Read Angguruk Yali BILANGAN 35 Bible Online

BILANGAN 35 - Angguruk Yali bible

BILANGAN 35

¹Hun Musa ik Yordan ayegma o Yerikho fuma fil o Moab kinang fam weregma NINIKNI Allahn at ubam ele uruk lit,

²”Israel inaben o pumbuk ngi amuhubon minggiroho winon Lewi inap yug toho welamuhuben og isahup ulug hiyag isamihin.

⁴Enembohom foroho lamuhup ambeg fahet kinang o pumbuk walinggoho werehon og isahup. O pumbuk pulmu weregma wam foroho ambeg walinggoho werehon arimano hili yali filon, hubula filon, ik eleruk filon, ik ambut filon men wal taneg wirim turuk lit yat toho wirim til larukmen wirimangge teng-teng angge 1.000 meter aruhu.

⁶Ari roho turuk lit ap unusulug larukon ili og eneptuk ambeg falfaliken og isahup. Ap ekeyen eke inggiken we tor angge kik harukmen war aruhu halug ap ware feselug lahuwon ino nuwabuhup tohon ulug ili og eneptuk ambeg arimano eke larukmu ili waruk lamuhup.

⁷O pumbuk falfaliken itano og isaruk lit nin sebe roho og isahubon teng misigmen nubam hilag nuwal fimahen 42 men wam foroho ambehet mangno roho og isahup.

⁸O arimano og isaruk lit Israel hinap hununggul unuk wal taneg welahebon henengginang anggolo ngi amuhubonen minggiroho Lewi inap o pumbuk anggolo og isarukmu henengginang we tor angge ngi amuhubonen o pumbuk we tor angge og isahup,” ibag.

⁹Ari ibareg NINIKNI Allahn nin Musa fam ele uruk lit,

¹⁰”Israel inap hiyag isamihinon tu: Hit ik Yordan paloho nindig amuhupteg Kanaan kinangma wereg lit

¹¹ap unusulug larukon ili og eneptuk ambeg hiyako umbuhup. Ap ekeyen eke inggiken we tor angge kik harukmen war aruhu halug ap ware feselug lahuwon ino nuwabuhup tohon ulug o arimano eke larukmu ili waruk lamuhup.

¹²Ili waruk lit ap warehon ino areyen ayeg waroho wabukag ulug inggikmu umbuk fug angge weregman eneg ap o pumbuk arimanowen alem ubam werehon ino haloho umbuhup.

¹³Ari roho turuk lamuhuben ap unusulug larukon ili og eneptuk ambeg ik Yordan yali fil werehon hinahan hiyako emberuk lit ik Yordan hubula fil Kanaan kinangma werehon oho hinahan umbuhup.

¹⁵Israel ahunen ano ap o winamonen ano ap pohon ekeyen ano ap eke inggiken we tor angge kik harukmen war aruhu halug ap unusulug lahubon arimanowen ili og nabusa ulug o pumbuk umbuhubon falfaliken itano eke larukmu ili og eneptuk lamuhup angge famen

¹⁶ap inowen ine angge besi fam ano helep fam ano e fam ano ap eke pinggi waruhu halug ap ware feserisi ulug ap ino wabuhup.

¹⁹Wabukag ulug ap warehon ino are inggikmu umbuhupmu aren ap ino hiyahaku ambehen ware fusuhu.

²⁰Ap ekeyen eke nirim ulug ine roho miyal isarukmu war aruhu halug oho, siyag amag ulug nungge-nungge ubam hik turukmu war aruhu halug oho,

²¹seli roho wereg lit inggik fam watukmu war aruhu halug oho ap ware feserisi ulug ap ino wabuhup. Wabukag ulug ap warehon ino are inggikmu umbuhupmu aren ap ino hiyahaku ambehen ware fusuhu.

²²Ap ekeyen eke nirimen watmin puk fug anggeyen miyal isarukmu war aruhu halug oho, siyag amag puk fug anggeyen nungge-nungge ubam hik turukmu war aruhu halug oho,

²³helep saplangge hik turukmen ap eke waruhu halug oho

²⁴oriyen alem ubam werehon ino haloho emberuk lamuhup.

²⁵Haloho emberuk lit hun aruwen indi pikit toho watmin peruk lit warehek fug ulug ap warehon ino are inggikmu umbuhup fug. Inggikmu umbuk fug angge o pumbuk tam ili og nabusa ulug laruk ambeg ino suhuloho hondoholug lahupmu weregman eneg Allah amingmingangge imam onowe suwon war aruhu halug eneg o inowen wilip aruhu.

²⁶Imam onowe ino wereg li ap ino ili waruk lamuhup ambehen wilip aruhumu

²⁷ap warehon ino areyen hiyahakureg ware fusuhu halug unggum ubam aruhu fug.

²⁸Ap ino ili waruk ambeg weregman eneg imam onowe suwon war aruhu halug eneg ibam suhuloho waruhu.

²⁹Ari roho turuk lamuhup ulug komo henebihi ane ari hit men hiren endebuhubonen endebuhubon menen o kema-kema yug toho welamuhup ambehen hinine roho seneg lamuhup.

³⁰Ap ekeyen eke pinggi watukmu aben yet harukon arimanowen ninilen harukuk uruk lamuhup halug eneg ap ino wabuhup. Ap misihen eneg nil fam harikik uruk laruhu halug ap ino wabuhup fug.

³¹Ap ari wabuhup ulug kong toho umbuhupmu ap inowen numbahalusan uang og isamin puhu halug hiren ap ino tem toho war amag ulug uang ino hilahup fug.

³²Ap ekeyen ili og nabusa ulug o pumbuk eke lahureg imam onowe uwan war am fugmu suhuloho hibam lamihin ulug hiyag numusan uang og isamin puhu halug hilahup fug.

³³Ari roho turuk lit henengginang yug toho welamuhup ambeg siyahap turuk lamuhup fug. Mep wamburuk lit kinang siyahap tuhu angginang ino ap waruhu ahun amep fam eneg fano aruhu.

³⁴An HINIKNI Allah hit Israel hinap sehelimu welahireg hit henengginang yug toho welamuhup ambeg siyahap turuk lamuhup fug,” ulug hiyag itfag.