ambeg ununuk suwesingga fam haharoho emberuk latfahon tu:

³Israel inaben wam Paskah esetfagma likiyamon pikalem tamon fam hup nuwal fimahen atfagma NINIKNI Allah inggik ineyonen ili og eneptukmu Israel inap arimano Mesir inap obog toho iniline o pumbuk Rameses inowen wilip atfag.

⁴Wilip atukmu Mesir inaben unumalikisi wandabon NINIKNI Allahn unusibahon arimano kinangma sal enepfag. Malik arimano unusuruk lit NINIKNI Allahn tu Allah hag toho wereg ulug Mesir inaben wel eneptuk latfahon arimano apmayap enepfag.

⁵Israel inap arimano o Rameses embeselug o Sukot o sabo wirik libag.

⁶Sukot embeselug lek ilan fil o Etam o sabo wirik libag.

⁷Etam embeselug suhuloho libareg o Baal-Zefon fuma fil o Pi-Hahirot libag. Libareg o Migdol fuma fil o sabo wirik libag.

⁸O Pi-Hahirot embeselug ik ahum pul keyen nindig atug o Etam lekma larukmen eneg hup hinahan atfagma o Mara o sabo wirik libag.

⁹Mara embeselug o Elim libag. Elim ino ik eleruk nisanggowen men e kurma wiramna hahon teng pirenman nubam hilag nisanggo fimahen 70 weregma o sabo wiroho welatfag.

¹⁰O Elim embeselug ik Longgop ayegma o sabo wirik libag.

¹¹Ik Longgop embeselug o Sin lekma o sabo wirik libag.

¹²Sin lekma embeselug o Dofka o sabo wirik libag.

¹³Dofka embeselug o Alus o sabo wirik libag.

¹⁴Alus embeselug o Rafidim o sabo wirik libag. O Rafidim inowen Israel inap arimano ik elehen na fug angge welatfag.

¹⁵Rafidim embeselug o Sinai lekma o sabo wirik libag.

¹⁶Sinai lekma embeselug o Kibrot-Taawa o sabo wirik libag.

¹⁷Kibrot-Taawa embeselug o Hazerot o sabo wirik libag.

¹⁸Hazerot embeselug o Ritma o sabo wirik libag.

¹⁹Ritma embeselug o Rimon-Peros o sabo wirik libag.

²⁰Rimon-Peros embeselug o Libna o sabo wirik libag.

²¹Libna embeselug o Risa o sabo wirik libag.

²²Risa embeselug o Kehelata o sabo wirik libag.

²³Kehelata embeselug o Har-Syafer o sabo wirik libag.

²⁴Har-Syafer embeselug o Harada o sabo wirik libag.

²⁵Harada embeselug o Makhelot o sabo wirik libag.

²⁶Makhelot embeselug o Tahat o sabo wirik libag.

²⁷Tahat embeselug o Tarah o sabo wirik libag.

²⁸Tarah embeselug o Mitka o sabo wirik libag.

²⁹Mitka embeselug o Hasmona o sabo wirik libag.

³⁰Hasmona embeselug o Moserot o sabo wirik libag.

³¹Moserot embeselug o Bene-Yaakan o sabo wirik libag.

³²Bene-Yaakan embeselug o Hor-Gidgad o sabo wirik libag.

³³Hor-Gidgad embeselug o Yotbata o sabo wirik libag.

³⁴Yotbata embeselug o Abrona o sabo wirik libag.

³⁵Abrona embeselug o Ezion-Geber o sabo wirik libag.

³⁶Ezion-Geber embeselug Zin lekma o pumbuk Kades o sabo wirik libag.

³⁷Kades embeselug o Edom kinang hili-hilimu tom Hor alma o sabo wirik libag.

³⁸Libagma imam Harun ino NINIKNI Allahn hiyag itfag ane hikit toho tom Hor fam lahibareg war atfag. War atfag sali ino Israel inap o Mesiren wilip atfag sambilen tulug mo ilig am wirig am turukmu teng misigmen nubam hilag nuwalen 40 atfagma pikalem fuwabon ket inam atfag. Inam atfag sali ino Harun indag atfag sali mo ilig am wirig am turukmu teng uhanen nubam hilag 123 atfagma war atfag.

³⁹

⁴⁰O itano li Kanaan inap onowe suwon o Kanaan kinangma ik ambut fil o Arad welatfahon inowen hol harukmen Israel inap waharuk urukmu hol hibag.

⁴¹Israel inap arimano tom Hor embeselug o Zalmona o sabo wirik libag.

⁴²O Zalmona embeselug o Funon o sabo wirik libag.

⁴³Funon embeselug o Obot o sabo wirik libag.

⁴⁴Obot embeselug o Moab kinangma o pumbuk Abarim halog tibag ambeg ino iraham o sabo wirik libag.

⁴⁵Abarim embeselug o Dibon-Gad o sabo wirik libag.

⁴⁶Dibon-Gad embeselug o Almon-Diblataim o sabo wirik libag.

⁴⁷Almon-Diblataim embeselug o pumbuk Nebo fuma fil tom Abarim alma o sabo wirik libag.

⁴⁸Tom Abarim embeselug ik Yordan paloho o Yerikho kinang fil uwan la fug lit Moab lekma o pumbuk Bet-Yesimot men Abel-Sitim men honggolegma o sabo wirik libag.

⁴⁹

⁵⁰Israel inap arimano ik Yordan paloho o Yerikho fil uwan la fug lit o Moab lekma weregma NINIKNI Allahn Musa fam ele uruk lit,

⁵¹”Haren Israel inap Anden iminon tu hiyag isamihin: Hit ik Yordan paloho nindig atug Kanaan kinangma kuhup halug

⁵²kinang ino fam wereg inap obog toho yanggal enebuhupteg iren tu Allah hag toho wereg ulug helep fam wirig angge men ine angge besi fam laltuk angge men obog toho halog tebelug usangge fahet punu ke hubu lahaptuk ambeg arimano olunap tubusuhup.

⁵³An HINIKNI Allahn Kanaan kinang ino og hisahukmu hiren kinang ino ilmig til lahupteg yug toho welamuhup.

⁵⁴Yug toho welamuhup ambeg hiyag isahuben Israel inap ununggul unuk wal-wal werehon unubam enehangge hik turuk lit kinang fibir isahup. Ununggul unuk enebe anggolo werehon arimano kinang suwon og isahup, enebe tor angge werehon kinang toron og isahup.

⁵⁵Hiren o Kanaan kinangma wereg inap arimano obog toho yanggal enebuhup fug halug yasi alohen ap inilanggen hak eneptuk hag toho Kanaan inaben hit hunusurukmen eneg welamuhup. Sabiyap alem fam ap enembolma unusuruk hag toho hunusurukmu asengseng haruk lamuhup.

⁵⁶Anden hiyag hisihi ane hikit toho hiren ap arimano unubam turuk lamuhup fug halug Anden it siyahap enebuhuk pihi ane hikit toho hit hunubam tuhuk ehek,’ imihin,” ulug hiyag itfag.