Read Angguruk Yali MIKHA 7 Bible Online

MIKHA 7 - Angguruk Yali bible

MIKHA 7

¹Yihi, an mondabi siyag aruhuk! Ap eke suburu oboken ap iniyabukmu hele anggur anggen tahanoho naminon wereg ano ulug yami rik laruk. Larukmen yabuk ngi inaben anggen obog toho tahan tarusareg misig oho embeseruson wereg eleg hag toho an oho ari hag toho welahi.

²Ap Allah fam wenggel harukon obog toho kinang tu famen eleg atusa, pikir ane turukon misig oho wereg eleg. Ap obog tohowen nare ware fesemin peruk lit yebangge yep turuk.

³Onolok ane ininggik se roho turuk, onowesiyen nungge-nungge heng enebil laruk, alem haltuk inaben uang og nesemek il laruk. Ap ununuk suwon inindimuwen peruk ane hikit toho unggum kong turuk. Ari roho turuk lit mun ane man ane hebel-pebel isaruk lit ap inindi nonghonga feseruk.

⁴It sehelimuwon unubabut fano reg perukon alog-alog angge hag toho wereg. Pikir ane turuk inap wereg perukon arimano e folim hag toho wereg. Ari fahet Allah amingminganggeyen hit hiyag hisaruk latusa ane hikit toho Allahn ap siyag ane turukon unusuhuk perisi sambil horog atisi. Horog atisimu ap obog toho inindi nonghong uruk lamuhup.

⁵Ari roho turukmu nowe noren enele si ane nubam uruk eleg peruk lamuhup fug. Nare nindi pulmuwon inowen nele ying naptuk eleg puk fug. Hinindimuwen wenggel haruk lahep ane hunuhesi huruwe lahup tohon hiyag isaruk lamuhup fug.

⁶Amlohowen ikni apmayap turukmu ahalohowen isinga ele ying turuk laruhu. Hiyap ekeyen ahun isinga ubam suwahal urukmu o misig werehon oho seli roho welamuhup angge famen

⁷anden NINIKNI Allahn fano ane nubam tuhu ulug yet teg laruhuk. Allahn let nabik waruhu ulug nangno ruruk laruhuk. An nele urukmu Nikni Allahn hol niyahu.

⁸Hit ap seliyonen an inda yag nabuk fug. An fuk toho ying atikik angge famen nin hebeloho in aruhuk. Hik tegma welahi angge famen NINIKNI Allah an fahet seleg welaruhu.

⁹Anden NINIKNI Allah olohotman siyag ane turuk latikik ane fahet Aren olok toho nubam turukon anden ha ruruk laruhuk. Ha ruruk lit weregman NINIKNI Allah an nibil atuk lit unggum an nubam werehon hale fuhu. Aren an hondog naplug hik tegman wilip aruhureg selegma numbahaku. NINIKNI Allahn windat nabuhu ane ari anden yet hahuk.

¹⁰Allahn ari roho an nubam turukmu ap seliyonen oho yet hahupteg iren tam enele uruk lit, ”HIKNI Allah haren wel turuk lahenon kema wereg?” uruk latuson arimano mondabi ininggali haruk lamuhup. It arimano sabelep ap unuyuhen sobir isarukon hag amuhupmu anden pilap isahuk.

¹¹Hit Yerusalem hinap nori, elehet hinibam pumbuk walinggoho ohowon ap seliyonen halog toho siyahap tibahon ino hebeloho wiri fuhup sambil horog teg. O itano li hit henengginang hili hiyal aruhu.

¹²O ino sambil hit honori ap seliyonen hondog eneplug yali fil o Asyur men ik ambut fil o Mesir men ik Efrat ayegma men ik suwon yenggelehon ilanma men tom fene hik-hak isibahon arimano suhuloho henembeg wamuhup angge famen

¹³aben siyag ane turuk latuson fahet kinang obog toho lekma hag aruhu.

¹⁴NIKNI Allah, aben wam domba foroho hag toho Hat humalikisi huwanggun fam fet enesug laruhun. Wam domba Haren tohon aruma ohimu siyagma wereg lit enemu kinang fanoma la fug teg. La fug tehen Haren o Basan men Gilead men hondog eneplug lahunmu tam welatfag hag toho nin hebeloho fanoma welamuhup.

¹⁵Hat humalikisi o Mesir kinangman hondog eneplug wilip atuk lit aben tuk fug teg ane turuk latik inag hag toho nin hebeloho nit niniline turuk laruhun.

¹⁶Ari roho turukmu yet hiyahupteg ap o pumbuk winamon inine reg angge famen inine eleg atuken kol waroho welahe ulug ininggali haruk lamuhup. Ininggaliyen enembilik ininggiken lareg lit inisanggo laroho welamuhup.

¹⁷Pisanggo kinang ke ahum sap fam laruk lit kinang alinlan eneg nil larukon hag toho welamuhup. Welamuhupteg enekolen unuwag elek-elek angge ruruk lit hirahoma wereg ambehen wilip amuhupteg nir oho Israel inap INIKNI Allah apma welamuhuk ulug Hat hambeg wamuhup.

¹⁸Allah Hat hahon winon wereg eleg. Nit Haren mumal tarikinon we tot welaheyonen siyag ane turuk latukukon we Haren eneg elehap turuk lahen. Hat hundama holok haruk lahenon amusun toho foroho lam fug angge hahiyeg toho hindi nenesugmen eneg welahen.

¹⁹Haren nin suhuloho nit hindi nisaruk lit nonolok ane turuk laheyon sobit-sabar isalug ik humon fam hik isahun.

²⁰Nunumbasi unubam tam sali imbinahon hikit toho nit Abraham, Yakub men unumalikisi welaheyon hindi nenesugmen eneg welaruhun!