Read Angguruk Yali NAHUM 1 Bible Online

NAHUM 1 - Angguruk Yali bible

NAHUM 1

¹Allahn o pumbuk suwon Niniwe fam aruhu ane o Elkos ahun Nahum fam unug harukmu fulu roho yet hibag ane suwesingga tu fam hahareg.

²Aben tu Allah hag toho wereg ulug wel eneptuk ane fahet NINIKNI Allahn nirim peruk. At ele ying turukon fahet olok haruk lit ayeg war isaruk. At men seli roho werehon fahet ahummu het-pet haruk lit hebeloho unusuruk.

³NINIKNI Allah indi folo-folo olok atuk eleg angge famen ine anggolo reg lit aben siyag ane turukon apeleg am fug angge alem angginon unubam emberuk. At siyelu humon apmane laruk lit uyuhen sobil larukmu kinang ahe hina anggulog hag toho laharuk.

⁴Aren ik suwon yenggelehon eleg amag ulug pet turukmu itano ubale eneg atuk. Ik larukon obog toho firig atuk. O Basan kinangma hoholangge anggolo werehon ino lilog atuk, e tom Karmel fam werehon arimano ilim atuk, e owil tom Libanon fam werehon loloho wamburuk.

⁵At waharukmu tom obog toho yuk turuk lit punu obog toho wiyig atuk. At olohotman kinang lahuk wambuk turukmu ap obog toho enekolen unuwag elek-elek angge ruruk.

⁶Allah ahummu het-pet harukmu ap sa ine roho unduhuk lam teg? Undama ahe laharukmu ap sa oluk welaruhu? Olok haruk ane ari indok ambulpul hag toho ulog turukmu helep oho halog toho lin uruk.

⁷NINIKNI Allah ubabut fano wereg. Ap enesengseng toho wereg li At apma hirag arik laruk. Apma larukon arimano obog toho At oluk teg angge famen

⁸o pumbuk Niniwe At men seli roho werehon ino miyaloho walug lawag ulug ik fu monde feruk. At ele ying turukon arimano o hik teg ambeg lawag ulug yanggal eneptuk.

⁹Hiren NINIKNI Allah fahet ubabut sa hag toho wereg ulug wenggel haruk lahep? At inowen ap seliyon arimano tik-tem toho elehap enebuhumu ininggik pireneg angge hit siyahap henebik wamuhup fug.

¹⁰It seliyon arimano hele alohonen walabit warehon hag toho wereg. Nenembong se roho welamul ulug ik olokon anggolo naruk angge famen hoholangge lilohon indoken naruk hag toho mondabi siyag amuhup.

¹¹O Niniwe ahun olok eneg turukon eke in atisireg Yehuda inap INIKNI Allah ele ying tuhuk ulug ori men enele sahaltuk latusa.

¹²Enele sahaltukmu NINIKNI Allahn Yehuda inap unubam ele urukon tu, ”Ap seliyon enebe anggolo enembong se roho wamuhup halug oho aben kong-kong hik isahupmu mondabi eleg amuhup. Anden hit apmayap heneptuk latikik hag toho nin fobik apmayap henebuhuk fug.

¹³E paleg angginon o Niniwe inaben hunumaloma emberuson ino Anden kong toho hik isaruk lit hele hininggik pug heneptuson loloho windat henebuhuk.”

¹⁴O Niniwe inap onowe suwon fahet NINIKNI Allahn kong toho emberisiyon tu, ”Hat kuwilon welahen, hat war aruhunmu sal habuhup ambeg kinang habultuk lahi. Hat humalikisiyen endebuhubon arimano obog toho siyag amuhupmu hunuk mondabi eleg aruhu. Tu Allah hag toho wereg ulug laltikip angge arimano oho foroho lahep ibamen elehap enebuhuk.”

¹⁵Punu keyen ap eke wene fanowon hiyag isil waharukon yet homok! At inowen, ”Tog embesehesama hinindi yuwag toho welamuhup,” ulug hiyag isa waharuk. Ari fahet hit Yehuda hinaben Allah wel turuk sambil henehiyehen yunggultuk lamuhup. Allahn windat nenebuhu halug nungge-nungge og umuhuk ulug sali emberikip ane hikit toho og utuk lamuhup. At ubabut siyahon ino mondabi eleg ahama suhuloho hunusik waruhu fug.