Read Angguruk Yali BILANGAN 5 Bible Online

BILANGAN 5 - Angguruk Yali bible

BILANGAN 5

¹NINIKNI Allahn Musa fam ele uruk lit,

²”Israel inap hiyag isamihinon tu: Ap angge hiyap angge hit sehelimuwon enehap salukangge rohon men mulen wiliptukon men ap wareg angge senetukon men ninibam o sabo wiroho welahe ambehen wilip atihip ulug hiyag esemok. Nit ninibam sehelimu Ninikni Allah wereg ambeg aru it siyag angge unubam werehonen siyahap tuhup tohon!” ulug hiyag itfag.

⁴Hiyag itfag ane ari hikit toho Israel inap arimanowen ap siyag angge unubam tag tehon wilip atihip ulug hiyag isibagma o sabo wiroho welatfag ambehen wilip atfag.

⁵ NINIKNI Allahn Musa fam ele uruk lit,

⁶”Israel inap hiyag isamihinon tu: Ap angge hiyap angge ekeyen NINIKNI Allah ambol yig utuk lit aben angge hirag taruk halug

⁷fobik ap hiyap inowen nambiken tirikik uhureg aren hirag tarukon hikit toho ngi ahun hebeloho og utuk lit nin sebe roho hirag tarukon palu fuwaben tebelug fuwabon ino og uruhu.

⁸Ngi ahun war atukmu are at horog toho werehon eleg halug aben angge hilarikikon hebeloho og etle peruk angge ino NINIKNI Allah ngi reg laruhu ulug imbik waharuk laruhumu imam naruk laruhu. Ap inowen siyag ane tirisiyon eleg amag ulug imamen wam domba uwaliyon amep Allah olohotma hilili feruk ambohom oho imam ino naruk laruhu.

⁹Israel inaben Allah fahet imbik waharuk angge minggiroho imam inap og isaruk lamuhubon arimano oho imam arimanowen naruk lamuhup,” ibag.

¹¹NINIKNI Allahn Musa fam ele uruk lit,

¹²”Israel inap hiyag isahunon tu: Uheyen ahun luwaltuk lit ap eke men ambi atuken siyag angge ubam tag teg laruhu angge famen ap misihen oho yet halug hiyag utuk elehen ahun apeleg toho welaruhu.

¹⁴Welaruhureg fobik nuhe ap eke men ambi atisi ano ulug indimu olok toho wenggel haruk laruhu halug uhe ino imam wereg ambeg hondoholug laruk laruhu. Hiyap eke ap eke men ambi atuk elegman ahun inowen nuheyen an luwal naptuk ano ulug wenggel haruk laruhu halug oho uhe ino imam wereg ambeg hondoholug laruk laruhu. Hondoholug laruk lit nuheyen siyag ane tirisi ano ulug oluk aruhuwen roti anggen lilibug tohon sum toron misig walug e zaitun ahaluwe men amben fano angge men emberimu umbuk fug angge imbik waharuk laruhu.

¹⁶Imbik waharuk laruhumu imam inowen hiyap ino fam NINIKNI Allah olohotma in arik lamihin ulug hiyag uruhumu hubu lahaptuk ambeg alukema laruk laruhu.

¹⁷Lahumu imam inowen ik Allah fahet emberukon kubag kinang fam wirihon elma hinanggo felug o sabo fanowon pilaman ololo tor angge oko walug ik ino fam pilabe feruk laruhu.

¹⁸Pilabe fuhureg imam inowen hiyap oruk het toho werehon ino lole felug ahunen roti anggen lilibug tohon walug larukon arimano hiyap inggik indanggenma embelug inggarehen ik unduk sihon ap siyag ane turukon siyahap enebuk tehon kubag fam hinanggoho werehon ino seneg laruhu.

¹⁹Seneg lit ele ine roho hiyap ino fam, ’Haren hahun luwaltuk lit ap eke men ambi atikin fug halug ik unduk sihon aruwen siyahap hapmisi fug angge famen

²⁰hat ap eke men ambi atikinmu siyag angge hubam tag teg halug

²¹ik aru hat hundama kimisimu hahum fitikim hinggaliyangge lombuk imisi. Ik aru fam NINIKNI Allahn huwatmisi ane fahet hat hori Israel inaben hol halug hat habug uruk lit ap huluwap enebul perukon arimano unubahet hiyap Allahn siyahap tirisiyon hag amag ulug pet eneptuk lamuhup. Ari roho hat hubam teko lamisi ihiyon ari fano nubam amag ulug hele tem toho imihin,’ ulug hiyag utuk laruhumu hiyap inowen, ’Haren ehenon hikit toho we tik-tem toho an nubam amag,’ uruk laruhu.

²³Ari uhumu hiyap inowen siyag ane tirisi halug siyag amag ulug imam inowen hiyag uruhu ane ino suwesingga fam haharoho ik unduk sihon ino elma kilabe felug ho roho eleha feseruk laruhu.

²⁴Eleha fesehureg imam inowen roti anggen lilibug tohon hiyap inggik indanggenman oko walug NINIKNI Allah fahet embemin ulug inggiken leko walug hubu lahaptuk ambeg alukema laruk laruhu. Lahureg imam inowen roti anggen arimano Allahn tohon ulug enehangge inggik indanggenma ololop toho walug hubu lahaptuk ambeg imbik lahalug indokma yaltuk laruhu. Yaluhureg hiyap inowen ik unduk sihon ino nawag ulug og utuk laruhu. Og uruhureg hiyap ino narukmu undamangge siyahap timisi ano ulug yet teg laruhu.

²⁷Hiyap inowen ahun luwaltuk lit ap eke men ambi atuken siyag angge ubam tag teg halug ik unduk sihonen undamangge siyahap turuk laruhumu ahum firuhureg inggaliyangge lombuk atuk laruhu. Ari roho ubam turuk laruhu ane ari fahet ori Israel inaben at abug uruk lit ap huluwap enebul perukon arimano unubahet hiyap Allahn siyahap tirisiyon hag amag ulug lukuram siyahon sipuk toho pet eneptuk lamuhup.

²⁸Hiyap inowen siyag ane turuk eleg halug ik unduk sihonen siyahap tuhu fugmu fobik oho malik indag taruk laruhu,” ibag.

²⁹Ap ekeyen nuhe an luwal naptuk lit ap eke men ambi atisimu siyag angge ubam tag teg ano ulug indimu olok toho wenggel haruk laruhu halug ap inowen uhe NINIKNI Allah olohotma hondoholug waharuk laruhumu imam inowen NINIKNI Allahn ibahon hikit toho ubam turuk laruhu.

³¹Hiyap inowen ap eke men ambi atuk eleg halug ahun indimu olok toho wenggel harukon alem ubam welaruhu fug angge famen hiyap ahun luwaltuk lit siyag ane turukon alem ubam aruhu.