Read Angguruk Yali HABAKUK 2 Bible Online

HABAKUK 2 - Angguruk Yali bible

HABAKUK 2

¹”An winasul oho e pila regma lahalug Allah ele holmin ulug yet teg lahi ambeg lahaminteg NINIKNI Allah nele olokon fam ubam irikik ane fahet nungge ane hebeloho hiyag nitmisi ulug nangno ruruk latmin,” perikik.

²E pila regma laharikikteg nangno rurukmen NINIKNI Allahn ele hiyag nutuk lit, ”Anden hiyag hitminon aben fano roho kim haruk lamuhuben seleg toho helep fam hahare femihin.

³Anden hiyag hitminon fobik eneg teko lahu. Amusun toho welahi ulug hindi anggin toho welaruhun angge famen teko lahu fug puk fug angge nangno rurukmen eneg teko laruk sambil folo-folo horog aruhu.

⁴Hiyag hitminon tu: Ap san siyag ane turuk halug siyag aruhu. Ap san Allahn peruk ane hikit toho turuk halug indi wirik toho Allah fam wenggel haruk ane ariyen oluk welaruhu.

⁵Babilonia inap arimano nit nenenggengge anggolo welalep peruk inap arimano inindimu winik-wonog toho wereg lit til-wil noruk. Nit nenenggengge werehon aruman fano amuhuk peruk angge famen enenggengge arimanowen enele ying eneptuk. Ap warehon wereg ambeg ap kurukmen eneg fobik oho keleg am fug angge kolo reg laruhu hag toho Babilonia inap arimano enembilik ila regman eneg naruk lit welamuhup. Ap enele wal-wal urukon arimano narukmu oho unubam aruhu fug,” ulug NINIKNI Allahn ele hiyag nitisi.

⁶Babilonia inaben apmayap eneptuk inap arimanowen wasubag sup toho Babilonia inap fahet enele urukon tu, ”Aben tohon hilalug umbat taruk lahebon ari fam siyag amuhup! Ap winon unubam paleg angge wereg eleg angge famen paleg angge wereg ulug enenggengge hilaruk lahebon ino nosambil eleg aruhu?”

⁷Paleg angge wereg ulug unubam lombog turuk lahep inap arimano keman wahasa ulug turukmen in amuhupmu hit lagmag irikim itano henenggengge huhulangge hilahup.

⁸O pumbuk anggolowen tohon huhulangge hilaruk latikip angge famen o pumbuk hiren unusurukmu wilip atuson arimanowen hebeloho hit henenggengge huhulangge hilahup. Hiren kinang atogman atogma o pumbuk anggolo ap werehon unubam honolok ane turuk lit unusil laruk latikibon fahet siyahap henebuhup.

⁹Ap unusil laruk lit enengge hilaruk latikibon ariyen hit honori men tung inap atikipteg suwe kut inowen ap lahuk fug teg ambeg ei wiroho wereg hag toho alem ekeyon-ekeyon nunubam aruhu fug ulug hinindi yuwag toho hinibam welahep angge famen siyag amuhup.

¹⁰Hiren tuhuk peruk latikibon ari fahet hit honori men hininggali amuhup. O pumbuk anggolo roho siyahap eneptuk lit hit hininggarehen siyahap taruk lahep.

¹¹Hiren siyag ane turuk latikibon fahet o uwag arimanowen oho huluwap heneptukmu pobolen oho pet heneptuk.

¹²Hiren honolok ane turuk lahebon palimu olun walug ap unusil laruk lit o pumbuk wituk lahebon siyag amuhup!

¹³O pumbuk apmayap eneptuk latikibon arimano henemingmingangge atusareg lisag toho o wituk latusa angge famen saplangge wiri feruk latusa. Wituson obog toho indoken nahu. Obog toho ari NINIKNI Allah pohol ha kinang ha senehon inowen peruk ane hikit toho teko lahu.

¹⁴NINIKNI Allahn ine roho turukmu ap obog tohowen holtuk lamuhupteg inindi onoluk teg ane ariyen saho ahiken kinang keleg teg hag toho kinang atogman atogma keleg teg laruhu.

¹⁵Hit henehummu het-pet teg lit o pumbuk henengginang walinggoho werehon unubam honolok ane turuk latikibon siyag amuhup! Ik olokon hinang usulmu nalusareg nenek turuk lit sum nonggoloho enebiye weregma kilap usul ulug turuk hag toho ap arimano ininggaliyap eneptuk latikip.

¹⁶It tam ininggali haruk latusama ketiya hir oho hininggali hahup. Hiren palimu welahe perukmen apmayap henebuhup. NINIKNI Allahn unusimin ulug ik olokon hinang hisahumu hit nahupteg fuk tik la fuk tik wam turuk lamuhup.

¹⁷E tom Libanon fam werehon obog toho mutuk lit suwe pak oho elehap turuk latikibon fahet alem angginon hunubam aruhu. Hiren kinang atogman atogma o pumbuk anggolo ap werehon unubam honolok ane turuk lit unusil laruk latikibon fahet siyahap henebuhup.

¹⁸Hiren e fam let nenebin uruk lit helep lebe ruruk eleg angge fam oho in amin uruk lahebon siyag amuhup! Aben e men helep men fam laltuk anggeyen ele hiyag hisa reg? E helep laltuk angge fene umbagpag turuk angge emas men perak men altap toho lombog turukon oho sat wereg eleg. Ap ininggiken laltukon arimanowen let enebuk teg? Eleg-o, nori. Laltuk angge arimanowen lal heneptuk. Nininggareg nininggiken turuk latukuk anggeyen fanowap nenebuhu ulug wenggel haruk lahep angge famen ele uruk eleg.

²⁰NINIKNI Allah ibam fanoma weregma ap kinangma welahebon obog toho At olohotman henekol toho henele eleg angge welamuhup!