Read Angguruk Yali BILANGAN 8 Bible Online

BILANGAN 8 - Angguruk Yali bible

BILANGAN 8

¹ NINIKNI Allahn Musa fam ele uruk lit,

²”Harun hiyag isahunon tu: Iral seleg ino aluke fil umbagpag tukag ulug kou sabiren itano iral emberuk ambeg palimu imbik lahakun,” ulug hiyag itfag.

³Hiyag itfag ane ari hikit toho Harun inowen turuk latfag.

⁴Iral emberuk ambeg ino wirimangge NINIKNI Allahn tom Sinai famen Musa fam unug hibahon wirim toho wirig lit kik turuk angge fam emas orohole fanowon teloho laleg latfag. Teloho laleg lit uyug famen hesenggengge e owil hahon fam ahandip til la fug angge we misigmu mangno roho laleg latfag.

⁵NINIKNI Allahn Musa fam ele uruk lit,

⁶”Israel inap sehelimuwen ununggul unuk Lewi inap arimano An nolohotman unubabut haloho welamuhup ulug mumal enebuhunteg unubam tuhunon tu:

⁷Siyag ane turuk latuson eleg amag ulug enehangge ik unubam hilili fuhunmu onoruk men enemenderuk men obog toho paltuk lit enesum wan turukon ik umaho fat tahup.

⁸Ik umaho fat tahupteg An Allah nubahet yaltul ulug wam sapi kabiniyon men roti anggen lilibug tehon e zaitun ahaluwe men mangno roho tag tehon men walug wamuhupmu siyag ane iren turuk latuson An Allahn elehap tukag ulug haren wam sapi kabiniyon eke wep toho umbuhun.

⁹Wep toho umbuhunteg Lewi inap arimano An men Ambi Atuk Ibam o sabo fanowon alukema hondog enebuhunteg Israel inap obog toho palu arik wamuhuben wol enebuhun.

¹⁰Wol enebuhunteg Lewi inap arimano An HINIKNI Allah nolohotma unduhuk unubahakunmu Israel inap arimanowen ininggik ununggulmu umbuhup.

¹¹Umbuhupmu Lewi inap arimanowen An HINIKNI Allah niyabuk turuk lamuhup ulug aben An nubahet nungge-nungge emberuk hag toho Harun inowen Israel inap ununuk fam onori Lewi inap arimano An ninggikmu umbuhu.

¹²An ninggikmu umbuhumu Lewi inap arimanowen ininggik wam sapi piren itano ununggulmu umbuhup. Umbuhupmu iren siyag ane turuk latuson An Allahn elehap tukag ulug Harun inowen wam misig ino waroho hubu lahaplug wam pirenehon ino waroho abirangge indokma yale fuhu. Ari roho tuhu ane ariyen Lewi inaben An nindi siyahap turuk latuson obog toho eleg aruhu.

¹³Harun inowen hubu lahabuhumu Lewi inap arimanowen Harun umalikisi men let eneptuk lamuhup ulug haren it enelukema unduhuk unubahakunteg NINIKNI Allahn tohon ulug ninggikmu umbuhun.

¹⁴Ari roho turuk lit haren Israel inap sehelimuwen Lewi inap arimano An nubahet mumal enebuhunmu An nanggengge amuhup.

¹⁵Ari obog toho unubam turuk lamuhupmu Lewi inap arimano unubabut haloho wereg lit o sabo fanowon fam An niyabuk turuk lamuhup.

¹⁶Israel inap ununggul unuk winon unumalikisi wandabon unubalmangge Lewi inap arimano An nanggengge amuhup ulug mumal tarikikmu we tem toho An ninggikmu welamuhup.

¹⁷Anden o Mesir kinangman malik wandabon obog toho unusuruk lit Israel inap unumalikisi wandabon men enembohom wandabon men oho unusele angge famen An nanggengge welamuhup ulug embeserikik angge re it obog toho An namingmingangge roho wereg lit niyabuk turuk lalep.

¹⁸It arimano unubalmangge Lewi inap An namingmingangge roho welamuhuben mumal eneptikik.

¹⁹Israel inap sehelimuwen mumal eneptikikteg Harun umalikisi men let eneptuk lamuhup ulug ininggikmu emberikik. Ininggikmu emberikik angge re it men let toho Israel inap unubahet o sabo fanowon fam An niyabuk turuk lamuhup. Israel inap arimano o sabo fanowon iraham larukmen war amuhup tohon ulug Lewi inap arimanowen it unubahet o sabo fanowon fam kuruk lit Israel inaben siyag ane turukon elehap tin ulug An Allah nubam heng naptuk lamuhup,” ulug hiyag itfag.

²⁰NINIKNI Allahn Musa hiyag itfag ane ari hikit toho Musa men Harun men Allah umalikisi Israel inap obog toho menen Lewi inap unubam turuk latfag.

²¹Ari roho turukmu Lewi inaben nunubabut haloho welamuhuk ulug enebeyet enesum wan tehonet ik umaho fat tibagma Harun inowen NINIKNI Allah anggengge amuhup ulug inggikmu imbibareg Lewi inap arimanowen siyag ane turuk latuson Allahn elehap tukag ulug At olohotma hubu lahapfag.

²²Hubu lahapfagma Lewi inap arimano o sabo fanowon fam kibareg Harun umalikisi menen milal eneptukmu iniyabuk turuk ane ak tibag. Ari roho turuk latfag ane ari NINIKNI Allahn Musa fam hiyag itfag ane hikit toho turuk latfag.

²³Ari tibagma NINIKNI Allahn Musa fam ele uruk lit,

²⁴”Lewi inap arimano indag atuk sambilen mo ilig am wirig am turukmen hinahaneg fimahen atuk halug o sabo fanowon fam iniyabuk wituk ane ak turuk lamuhup.

²⁵It indag atuk sambilen mo ilig am wirig am turukmu teng misigmen nubam hilag fuwap fimahen 50 aruhu halug o sabo fanowon fam yabuk turuk ane embeseruk lamuhup.

²⁶Iniyabuk embeseruk lamuhupteg enemuwen o sabo fanowon fam yabuk tuk fug angge onotsiyen yabuk turukon let eneptuk lamuhup. Ari roho iniyabuk wal tanehen turuk lamuhuben haren milal eneptuk laruhun,” ulug hiyag itfag.