Read Angguruk Yali MIKHA 5 Bible Online

MIKHA 5 - Angguruk Yali bible

MIKHA 5

¹NINIKNI Allahn ele urukon tu, ”O pumbuk Yehuda kinang fam werehon obog toho suwon eneg weregma we Betlehem-Efrata ino tot teg angge famen o Betlehem inowen ap suwon misig in aruhureg An nunuk fam numalikisi Israel inap fer enesug laruhu. Umbasi tam welatfahonen ondohowonen at ino indag aruhu.

² NINIKNI Allahn umalikisi ap seliyon ininggikmu embeserisimu weregman eneg hiyap ap suwon ino indag tahu ulug mumaltisi hiyap inowen indag tahu. Malik ino indag aruhumu at ori tot welamuhubon arimano ininggik hele waroho wereg ambehen onori Israel inap enembeg suhuloho wamuhup.

³Malik ino ap suwon in aruhu halug NINIKNI Allahn ineyap turukmu IKNI Allah palimu werehon unuk fam umalikisi fet enesug laruhu. At eneg suwon ulug kinang atogman atogma tem peruk lamuhupmu at umalikisi inindi yuwag toho welamuhup.

⁴Aren ap obog toho fanowap enebuhu. Asyur inaben nunusul ulug waharuk lit elehet nit ninibam walinggoho ohowon halog isalug wamuk oho reg peruk lamuhup li itano it unusuhuken nit milal neneptuk lamuhup ulug ap inine werehon eneg in enebuhuk. In enebuhukon arimanowen nit Asyur inap ininggikmuwen windat nenebul ulug tog elman unusuhupteg it enengginang seneg lamuhup.

⁶Israel inap ap enele wal-wal urukon wereg ke hik-hak isaruk lit we tot embeseruson arimanowen fobik ap kinangmon unubam wenggel ha fug angge we Allahn let nenebuhu ulug wenggel haruk lamuhup. Osit men hibilil men we Allahn eneg kinangma pilabik waharuk hag toho nir oho NINIKNI famen welahe peruk lamuhup.

⁷It arimano ap enele wal-wal urukon seheli ke wereg lit olomeneyen pak namin ulug yami ruruk hag toho welamuhup. Olomeneyen pak hondo rulug ayehen saluk teg lit lilmal isarukmu ap misihen oho pak ino taluk toho wa fug teg hag toho Israel inaben o pumbuk arimano ap anggolo werehon unusuhup.

⁸Israel hinap nori, ap seliyon unusuruk lit obog toho elehap eneptuk lamuhup!

⁹NINIKNI Allahn ele urukon tu, ”Ari tuhup sambil tog abul ulug henembohom kuda fam lahalug larukon men, wam kudan lisoho walug laruk angge men, Anden obog toho eleha fusuhuk.

¹⁰O pumbukmu ap seliyon kuhup ulug elehet yaron walinggoho ohowon henengginang fam werehon obog toho eleha fusuhuk.

¹¹Usangge hiren foroho lahebon obog toho eleha fusuhukmu fobik teko lahu ane fahet mungguwat unubam kapal isaruk inap hit sehelimu mondabi eleg lamuhup.

¹²E men helep men nunumbasi ulug wel eneptuk lahebon obog toho eleha fusuhukmu hininggiken laltuk angge arimano fam wenggel haruk lamuhup fug.

¹³He Asyera ninisinga poholmon wereg perukon fahet e uwag hutuk teberuk latikibon arimano Anden heneko hik isaruk lit o pumbuk elehet yaron walinggoho ohowon halog tubusuhuk.

¹⁴O pumbuk ap enele wal-wal urukonen An nele holtuk elehon arimano unubahet Anden nahummu het-pet haruk lit unusuhuk.”