Read Angguruk Yali BILANGAN 4 Bible Online

BILANGAN 4 - Angguruk Yali bible

BILANGAN 4

¹NINIKNI Allahn Musa men Harun men unubam ele uruk lit,

²”Lewi amloho Kehat inowen ondohowonen ondohowon onowesi wal taneg werehon unumalikisi men enebe winag isamihin.

³Winag isaruk lit it kabiniyon o sabo fanowon forohowon indag atuk sambilen mo ilig am wirig am turukmu teng misigmen nubam hilag hinahan larukon famen tulug teng piren larukon fam winag isamihinteg suwesingga fam haharoho embemihin.

⁴Kehat inap arimanowen An men Ambi Atuk Ibam foroho angge mondabi fanowon arimano haltuk lamuhup.

⁵Israel inaben inibam o sabo wirihon halog toho walug luk ohoma Harun umalikisi men o sabo fanowon fam kulug peti elma Wene Numen haharehon kilabeg ambeg mapmu roho ulug sum tuhuloho pilabeg asum oko walug peti ino hililip toho emberuk lamuhup.

⁶Sum ino emberimu inag ahap hag angge embelug sum wiyuk anggen palehon fam tuwaloho hondo ruruk lamuhup. Hondo rebelug e paya roho walug laruk ahen piren itano peti ino fam ahandip teberuk lamuhup.

⁷Ahandip tebelug e tuwalehon roti Allah olohotma emberuk ambeg sum wiyuk anggen palehonen tuwaloho hondo rebelug kubag, kou, ikag, ik Allah olohotma hilili ferukon hinanggoho foroho anggubag men, roti arimano men emberuk lamuhup.

⁸Emberuk lamuhup angge arimano emberimu sum mut palehon tuwaloho embelug inag ahap hag angge fam hondo ruruk lamuhupteg e paya roho walug larukon e tuwalehon fam ahandip teberuk lamuhup.

⁹Ahandip tebelug iral emberuk ambehet haltuk anggeyet sum wiyuk anggen palehon fam hililip turuk lit indok ware feseruk ahik foroho anggubag oho hindali ahaluwe iral faheron hinanggoho foroho anggubag oho hililip turuk lamuhup.

¹⁰Hililip turuk lamuhup angge arimano obog toho inag ahap hag angge fam hondo rebelug paya roho walug laruk angge emberimu emberuk lamuhup.

¹¹Ari turuk lamuhupteg hubu lahaptuk ambeg fano angge emas fam wirihon ino sum wiyuk anggen palehon fam hililip toho inag ahap hag angge fam hondo rebelug e paya roho walug larukon itano ahandip teberuk lamuhup.

¹²O sabo fanowon famen Allah wel turuk lit wan turuk angge obog toho sum wiyuk anggen palehon fam hililip toho pug tebelug inag ahap hag angge hondo rebelug paya roho walug laruk angge emberimu emberuk lamuhup.

¹³Umbuhupteg ul hubu lahaptuk ambeg palimu werehon ho roho hik isahupteg hubu lahaptuk ambeg ino emberimu sum mut fam palehon hililip toho emberuk lamuhup.

¹⁴Umbuhupteg indok anggen kilaboho walug laruk angge men, fa men, ul arep men, kubag mep hinangguruk angge men, hubu lahaptuk lit wan turuk angge winon men hubu lahaptuk ambeg emberimu embelug inag ahap hag angge fam hondo ruruk lamuhupteg e paya roho walug larukon itano ahandip teberuk lamuhup.

¹⁵Ari roho Harun umalikisi menen turuk lamuhupmu o sabo fanowon fam foroho angge arimano obog toho sum fam hondo regma Kehat inap arimanowen paya roho walug lul ulug o sabo fanowon undama kuruk lamuhup. Foroho angge arimano sum fam hondo reg elegman senetep halug war alep.

¹⁶Harun amloho Eleazar inowen hindali iral faheron men, amben fano angge yaloho hubu lahaptukon men, roti anggen Allah fahet emberukon men, e zaitun ahaluwe men foroho lit o sabo fanowonet elma foroho anggeyet haltuk laruhu,” ibag.

¹⁷Ari ibareg NINIKNI Allahn nin Musa men Harun men hiyag isaruk lit,

¹⁸”Kehat inap onowesi wal taneg werehon unumalikisi men Lewi inap sehelimuwen eleg amuhup tohon ulug yet enesug lamuhup.

¹⁹Kehat inap arimano o sabo fanowon fam foroho angge Anden tohon mondabi fanowon arimano iniraham laruk lit war am nowen ulug Harun umalikisi menen hondog eneplug kuhupteg foroho angge arimano wal tanehen ha roho walug larukon hiyag isaruk lamuhup.

²⁰Kehat inap arimano Harun umalikisi enelukema o sabo fanowon undama kuruk lit elma foroho angge mondabi fanowon arimano sum fam hililip teg elegman inil misihim eneg kim halug war amuhup tohon!” ulug hiyag isibag.

²¹NINIKNI Allahn Musa fam ele uruk lit,

²²”Lewi amloho Gerson inowen ondohowonen ondohowon arimano onowesi wal taneg werehon unumalikisi men enebe winag isamihin.

²³Winag isaruk lit it kabiniyon o sabo fanowon forohowon indag atuk sambilen mo ilig am wirig am turukmu teng misigmen nubam hilag hinahan larukon famen tulug teng piren larukon fam winag isamihinteg suwesingga fam haharoho embemihin.

²⁴O sabo fanowon ino wiri fil halog tibil laruk lit Gerson inap arimanowen paya roho walug laruk lamuhubon tu:

²⁵O sabo fanowon sum hulubit faheron men, ungga saltuk asum men, inag ahap hag angge ungga altap toho hondo reberukon men, o sabo fanowon sok latuk asum men,

²⁶o sabo fanowonet hubu lahaptuk ambehet walinggoho kilaptuk asum men, sok ino latuk asum men, hele o sabo fanowon wituk lit ililtukon men, iniyabuk turuk lit wan turuk angge obog toho men paya roho walug laruk lamuhup.

²⁷Gerson inap arimanowen iniyabuk ari obog toho turuk lamuhuben Harun umalikisi menen hiyag isaruk lamuhupmu imam Itamar hun Harun amloho inowen milal eneptuk laruhu.

²⁹Lewi amloho Merari inowen ondohowonen ondohowon arimano onowesi wal taneg werehon unumalikisi men enebe winag isamihin.

³⁰Winag isaruk lit it kabiniyon o sabo fanowon forohowon indag atuk sambilen mo ilig am wirig am turukmu teng misigmen nubam hilag hinahan larukon famen tulug teng piren larukon fam winag isamihinteg suwesingga fam haharoho embemihin.

³¹O sabo fanowon ino wiri fil halog tibil laruk lit Gerson inap arimanowen paya roho walug laruk lamuhubon tu: o sabo fanowon ubahat e anggeyon arimano men, tik ahandip turukon men, e sahi uwag men, uwag hutuk teberuk angge men,

³²elehet o sabo fanowon walinggoho hutuk teberukon uwag men hutuk teberuk angge men, elehet ino waruk lit hele ililtukon men, posiyemanggen kinangma yatukon men, iniyabuk turuk lit wan turuk angge obog toho men paya roho walug laruk lamuhup. Ap wal tanehen tu men ari men ha roho walug laruk lamuhup ulug hiyag isaruk lamuhup.

³³Merari inaben yabuk ari obog toho turukmu imam Itamar Harun amloho inowen milal eneptuk laruhu,” ulug hiyag isibag.

³⁴Hiyag isibag ane ari hikit toho Musa men Harun men Israel inap onowesi menen Lewi umalikisi Kehat, Gerson, Merari menen ondohowonen ondohowon onowesi wal taneg werehon unumalikisi men winag isaruk latfag. Winag isaruk lit ap kabiniyon o sabo fanowon forohowon indag atuk sambilen mo ilig am wirig am turukmu teng misigmen nubam hilag hinahan larukon famen tulug teng piren larukon fam winag isibareg suwesingga fam haharoho imbibahon tu: [Ununggul unuk] — [Enebe winag isibahon] Kehat — 2.750 Gerson — 2.630 Merari — 3.200

⁴⁸Winag isibahon enebe obog toho teng-teng angge 8.580 welatfag.

⁴⁹NINIKNI Allahn Musa feneyen hiyag isibag ane hikit toho ap winag isibahon obog toho suwesingga fam haharoho imbibag. Haharoho emberuk lit ap wal taneg unubam Hat hiyabuk turuk lit tu men ari men ha roho walug laruk laruhun ulug hiyag isibag.