Read Angguruk Yali BILANGAN 7 Bible Online

BILANGAN 7 - Angguruk Yali bible

BILANGAN 7

¹Musa inowen o sabo fanowon wiri fibareg o sabowet undama wereg anggeyet Allah anggengge wereg ulug e ahaluwe amben fanowon are ribibareg hubu lahaptuk ambeg oho are ribibag.

²Are ribibagma Israel inap ununggul unuk wal taneg werehon enebe winag isibahon onowesi nisanggowen itanowen

³NINIKNI Allah fahet imbik watfag angge tu: Onowesi wal tanehen wam sapi misig-misig walug waharuk lit ap pirenen kereta wam sapiyen lisoho walug laruk angge ungga saloho werehon misig-misig o sabo fanowon alukema imbik watfag.

⁴Imbik watfagma NINIKNI Allahn Musa fam ele uruk lit,

⁵”Ap aruman imbik wahasa angge arimano wamihinteg An nibam o sabo fanowon ino halog toho walug lul ulug kereta walug wahason aruma palimu imbik lahalug laruk lamuhuben Lewi inap wal tanehen turuk ane hikit toho og isamihin,” ulug hiyag itfag.

⁶Hiyag itfagma Musa inowen wam sapi nisanggowen itano men kereta falfaliken itano men wibareg Lewi inap onowesi wal taneg werehon og isibag ane tu:

⁷Lewi amloho Gerson inowen ondohowonen ondohowon arimanowen yabuk turuk ane hikit toho wam sapi uhan men kereta piren men og isibag.

⁸Lewi amloho Merari inowen ondohowonen ondohowon arimano imam Itamar hun Harun amloho inowen milal eneptukmu iniyabuk turuk ane hikit toho wam sapi likinen men kereta uhan men og isibag.

⁹Lewi amloho Kehat inowen ondohowonen ondohowon arimanowen o sabo fanowon fam foroho angge mondabi fanowon arimano unumaloma ha roho walug laruk lamuhup ulug kereta wam sapiyen walug laruk angge og isibag fug.

¹⁰Musa inowen hubu lahaptuk ambeg e ahaluwe amben fanowon are ribibag sambil Israel inap onowesi arimanowen hubu tam lahaptukon fahet imbik lul ulug wep toho imbibag angge arimano hubu lahaptuk ambeg alukema walug wamuk ohoma

¹¹NINIKNI Allahn Musa fam ele uruk lit, ”Onowesi nisanggowen itano mangno roho wam fug angge eke sambil eke sambil it sehelimuwon misig-misihen hubu lahaptuk ambeg fahet wep toho emberusa angge arimano imbik waharuk lamuhup. Ari roho walug waharukmen eneg o nisanggowenam aruhu,” ulug hiyag itfag.

¹²Hiyag itfag ane ari hikit toho eke sambil eke sambil walug waharuk latfag ane tu: [Imbik watfag sul] — [Ununggul unuk] — [Onowe unuk] 1 — Yehuda — Aminadab amloho Nahason 2 — Isakhar — Zuar amloho Netaneel 3 — Zebulon — Helon amloho Eliab 4 — Ruben — Syedeur amloho Elizur 5 — Simeon — Zurisyadai amloho Selumiel 6 — Gad — Rehuel amloho Elyasaf 7 — Efraim — Amihud amloho Elisama 8 — Manasye — Pedazur amloho Gamaliel 9 — Benyamin — Gideoni amloho Abidan 10 — Dan — Amisyadai amloho Ahiezer 11 — Asyer — Okhran amloho Pagiel 12 — Naftali — Enan amloho Ahira It wal tanehen ambi roho imbik waharuk latfag angge tu: Allah fahet emberukon roti anggen lilibug tehon e zaitun ahaluwe mangno roho tag tehon hinanggoho foroho angge piren, misig ino kubag ili ruruk angge perak fam wirihon anggin emberuk angge o sabo fanowon ino foroho latfahon fam embelug winag harukmen anggin te 1.500 gram atfahon men, pirenehon kou perak fa(...)

⁸⁴Israel inap onowesi arimanowen hubu tamon lahaptukon fahet imbik waharuk latfag angge obog toho ulon tu: ili ruruk angge perak fam wirig anggubag nisanggowen men kou nisanggowen men anggin mangno roho 27 kilogram atfahon men, e ahaluwe amben fanowon kou emas fam wirihon elma hinanggoho werehon nisanggowen anggin 1 kilogram men, Allah fahet waroho yaltukon wam sapi nisanggowen men wam domba uwaliyon nisanggowen men wam domba umalik mo misig famon nisanggowen men, roti anggen wam men mangno roho Allah fahet emberukon men, niren siyag ane turuk latukukon Allahn elehap tukag ulug waroho hubu lahaptukon wam kambing yuhambukon nisanggowen men, Allah olohotma narukon wam sapi uhaneg fimahen men, wam domba uwaliyon teng pirenman nubam hilag falfaliken men, wam kambing teng pirenman nubam hilag falfaliken men, wam domba umalik mo misig famon teng pirenman nubam hilag falfaliken men imbik waharuk latfag.

⁸⁹Imbik waharukmu Musa inowen hundig-hundig NINIKNI Allah men nenele ul ulug Allah men Ambi Atuk Ibam o sabo fanowon ino fam kulug holegma e seng toho wirihon peti elma Wene Numen haharehon kilabeg angge ele latukon atogma malaikat hag angge fuma-fuma unduhukon honggolegman Ninikni Allahn ele hiyag utukmu holtuk latfag.