Read Angguruk Yali BILANGAN 9 Bible Online

BILANGAN 9 - Angguruk Yali bible

BILANGAN 9

¹Israel inap arimano o Mesir kinangman wilip atfag li mo ilig atug wirig atfagma pikalem tamon fam NINIKNI Allahn o Sinai lekman Musa fam ele uruk lit,

²”Pikalem misihon tu fam hup nunggul hurik atuk sambil mo ubuk urukmu wam Paskah esebuhup. An HINIKNI Allahn wam Paskah esetuk ane fahet hiyag hisarikik ane fuki roho wenggel haruk lit wam ino esebuhup,” ulug hiyag itfag.

⁴Hiyag itfag ane ari Musa inowen umalikisi Israel inap hiyag isibag.

⁵Hiyag isibag ane hikit toho pikalem misihon fam hup nunggul hurik atfag sambil mo ubuk ik ohoma Israel inap arimanowen o Sinai lekman wam Paskah esetuk latfag.

⁶Esetukmu Israel inap sehelimuwonen ap wareg angge senetfareg siyag angge unubam tag tehen o ino sambil wam Paskah esebuk fug teg latfag. Esebuk fug tehen Musa men Harun men enembeg libareg hiyag isaruk lit,

⁷”Niren ap wareg angge senerehema siyag angge nunubam tag teg angge famen o yoho nonori Israel inap winonen NINIKNI Allah olohotma wam Paskah esetuk hag toho niren oho esebuk teg lahe ano?” ibag.

⁸Ibagma Musa inowen hiyag isaruk lit, ”NINIKNI Allahn hit fahet hiyag nitmisi ane holminen nangno reg lamok,” ibag.

⁹Ibagma NINIKNI Allahn Musa fam ele uruk lit,

¹⁰”Israel inap hiyag isamihinon tu: Ap wareg angge senetukon men o yatma lamin ulug kalemma larukon menen wam Paskah esebuhuk peruk halug pikalem misig welamuhupteg pikalem pirenehon fam hup nunggul hurik atuk sambil mo ubuk urukmu wam Paskah esetuk lamuhup. Wam ino osoho felug roti anggen suwap turuk angge embeselug wirahowon men yentuwal unduk sihon men naruk lamuhup. Ari roho naruk lamuhubon fahet ihiyon ari hiren endebuhubonen endebuhubon arimanowen oho senegman eneg welamuhup.

¹²Allahn wam Paskah esetuk ane fahet hiyag nisarisi ane fuki roho wenggel haruk lit wam arimano unuwag misig oho sengge ruk fug angge osoho feruk lamuhup. Osoho felug obog toho naruk lit sono hubet nahukon ulug tor angge oho umbat taruk lamuhup fug.

¹³Ap siyag angge unubam tag teg elehon men o kema-kema laruk elehon menen inirim toho wam Paskah esetuk eleg halug NINIKNI Allahn tu sambil wam Paskah esetuk lamuhup ulug emberisiyon sobir isaruk lit alem siyahon unubamap tehesa ulug it onori sehelimuwen elehap enebuhup.

¹⁴Ap pohon hit sehelimu werehon ekeyen wam Paskah eseruhuk peruk halug NINIKNI Allahn hiyag nisarisi ane hikit toho esetuk laruhu. Allahn wam Paskah esetuk ane fahet emberisi ane ari hit Israel hinap yuhon men ap pohon menen ambi roho seneg lamuhup ulug hiyag isamihin,” ibag.

¹⁵O sabo Allah men Ambi Atuk Ambeg ino witfag sambil ino hina wambik watfareg o ino hililip tegman hubanggo indok ambulpul hag latfag. Ari eneg turuk lit

¹⁷hina ino laharukmu Israel inap o sabo wiroho welatfag ambeg embeselug laruk latfag. Larukmen hina ino nin wambik waharukmu o sabo wiroho nohoruk latfag.

¹⁸NINIKNI Allahn hiyag isibag ane hikit toho eneg wilip atuk lit Aren ibag ane hikit toho eneg o sabo wiroho nohoruk latfag. Hina ino Allah men Ambi Atuk Ibam ino hililip teg lit weregma Israel inap arimano o witfag ambeg ino welatfag.

¹⁹Hina ino amusun toho o ino hililip teg weregma oho NINIKNI Allahn hiyag nisaruk ane pisan usul fug ulug wilip am fug angge welatfag.

²⁰Hina ino we hup piren hinahanam eneg o ino fam hililip tegma oho NINIKNI Allahn hiyag isibag ane hikit toho amusun toho welam fug angge wilip atuk latfag.

²¹Hina ino hupmu wambik watlug hililip tegman likiya sakan tirikim laharukmu oho ap arimano o ino sambil eneg wilip atuk latfag. Hina ino unukoho laharukmu oho hubanggo laharukmu oho ap arimano wilip atuk latfag.

²²Hina ino hup piren ano pikalem misig ano anggoloenam ano lahuk fug angge weregma Israel inap o witfag ambeg eneg welatfag. Weregman eneg hina ino laharukmu ir oho wilip atuk latfag.

²³NINIKNI Allahn Musa feneyen hiyag isaruk latfag ane hikit toho eneg turuk latfag.