Read Angguruk Yali BILANGAN 36 Bible Online

BILANGAN 36 - Angguruk Yali bible

BILANGAN 36

¹Welatfareg hun Yusuf inowen endetfahon Manasye inowen indag tibahon Makhir amloho Gilead inowen ondohowonen ondohowon onowesi arimano Musa men Israel inap ununggul unuk onowesi men enembeg libareg hiyag isaruk lit,

²”NINIKNI Allahn hat ninikni hiyag hutuk lit, ’Israel inap unubam enehangge hik turuk lit kinang ngi roho welamuhup ambeg og isahun ulug hiyag hitisi. Ari hiyag hutuk lit kinang hun Zelafehad inowen lin isarisiyon ino at aholani og isahun ulug hiyag hitisi ane hikit toho nenere Zelafehad angginang ino at aholani arimano ngi atusa.

³Ngi atusama Israel inap ununggul unuk winonen hilani malik arimano hilahup halug nenereyen lin isarisi angginang ino it amuhupmu nit nenengginang tor aruhu.

⁴Mo ilig am wirig am turukmen kinang aben ayeg waroho hilarukon obog toho tam ngi reg inap hebeloho og isaruk sali unuk Yobel horog aruhumu Zelafehad aholani enengginang ino it enehunsi ngi amuhupmu nit nenengginang tor aruhu,” ulug hiyag isibag.

⁵Ari ulug hiyag isibagma Musa inowen NINIKNI Allahn hiyag itfag ane hikit toho ele uruk lit, ”Yusufen endetfahonen ondohowon arimanowen fano ehesa.

⁶Ari fahet NINIKNI Allahn Zelafehad aholani fahet komo heneptuk ane tu holeg lamok: Iren ap tu helele peruk lamuhubon fano hilaruk lamuhup angge famen ap ununggul unuk winon hilaruk lamuhup fug.

⁷Israel inap ununggul unuk wal taneg enengginang tor aruhu rohon ulug ap misihen oho umbasi enengginang Israel inap ununggul unuk winon og isaruk laruhu fug.

⁸Israel inap obog tohowen unumbasi enengginang ngi reg lamuhup ulug hilani malik kinang ngiyon arimano ininggareg ununggul unukonen eneg hilaruk lamuhup.

⁹Israel inap ununggul unuk wal tanehen unumbasi enengginang mondabi seneg lamuhuben ununggul unuk winon og isaruk lamuhup fug,” ulug hiyag isibag.

¹⁰Musa inowen NINIKNI Allahn ari hag toho irisi ulug hiyag isibag ane hikit toho hun Zelafehad aholani ununuk Mahla, Tirza, Hogla, Milka, Noa menen inikni oriyen indag enepfahon hilibag.

¹²Ari roho turuk lit Yusuf amloho Manasye inowen ondohowonen ondohowon hilibag ane ariyen it unumbasi enengginang ino Israel inap ununggul unuk winonen tohon atfag fug.

¹³NINIKNI Allahn ari hag toho turuk lamuhup ulug komo enepfag ane arimano obog toho Musa inowen Israel inap arimano ik Yordan ayegma o pumbuk Yerikho fuma fil o Moab tonggoma weregma hiyag isibag.