Read Angguruk Yali HABAKUK 3 Bible Online

HABAKUK 3 - Angguruk Yali bible

HABAKUK 3

¹Allah wene hiyag isaruk ahun nabi Habakuk inowen sembahyang ibahon tu,[2]

²”NIKNI Allah, Haren indam turuk latnahon fahet anden holtuk latikikteg nindi nakol toho welahi. Indam hine roho turuk latnag hag toho ninilen yet hahuken nit nonoluk weregma oho turuk laruhun. Hat hindimu holok haruk lahen angge famen ketiya hindi nisamihin!

³Allah, Hat hebe usa fulu hahun welahenon, kinang Teman[3] famen waharuk lahen. Tom Paran famen wambik waharuk lahen. Hat hebe umbagpag tirikim pohol obog toho seleg tegma kinang obog tohowen wel haptuk.

⁴Pinel lebeglu ruruk lit waharuk lahen. Hat hinggik famen asinandi wilip atikim asinandi sehelimu hine ino hiraho feruk lahen.

⁵Hat halukema ouk alem suwon monde feruk lahenma war atuk ane hombolim waharuk.

⁶Huyuhen kinang soptikim kinang yuk turuk. Haren kinang walinggoho yet harikim o pumbuk obog toho enekolen lagmag uruk. Tom humon indamet angge werehon lilibug toho lin uruk. Punu indameron oho wamburuk. Punu ke indamen tulug ketiya oho Hat laruk lahen.

⁷O Kusyan inap inibam halog-halog larukmu yet haruk lahi. Midian inap olma werehon enekolen unuwag elek-elek angge ruruk.

⁸NIKNI Allah, sa watmin ulug wam kudan lisoho walug laruk angge fam lahalug waharuk lahen? Ik humon fahet holok haruk lit waharuk lahen? Saho ahik fahet hundama het-pet teg lahen?

⁹Hasehen wep toho seneg lit tog sap toho waharuk lahen. Haren kinang pilang teberukmu ik wilip atuk.

¹⁰Tom alma laruk lahenma yuk turuk. Poholman osit humon wambik waharuk. Ik kinang apmon aplohok hum toho uruk lit ik haglabut hik tik lahik waharuk.

¹¹Tog pising turuk lahenma ambulpul ulog-ulog laruk. Fit hik haruk lahenma pinel lebeglu ririkim mo men pikalem men wereg ambeg hirag atuk.

¹²Hat hindi inahan haruk lit o pumbuk obog toho sobit-sabar isil kinang atogman atogma laruk lahen.

¹³An numalikisi onowe suwon Anden mumal tarikikon men windat enebuhuk ulug laruk lahen. Hat men seli reg inap inibam ungga fiyog toho hik isaruk lit olunap feseruk lahen.

¹⁴It arimanowen sehen seneg lit hik-hak nusul ulug siyelu laruk hag toho waharuk. Meneyen pak watug lisoho walug hirahoman na laruk hag toho it inine elehon kililim-kililim lit eneplug lulteg unusul ulug enehiyeg toho waharuk angge famen Haren it inikni fit inggarehen tohon fam haliyogangge ware feseruk lahen.

¹⁵Saho ahik ahum pulmu haglabut watuk ambeg Hat hambohom kuda fam lahalug laruk lahen.

¹⁶Obog toho ari anden yet hihireg nindi nakol haruk lahi. Aplohok arimano hol hihireg nambilik elek-elek angge ruruk. Nuwag eleg ahareg nunu eneg wereg. Nuyug elek-elek angge turuk. An nangno rurukmen eneg nunusul ulug waharuk inap Allahn unusuhu sambil horog aruhu.

¹⁷E ara owil turuk eleg, hele anggur anggen oho uruk eleg. E zaitun anggen tor angge urukon oho mondabi eleg. Yabukmu oho mun angge man angge wereg eleg. Nenembohom domba obog toho war atusama nenembohom sapi oho eleg atisi.

¹⁸Arimano obog toho siyag atisi angge famen Hat NINIKNI Allahn fanowap nabuhun ulug nahiyeg toho welahi.

¹⁹Haren an nineyap naptukmu nuwag ine eleg atisiyon huhubi uwag ine hag toho atuk lahi. Haren hondog naptuk lahenma an punu ke larikim oho heleben nuwatuk eleg,” ibag. Habakuk inowen sembahyang ibahon ari aben pinggong watuk lit sini yunggultuk latfahon fahet uruk.