Read Angguruk Yali HABAKUK 1 Bible Online

HABAKUK 1 - Angguruk Yali bible

HABAKUK 1

¹NINIKNI Allahn wene hiyag isaruk ahun nabi Habakuk fam hiyag utuk latfag ane suwesingga aru fam haharoho imbibag.

²NINIKNI Allah, anden nele ine roho let nenebin ulug Hat hubam uruk latikik angge famen nele holtuk latikin fug. Ap winonen siyahap neneptuk ulug nele ine roho Hat hubam urukmen warukmen eneg welahimu nosambil let neneptuk laruhun?

³Nungge fahet onolok ane eneg nunubam atukmu yet hawag ulug an numbaharuk lahen? Aben siyag ane nunubam turukmu Haren yet isalug nungge-nungge unubam tehen ha fug teg lahen? Anden walinggoho yet harukmen ap enemep hinangguruk lit unusurukon eneg yet isaruk lahi. O kema-kema suwahal uruk lit yik aptuk lit wereg.

⁴Nunumbasiyen tuk teg ane fahet komo eneptuk latfahon arimano embeseruk lit alem ekeyon-ekeyon fano roho haltuk eleg. Siyag ane turuk inaben ap inindi fanowon apmayap eneptukon ariyen alem eke hag eke hag werehon fano roho haltep angge famen ap siyahap eneptuk.

⁵ NINIKNI Allahn umalikisi hiyag isarukon tu, ”O pumbuk hit walinggoho werehon enesehelimu teko lahu ane yet teg lamuhup! Hit honoluk wereg li itano Anden su ane tuhukmu yihi ulug henekol hahup. Anden tuhuk ane hit hinilen yet ha fugmu ap ekeyen hiyag heselep ane fahet tem toho ehek pelep fug.

⁶Anden Babilonia inap unubabut onolokon arimano inineyap enebuhukmu kel ta fug angge kinang atogman atogma laruk lit kinang eke ilmig til eke ilmig til laruk lamuhup.

⁷Babilonia inap arimanowen onolok ane turuk lit ap obog toho enekolap enebil laruk. It enebe hemet toho wereg lit inindimuwen wenggel haruk ane hikit toho eneg turuk.

⁸Mene folo-folo larukon we tot apma regma enembohom kuda pupu angge larukon palimu reg. Olomene suburu oboken olok harukon men enembohom kuda mondabi onolokon men wirim teg eleg. Yatman waharuk lit enembohom kuda fam lahalug heriyeg lit unuyug aplohok hum toho il waharuk. Suwe kut inowen pisanggo watmin ulug hugmale wambik waharuk hag toho ap seliyon unusul ulug pupu angge waharuk.

⁹It obog toho sehen seneko ap enemep hinanggul ulug waharuk. Hebeloho enembol fil yet ha fug angge ap ik yinggi mondeg hag toho werehen winag isa fug toho sen eneptuk.

¹⁰Ap suwon-suwon sen eneptukon arimano inda yako ininggaliyap eneptuk. Elehet yaron fahet horog teg ulug inda yako pila rebelug laharuk lit elehet undama kulug o pumbuk siyahap turuk.

¹¹Unusulug o pumbuk winon oho siyahap tul ulug siyelu hag toho folo-folo laruk. Ininggareg inine fahet Allah hag toho welahe ulug siyag ane eneg turuk.”

¹²NINIKNI Allah, indamen tulug ketiya oho Hat an Nikni hebe usa fuluwon welahen. Hat war am fug angge mondabi welaruhun.[1] NINIKNI Allah, Hat helep humon alma heriyeg lahe ambeg welahenon, Haren Babilonia inap mumal eneptikinteg niren siyag ane turukon fahet nunusuhuben inineyap eneptikin.

¹³Hat hubabut mondabi fanowonen aben siyag ane turuk lit ap unusurukmu hilen yet isaruk lit nirim pelen. Nungge fahet ap enele ying eneptuk inap yet isalug siyag ane unubam turuk lahen fug? Nungge fahet onolok inaben inindi tot fano inap mag-mag narukmu Hat hele eleg angge welahen?

¹⁴Nit ap fahet Haren ikan men inini men iniknisi elehon hag toho wereg ulug nunumbaharuk lahen.

¹⁵Ikan watuk asum fam watuk hag toho Babilonia inap arimanowen ap sen eneptuk. Seneko palu enebik kulug enehiyehen yunggultuk.

¹⁶Babilonia inap arimanowen ikan watuk asum fet talug lit werehen tung inap atuk lit anggolo roho naruk. Ari fahet ikan watuk asum fam nunumba ulug wel turuk lit wam waroho hubu lahaptuk.

¹⁷It arimanowen sehen fam tog sap teg lit ap enele wal-wal urukon inindi isa fug angge unusil larukmen eneg welamuhup ano?