Read Angguruk Yali MIKHA 2 Bible Online

MIKHA 2 - Angguruk Yali bible

MIKHA 2

¹Hubanggo nohoruk ambeg yinggig lit nit nonolok nangginoho tuhuk ulug wenggel haruk inap siyag amag! Likiya sakan tirikim ninine werehen hubanggo wenggeleheyon ino tul ulug siyag ane anggolo turuk.

²O men kinang men ap winonen tohon inindimuwen hilila perukon hilaruk lit ap unuhesi malik men enengginang men siyahap eneptuk.

³Ari fahet NINIKNI Allahn ele urukon tu, ”Hit siyahap henebuhuk peruk lahi angge re hit fano amuhuk puk fug. Siyahap henebuhuk li itano hinindi hemet toho wenggel hahup tohon e paleg angginon henenduhunmu umbuhukmu leko la fug angge sungguk hisa wambuhu.

⁴Ari roho teko lahu sambil ino hiren uba yatuk lit, ’Nit mondabi siyag atukuk, niniyabuk aben hilarusa, nininggik hele wat neneptusa inaben nenengginang obog toho fibir atusa,’ ulug hunu sini uruk lamuhupmu aben abilit heneptuk lit hininggaliyap heneptuk lamuhup,” ulug Allahn ele uruk.

⁵Fobik aben NINIKNI Allah umalikisi nin hebeloho kinang og isahup sambil ino ap misihen oho hit kinang hiyag hisahu fug.

⁶An men seli roho wereg inaben hiyag nutuk lit, ”Haren hele urukmen warukmen hiyag nisa fug,” ulug ininggarehen enele urukmen warukmen hiyag nutuk. Iren te, ”Allahn siyahap henebuhu uk fug teg,” il laruk lit,

⁷”NINIKNI Allahn Israel ninap huluwap neneptisi peruk lahen? Haren te NINIKNI Allah folo-folo olok haruk lit nunusuhu peruk lahen? Haren uruk lahenon ari hag toho At inowen tuk fug teg. Ap san fano ane turuk halug Allahn ele fano roho hiyag utukon hapeleg?” ulug ap arimanowen komo naptuk.

⁸NINIKNI Allahn ap arimano ele hiyag isarukon tu, ”Hit An numalikisi men seli roho welahep. Ap suwahal uruk elehonen nuwabusa ano ulug wenggel ha fug angge enekol eleg toho kalemma larukmen hiren it enesum nonggoloho hilaruk lahep.

⁹Hiyap An numalikisi sehelimu werehon inibam enehiyeg toho wereg ambehen yanggal eneptuk lahep. It unumalikisi Anden fano-fano angge og isarikikon oho hiren mondabi hilaruk lahep.

¹⁰Tuma hinindi yuwag toho welahep ha fug tehen in atug wilip atuk lamek! Hiren honolok ane turuk lahebon ariyen o aru mondabi siyahap tirikip.

¹¹Ap ele si ane uruk ahun eke henembeg walepteg, ’Anggur ahaluwe men ik olokon winon men hiren naruk lamuhuben anggolo aruhu,’ ulug hiyag heselepma hiren te ketiya eneg Allah wene hiyag nisaruk ahun tu waha ulug henehiyeg toho welalep.”

¹²NINIKNI Allahn ele urukon tu, ”Israel hinap nori, we tor angge welahebon, Anden fobik hit obog toho palu henebuhuk. Wam domba elehet ohoma kilabik waharuk hag toho Anden hit andog henebuhuk. Elehet ohoma ino wam domba arimanowen keleg teg hag toho henengginang fam ap keleg uhup.

¹³Hininggik hele waroho welahep ambeg elehet walinggoho ohowon sok halog tubusuhukteg hit selma og heneplug wilip aruhukmu hinindi se roho lahup. An Allah HINIKNI raja fet henesug lahiyon ino tam larukmu hit nombolim laruk lamuhup.”