Read Angguruk Yali MIKHA 4 Bible Online

MIKHA 4 - Angguruk Yali bible

MIKHA 4

¹Obog aruhu li tom NINIKNI Allah ibam wirihon ino tom winon apma regma at ino ine roho unduhuk lit mondabi palimu aruhu. Ap o pumbuk kinang atogman atogma werehon arimano mondoko tom ino alma lalug

²enele uruk lit, ”Yakub IKNI Allah, niren oho wel turuk laheyon ibam tom fam wirihon ino lahulen maniyek! Nit laruk lamuhuk abunggalem fahet Aren hiyag nisahu ane hikit toho laruk lamuhuk. O Yerusalemen NINIKNI Allahn ele uruk lit tom Sion famen milal neneptuk laruhu,” ulug enele uruk lamuhup.

³O pumbuk suwon yatma horogma werehon it-it seli roho weregma At inowen alem unubam werehon fuki roho yet isaruk lit haloho emberuk laruhu. Fit ap watuk angge iren tohon yabuk witukon fahet wanggunap turuk lamuhup. Eneminggin ap unusuruk angge wam senggeltukon fahet filiyap turuk lamuhup.[8] Ari tuhupteg o pumbuk kinang atogman atogma werehonen tog aptuk lit wat-war atuk lamuhup fug. It arimanowen tog aptuk ane fahet milal taruk lamuhup fug angge famen

⁴ap obog toho inindi yuwag toho wereg lit ininggareg enengginang fam hele anggur men e ara sawe hag ahen men alma heriyeg lamuhup. Ap misihen oho it enekolap enebuhup fug. NINIKNI Allah pohol ha kinang ha senehon inowen alem ari fahet sali emberuk.

⁵O pumbuk kinang atogman atogma werehon arimano wal tanehen unumbasi wel eneptuk lit enele holtuk angge famen niren NINIKNI Allah misig eneg wereg ulug wel turuk lit ele holtukmen eneg welamuhuk.

⁶NINIKNI Allahn ele urukon tu, ”We tot welamuhupmu wam domba unuyug siyag toho wereg lit linggik-longgo urukon hag toho werehon Anden nin palu enebuhuk. An ninggarehen indam alem angginon unubam emberuk lit yatma hik-hak isarikik angge famen tor angge werehon arimano fobik anggolowap eneptuk laruhukmu inine anggolo amuhup. An INIKNI Allah tom Sion fam heriyeg lit fet enesugmen eneg welaruhuk,” uruk.

⁸O Yerusalem obog toho halog tebeserusa angge famen ketiya oho wam domba foroho ahun lehoma heriyeg ambehen ambohom fet enesug hag toho Allah o Yerusalem tom Sion fam heriyeg lit umalikisi fet enesug. Fobik ap suwon in atuk lamuhubon arimano o Yerusalem wereg lit Israel inaben tam kinang suwon seneg latfag hag toho iren oho seneg lamuhup.

⁹Ketiya nungge fahet henele hi roho uba yatuk lahep? Nungge fahet hiyaben malik endebuk oho lit tanggusi naruken uruk hag toho uruk lahep? Hit honowesi war atusama uruk lahep?

¹⁰Yerusalem hinap nori, hiyaben malik indag tamin ulug memeltuk lit inel-hanel uruk hag toho turuk lamek! Ketiya hit o pumbuk Yerusalem famen wilip amuhupteg selma welamuhup. Ap seliyonen hondog heneplug o Babel lahup. Lahup ambeg inowen eneg NINIKNI Allahn let heneptuk lit ap seliyon ininggikmuwen windat henebuhu.

¹¹Ketiya o pumbuk anggolo ap enele wal-wal urukonen hunusul ulug palu atusareg enele uruk lit, ”O Sion ino olun atmisimu ninilen yet hulen siyahap tul,” uruk.

¹²NINIKNI Allahn o pumbuk arimano unubam tuhuk peruk ane fahet inindi anggat teg elehen enele uruk. Wiramna ineyon helep fam halog turuk hag toho Allahn palu enebuhukteg halog toho unusuhuk peruk lit wereg.

¹³Aren ele uruk lit, ”Yerusalem hinap welahebon, lalihipteg ap seliyon halog toho unusilihip. Anden hinineyap heneptukmu wam sapi andimbuk men uyug ahap men besi hahon ine anggolo wereg hag toho hit hinine aruhumu o pumbuk anggolo arimano sobit heheg windal-wandal toho unusuhup. Windal heheg unusuruk lit iren huhulangge hilaruk latusa angge arimano hiren walug wamuhupteg An Hinikni kinang obog toho seneg lahiyon nubahet emberuk lamuhup,” ulug Allahn ele uruk.

¹⁴Yerusalem hinap welahebon, ketiya nit ap seliyonen waling nenesugmu welahe. Israel ninap fet nenesuhon ino ap seliyonen oroholeanggenma fit fam watusama hinindi siyahen fili unggul paleg fam henehap kiriring heheg wat taruk lamek!