Read Angguruk Yali BILANGAN 6 Bible Online

BILANGAN 6 - Angguruk Yali bible

BILANGAN 6

¹NINIKNI Allahn Musa fam ele uruk lit,

²”Israel inap hiyag isahunon tu: Ap hiyap ekeyen NINIKNI Allah ubam, ’Hat hamingmingangge nazir welaruhuk,’ ulug sali paltuk laruhu halug

³hele anggur ahaluwe olokon men ik olokon winon men hele anggur anggen olukon men le rehon men na fug angge

⁴hele anggur eiyon oho ahap oho naruk laruhu fug.

⁵Allah anggengge welaruhuk ulug sali emberukon pisan isahu rohon oruk het tuk fug angge fili fam paluk fug angge weregman eneg Allah amingmingangge nazir welaruhu li obog aruhu.

⁶Obog am fugmu ap warehon iniraham laruk laruhu fug.

⁷Allahn tohon ulug enehangge unggulmu werehen ikni isinga are erek wareg angge oho sen eneptuk lit inggarehen siyahap taruk laruhu fug.

⁸NINIKNI Allah anggengge welaruhuk ulug sali watukon senegman eneg nazir welaruhu li obog aruhu.

⁹Ap eke nazir ino iraham fano welahi ulug turukmen war atuk lit sen hahu halug nazir oruk fam siyag angge tag aruhu. Tag aruhu halug hup sabirenam welaruhureg siyag angge nubam tag tehon eleg aha ulug oruk paluhu.

¹⁰O likin sambil fam suwe yalma piren ano pel hahon piren ano o sabo fanowon fam walug watug imam og utuk laruhu.

¹¹Og uruhumu imam inowen suwe misig ino Allah olohotma waroho yaltuk lit eke misig siyag angge nazir ahun ino ubam werehon Allahn elehap tukag ulug waroho hubu lahaptuk laruhu. Hubu lahabuhureg Allah anggengge wereg puhuben enehangge horuk paluk fug angge welatikin hag toho welaruhun ulug hiyag utuk laruhu.

¹²Hiyag uruhumu NINIKNI Allah indi siyahap tirikikteg nin hebeloho fanowap timin ulug wam domba uwaliyon mo misig famon imbik waharuk laruhu. Imbik waruhureg NINIKNI Allah fam ele uruk lit, ’Siyag angge nubam tag atisi ane ariyen tam sali emberikikon eleg atisi angge re an nazir welatikik li hup noenam atisi ulug winag ha fug angge tam irikikon hikit toho Hat Allah hamingmingangge nazir welaruhuken sali paltuk lahi,’ uruk laruhu.

¹³Nazir inap unubam tuk teg ane tu: Nazir ahun eke amusun toho Allah amingmingangge weregman eneg sali emberukon horog atukmu nazir ahun ino o sabo fanowon sokolma hondoholug waharuk lamuhup.

¹⁴Waharuk lit nazir ahun inowen NINIKNI Allah fahet waroho yaltukon wam domba yuhambukon siyag teg elehon mo misig famon men, siyag ane tirikikon Allahn elehap tukag ulug waroho hubu lahaptukon wam domba heyon siyag teg elehon mo misig famon men, Allah olohotma narukon wam domba yuhambukon siyag teg elehon men,

¹⁵suburu Allah fahet emberukon men, ik Allah olohotma hililtukon men, roti anggen fano roho lilibug tohon suwap turuk angge embeselug tag toho wirahowon kubag misig men walug waharuk laruhu. Roti anggen arimano minggiroho winon e zaitun ahaluwe mangno roho wiratuk lit winon e zaitun ahaluwe are roho wirahowon walug waharuk laruhu.

¹⁶Walug waruhu angge arimano obog toho imam og uruhumu hubu lahaptuk ambeg alekuma walug laruk laruhu. Walug lahureg hun ariyen siyag ane turuk latisiyon elehap tukag ulug Allah fahet wam waroho hubu lahaptuk lit eke abirangge indokma yaltuk laruhu.

¹⁷Yaluhureg wam domba yuhambukon NINIKNI Allah olohotma nul ulug waroho eseruhureg roti anggen wirahowon kubag misig ino men suburu walug waharukon arimano men indokma yaltuk lit ik Allah olohotma hilili feruk laruhu.

¹⁸Hilili fuhumu nazir ahun inowen o sabo fanowon sokolman oruk nazir wereg lit paltuk elehon ino heroho paluhureg indoken nawag ulug wam Allah olohotma nul perukon sei yaltuk ambeg hik isaruk laruhu.

¹⁹Hik isahumu imam inowen wam domba yuhambukon inggik osohowon eke men, roti anggen e zaitun ahaluwe mangno roho wirahowon men e zaitun ahaluwe are roho wirahowon men oko walug nazir ahun inggik indanggenma emberuk laruhu.

²⁰Umbuhureg nin hebeloho oko walug NINIKNI Allahn tohon ulug Allah olohotma leho feruk laruhu. Leho fuhu angge arimano obog toho men wam iliyapma men uyug men imam inowen naruk laruhu. Ari obog toho turuk laruhumu nazir ahun inowen nin hebeloho hele anggur ahaluwe naruk laruhu,” ibag.

²¹Nazir ahunen Allah amingmingangge welaruhuk ulug sali emberukon horog atukmu NINIKNI Allahn tu men ari men imbik waharuk laruhu ibahon arimano obog toho At fahet imbik waharuk laruhu. Aren an ninggikmu anggolo werehen nin sebe roho imbik waruhuk ulug sali emberuk halug sali emberuk ane umbusuk fug angge obog toho walug waharuk laruhu.

²²NINIKNI Allahn Musa hiyag utuk lit,

²³”Harun umalikisi menen Israel inap An nunuk fam hi eneptuk lit uruk lamuhubon tu milal enebik lamihin,

²⁴’NINIKNI Allahn hit indi henesug lit wanggi waroho fet henesug laruhu.

²⁵NINIKNI Allahn aluke yihik lit indiyen let henebuhu.

²⁶NINIKNI Allahn hit olohotma hunumbahakumu fano roho welamuhup,’ uruk lamuhuben hiyag isa lamihin.

²⁷It arimanowen An nunuk fam Israel inap hi eneptuk lamuhup halug Anden wanggi waroho fet enesug laruhuk,” ibag.