Read Angguruk Yali MIKHA 6 Bible Online

MIKHA 6 - Angguruk Yali bible

MIKHA 6

¹NINIKNI Allahn Israel inap unubam hiyag isarukon tu holeg lamek, ”Alem haltulen in atug maniyek! Tomen oho punuwen oho henele ilihibon holukag!”

²Israel inap unubam alem werehen NINIKNI Allahn fuki roho kim isamin peruk. An numalikisiyen siyag ane turuk latusa imisi ane tom men helep tuwaliyen menen holukag.

³NINIKNI Allahn ele uruk lit, ”Anden hit hunubam nanggintuk lit henele ying heneptuk latikik? Hiyag nemek!

⁴Hit Mesir inap enemingmingangge welatik ibagma Anden hininggik hele loloho o Mesiren hondog heneplug wilip atik iyag. Wilip atuk lit Musa men Harun men Miryam menen hit let heneptuk lamuhup ulug in eneptik iyag.

⁵O Moab inap onowe suwon Balak inowen Israel inap siyahap enebuhuk peruk latfagma hun Beor amloho Bileam inowen at ubam hiyag utuk lit, ’Allah unuk fam eneg hi enepmin,’ ibahon wenggel haruk lamuhup. Hit Israel hinap o Sitim embeselug ik Yordan paloho o Gilgal larukmu teko libag ane henepeleg aruhu fug. Ari obog toho wenggel haruk lit NINIKNI Allahn anggolo let neneptuk latisi ulug hinindi anggar aruhu,” ulug Allahn ele uruk.

⁶Israel inaben enele urukon tu, ”NINIKNI Allah palimu werehon wel tul ulug At olohotma lalug nungge og utuk lamuhuk? Wam sapi kabiniyon fanowon walug At olohotma yaltuk lamuhuk ano?

⁷Wam domba teng-teng angge men fano-fano angge winon winag isa fug tohon[9] NINIKNI Allah fahet imbila halug fano embehesa pelep ano? Niren siyag ane turuk latukukon eleg amag ulug nunumalikisi wandabon At fahet yal enepla?”

⁸Eleg-o nori! NINIKNI Allahn niren fano ane turuk lamuhukon fahet hiyag nisaruk latisiyon tu, ”Henehiyehen nit-nit let-ler atuk amul ulug fano ane eneg turuk lit hinindi apma roho wereg lit HINIKNI Allah men mangno roho welamuhup!” irisi.

⁹Ap inindi anggat tehonen NINIKNI Allah unuk fahet enekol haruk. Ari fahet hol hemek! NINIKNI Allahn ap o Yerusalem werehon unubam ele hi roho uruk lit, ”Hit hinibam tuma welahebonen Anden iminon tu hol nasug lamek:

¹⁰Ap unubabut onolokonen enele ying eneptuk lit enenggengge hilaruson inibam foroho ane ari An napeleg aruhu fug. Iren suburu sum toron fam fani rurukmu anggin eleg angge famen anggin teg ulug enele si urukon fahet An nirim.

¹¹Ari roho un ane til-wil norukon ino Anden nambolmaya fusuhuk fug.

¹²Hit o pumbuk tu fam welahebon obog tohowen henembilikanggen piren teg lit si-si ane eneg urukmu tung inap hit men werehon arimanowen oho onolok ane til-wil laruk.

¹³Supmu roho til-wil laruk lahep ane fahet Anden hit hunusuruk ane ak tirikikteg mondabi siyahap henebuhuk.

¹⁴Hiren suburu naruk lamuhup angge famen henehummu atuk elehen hinal piyag toho welamuhup. Ap seliyonen hilahup tohon ulug henenggengge walug hirahoma imbik lahup angge arimano obog toho longgo uhu. We tor angge foroho lamuhup angge arimano ap seliyonen huhulangge hilawag ulug ininggikmu umbuhuk.

¹⁵Hiniyabukmu anggen fok turuk lamuhup angge famen nungge-nungge tahantuk lamuhup fug. E zaitun anggen tahanoho pereltuk lamuhup angge famen ahaluwe henebene lahaptuk lamuhup fug. Hele anggur anggen paloho pete ruruk lamuhup angge famen ahaluwe naruk lamuhup fug.

¹⁶Ap suwon Omri men amloho Ahab ori men inindimuwen un ane wenggel haruk lit enesupmu roho amben siyahon eneg turuk latfag hag toho hiren oho turuk lahep. Ari fahet Anden hit hinibam pumbuk aru halog toho siyaha fusuhukmu ap o pumbuk winamonen hol halug enekolen unum yinggiltuk lit wasubag sup isalug hininggaliyap heneptuk lamuhup,” uruk.