Read Angguruk Yali NAHUM 3 Bible Online

NAHUM 3 - Angguruk Yali bible

NAHUM 3

¹Ap enele ying enebil unusil laruk inap inibam pumbuk ino siyag aruhu! Likiya hupmu mun angge man angge aben tohon huhulangge walug waharukmen eneg o ino keleg atisi.

²Holeg lamok! Ap seliyon kereta wam kudan walug laruk angge fam pu-pu angge waharuk. Enembohom folo-folo lawag ulug wanggun fam watil larukmu unuyug aplohok folung-folung waharuk.

³Ap sehen seneko wam kuda palimu lahalug tog elma laruk. Karog ayeg indok ambulpul hag toho turukmu fit pinel lebeg turuk. Ap anggolo waroho lin-lan urukmu it tog elma larukon arimano ap warehon fam salog-malog angge roho fuk turuk.

⁴O Niniwe inowen hiyap yaying turukonen hag toho til noruk latisi ane fahet alem angginon ari ubam atuk. Orohole fano reg anggeyen ap pamongge unusuruk lit o pumbuk ekeyon-ekeyon amingminganggeyap eneptuk latisi.

⁵Ari fahet NINIKNI Allah pohol ha kinang ha senehonen o pumbuk Niniwe fahet ele uruk lit, ”Anden hat men seliyap haptuk lahi. Hat hasum hunggulmuwen huyugmu obog toho hog habuhukmu hat kabiyog weregma ap o pumbuk kema-kema werehonen yet hiyahup.

⁶Anden ap anggolo iniline hinggaliyap haptuk lit yog hubam tag hubahakuk.

⁷Ap san hat yet hiyahupteg enekolen humbahalug lahupteg enele uruk lit, ”O Niniwe aru mondabi siyag atisi. San at fahet indi siyahen uba yaruhu? Piya sini urukon wol enebulen kema yami enebik lul?

⁸O pumbuk suwon Tebe kinang Mesir fam werehon ino ine elegma an eneg nine welahi peruk lahen ano? O Tebe ino ik Nil ayegma weregma ik ino elehet ineyon walinggoho ohowon hag toho welatisi.

⁹O Etiopia inap men Mesir inap men enebe winag isa fug toho o Tebe inap inibil atukmu Libia inap oho Put inap oho let enebik waharusa angge famen

¹⁰Tebe inap arimano o winama og eneplug larusa. Onowesi obog toho ininggik hele wat eneptuson wal-wal san ngi aruhu ulug enehangge hik turuk lit unumalikisi funggalman oho silimuwen oho ununggul arap toho unusil larusa.

¹¹Hit Niniwe hinap oho ik olokon nalug nenek turuk hag toho hinindi nonghong uruk lit ap seliyon onolohotman hirag arik lahup.

¹²Hirag arik lahup ambeg arimano obog toho elehet ineyon walinggoho oho angge famen e anggen momi rehon hag toho welamuhup. Aben e ino elel harukmu anggen loloho wamburukon aben pikit naruk lamuhup.

¹³Hit sehen seneg lahebon hiyap hag amuhupmu elehet hinibam walinggoho ohowon sok husihen ap seliyon pikit toho kuruk lit hirag arik lahup ambeg arimano harep pisako siyaha fusuhup.

¹⁴Ap seliyonen hit hinibam waling henebik wam fugmu ik naruk lamuhubon hinanggik aliyek! It seliyon ninibam pin kik wamuhup tohon ulug helep wak lalihipteg elehet hinibam walinggoho kilabehon ineyap turuk lamok!

¹⁵Mun ane man ane tuhup halug oho hit winon indoken hinarukmu winon tog elman hunusuhup. Hit henebe heren sunggabi mondeg hag toho welalep halug oho heren arimanowen yahongge elehap turuk hag toho karohen hit obog toho hunusuhup.

¹⁶Ayeg waroho waruk inap arimano suhal poholma werehon winag isa fug teg hag toho hit men wereg angge famen heren ta roho laruk hag toho hunumbahalug lahup.

¹⁷Hit honowesi arimano heren o sunen elehet alma wereg hag toho luhaloho wereg angge famen mowen yet isaruk halug linggik-longgo uhupmu kema lahasa ulug ap misihen oho hiyag enebuhu fug.

¹⁸Hat Asyur inap onowe suwon welahenon, hat hotsi kinang wal taneg senehon arimano noho enepeleg toho nohoruk. It ununuk suwon arimano nin hebeloho in amuhup fug. Humalikisi sehen senehon arimano tom fene linggik-longgo urukmu it hiyako palu eneptukon eke welaruhu fug.

¹⁹Yowilangge hubam werehon fano aruhu fug. Ap misihen oho hihit habuk fug teg laruhu. Hat siyag aruhun ane fahet aben hol hahupteg enehiyehen ininggik tag turuk lamuhup. Haren holok ane umbusuk fug angge ap obog toho unubam turuk latikinmu ap haren siyahap tirikin fuhon misig oho wereg elehen ari obog toho hubam aruhu.