Read Angguruk Yali MIKHA 1 Bible Online

MIKHA 1 - Angguruk Yali bible

MIKHA 1

¹Hun Mikha ino ibam pumbuk toron Moresyet welatfag. Ap suwon Yotam men Ahas men Hizkia men enebe wal tanehen Yehuda kinang seneg latfag li NINIKNI Allahn o pumbuk suwon Samaria men Yerusalem men unubam teko lahu ane fahet hun Mikha ino hiyag utuk latfag ane suwesingga tu fam paloho imbibag.

²O pumbuk obog toho kinang atogman atogma welahebon, NINIKNI suwon Allah waharuk lit hiren siyag ane turuk lahebon fahet fag toho imisiyen holeg lamek! Ibam poholman wilip atug wambik waharuk lit punu ke laruk.

⁴Tom uyuhen soptukmu hindali indokman wiyig atuk hag toho wiyig atuk. Ik tom famen tonggoma wamburuk hag toho masag walug wamburuk.

⁵Israel inaben NINIKNI Allah enembol yig utuk lit siyag ane eneg turukon fahet ari obog toho teko laruk. Ap san Israel inap inindi kahal eneptukmu Allah enembol yig utuk? Samaria inaben inindi kahal eneptuk eleg peruk lahep? Ap san Yehuda inap milal eneptukmu punumu usane ruruk? Yerusalem inaben milal eneptukon fahet henepeleg?

⁶Ari fahet NINIKNI Allahn ele urukon tu, ”Anden o pumbuk suwon Samaria ino halog toho olunap tubusuhukteg helep fele roho lin uhuwon arimano imbiloho tonggoma kila fusuhukmu olun ino hele anggur yatuk ambeg aruhu.

⁷Usasum iren forohowon obog toho Anden lilibug toho hik-hak isaruk lit nunumba ulug wel eneptuk angge fahet emberuk latuson indokma yale fusuhuk. Samaria inaben An numbahalug nunumbasi ulug wel eneptukon arimanowen og isaruk angge arimano ap seliyonen walug lahupteg iren nunumbasi ulug wel eneptukon fahet emberuk lamuhup,” ulug Allahn ele uruk.

⁸Samaria siyag aruhu ulug an, Mikha, nindi siyahen mene kuwa ruruk hag toho uba yatuk lit sum eleg angge nabiye lahuk.

⁹Samaria inap yowil angge werehon fano am fug angge weregma Yehuda inap unubam aruhu lit teg. Yowil angge ino o Yerusalem an nori wereg ambeg elehet walinggoho ohowon sok horog toho wereg.

¹⁰Siyag amuhuk ane fahet o Gat inap hiyag isa lahup fug. Iren hol hahupteg uba yabuhup tohon![1] O Bet-Le-Afra[2] hinindi siyahen fubut watuk lamuhup.

¹¹O Safir hinap welahebon,[3] hininggik hele waroho sum eleg angge hininggali roho ap seliyon wereg ambeg lahup. Ap seliyonen o Zanaan inap[4] waling enesugmu wilip am fug teg. O Bet-Haezel inaben indam ap winon ili og eneptuk latusa angge famen ketiya fong watuk lit ili og enebuk fug teg.

¹²NINIKNI Allahn ap seliyon hondog eneptukmu elehet o Yerusalem walinggoho ohowon sok horog toho waharusama o Marot inaben[5] nir oho siyag amuhuk ano ulug inindi anggin toho wereg.

¹³O Lakhis hinap welahebon, henembohom kuda arimano kereta lisoho walug laruk angge fam ilili fuhupteg longgo uhup. Siyag ane Yerusalem inaben uwan tuk fugmu hiren tam milal eneptuk latikip. Israel inaben Allah enembol yig utukon ino hit sehelimu tam inam atisi.

¹⁴Yehuda hinap nori, ikniyen ahaloho ahun ambeg hik turuk hag toho o pumbuk Moresyet-Gat ap seliyon ngi amuhuben hik enebuhup. O Akhzib inaben[6] honowesi suwon unubam let henebuhuk ulug hiyag isaruk angge famen let eneptuk lamuhup fug.

¹⁵O Maresya hinap welahebon,[7] Allahn ap seliyon henembeg mon enebuhumu henengginang iren ngi amuhup. Yehuda hinap honowesi suwon hiren ketiya palimuwap eneptuk lahep angge famen fobik o Adulam owikmu hirag arik lahup.

¹⁶Yehuda hinap welahebon, hunumalikisi hinindi reg lahebon ininggik hele waroho hit hunumbahalug ap seliyon enembeg lahup. Lahubon fahet hinindi siyahen huhubi unggul oruk elehon ino hag toho honoruk obog toho here fusuhup.