Read Angguruk Yali MIKHA 3 Bible Online

MIKHA 3 - Angguruk Yali bible

MIKHA 3

¹Hit ap suwon-suwon Israel inap fet enesug lahebon holeg lamek! Alem fano roho haltukon fahet honoluk toho welalep angge famen

²fano ane fahet ninirim peruk lit siyag ane fahet hinindi haruk lahep. An nori enehap fungguli feseruk lit unuwag fam ununu werehon wisal heheg

³naruk lahep. Unuwag lilibug turuk lit wam unu wirabul ulug kong-kong lahaptuk hag toho it ununu pal-pal lahaptuk lahep.

⁴Hit tot welamuhupmu alem angginon hunubam atuken NINIKNI Allah fam let nenebin ulug henele hi roho uruk lamuhup angge famen Aren hebeloho hiyag hisahu fug. Iren siyag ane turuk latusa ulug aluke yig hisahu fug.

⁵Allah wene hiyag isaruk inap nabi arimanowen an nori un ane hiyag isaruk. Ap san nungge-nungge og isarukon unubam fano amuhup ulug hiyag isaruk angge famen iren heng eneptukon hikit toho og isaruk elehon unubam Allahn hunusuhu ulug hiyag isaruk. Ari fahet NINIKNI Allahn it unubahet ele urukon tu,

⁶”Nabi arimano fahet mo ubuk uhureg hup aruhumu hik tegma welamuhup. Hik tegma wereg lit nungge-nungge fulu roho yet ha fug angge teko lahu ane fahet hiyag isa fug teg lamuhup,” uruk.

⁷Teko lahu ane fahet Allah kapal haruk inap arimano Allahn hebeloho hiyag isaruk elehen ininggaliyen onorohole saloho welamuhup angge famen

⁸an Mikha nubam NINIKNI Allahn ahime fanowon pilabik waharuk lit nineyap naptukmu tu fanowon, tu siyahon ulug noluk teg lit nakol eleg toho Israel inaben Allah ele ying turukon fag toho hiyag isaruk lahi.

⁹Nori, Israel inap fet enesug lahebon holeg lamek! Alem fano roho haltukon fahet ninirim peruk lit pikiron hareyap turuk lahep.

¹⁰Hiren tuk fug ane turuk lit ap unusil laruk lit o pumbuk Yerusalem Allahn ngi reg ambeg ino wituk lahep.

¹¹Yerusalem inap onowesiyen uang og isarukon inibil atuk lit alem haloho emberuk. Allah amingmingangge imam arimanowen onggo og isarukon fahet eneg Allahn uruk latfag ane milal eneptuk. Wene hiyag isaruk inap nabi arimanowen uang og nisawag ulug fobik teko lahu ane fahet hiyag isaruk. Ari roho hit obog tohowen turuk lit, ”NINIKNI Allah nit sehelimu weregma siyag amuhuk fug,” uruk lahep angge famen NINIKNI Allah nit ninibil aruhu peruk lahep?

¹²Hiren siyag ane turuk lahebon fahet o Sion kinang obog toho hebel isahupteg o Yerusalem ino olunap tubusuhupmu tom Allah ibam wirig ambeg ino oho e fare lahaku.