Read Angguruk Yali ZEFANYA 2 Bible Online

ZEFANYA 2 - Angguruk Yali bible

ZEFANYA 2

¹Hit ap o pumbuk winamon unubabut hag toho wereg lit hininggali eleg toho welahebon, hiren siyag ane turuk latikibon fahet fuki roho wenggel homok!

²NINIKNI Allah undama indok ulog turukmu hunusuhu sambil uwanma At ambeg hebeloho wamuhup! Inggilangge siyeluwen walug laruk hag toho hit longgo uhup tohon!

³Hit hinindi apma roho wereg lit NINIKNI Allahn komo nenepfag ane hikit toho turuk lahebon, NINIKNI Allah alukema wamuhup! Hit hininggareg apmayap taruk lit Allahn fano perukon eneg turuk lamuhup halug NINIKNI Allahn olok hahu sambil ino windat henebuhu lit teg.

⁴O Gaza pumbukmu ap enele teng uhupmu o Askelon lekma hag aruhu. O Asdod inap arimano mo anum pulmu la fugmu ap seliyonen yanggal enebuhupteg o Ekron inap oho inibamen wili fusuhup.

⁵Hit Filistin hinap ik ahum suwon ayegma welahebon siyag amuhup. NINIKNI Allahn hit hunubahet ele uruk lit, ”Anden hit obog toho elehap henebuhukmu ap misig oho welaruhu fug,” uruk.

⁶Hit henengginang ik ayegma werehon ino wam foroho ambeg aruhumu wam iniknisiyen ik fahet kinang habultuk lamuhup.

⁷Henengginang ino o Yehuda inap tor angge welamuhubon ngi amuhupmu enembohom foroho lit o Askelon inap inibam nohoruk lamuhup. INIKNI Allahn it fahet wenggel isaruk lit nin hebeloho fanowap enebuhu.

⁸ NINIKNI Allahn ele uruk lit, ”O Moab inap men Amon inap menen enele hemet toho uruk lit, ’Yehuda inap enengginang ilmig tahuk,’ ulug An numalikisi ininggaliyap eneptukmu Anden hol isarikik.

⁹Ari fahet An Israel inap INIKNI Allah noluk wereg lit pohol ha kinang ha seneg lahiyonen nele tem toho uruk lahiyon tu: O Moab kinang men Amon kinang men tam o Sodom Gomora siyag atfag hag toho mondabi lekma hag aruhumu saho eneg werehen kinang obog toho yaweyen hondo reg laruhu. An numalikisi we tor angge onoluk welamuhubon arimanowen o Moab inap men Amon inap men enenggengge huhulangge hilahupteg enengginang ilmig tahup.

¹⁰Moab inap men Amon inap menen inindimu winik-wonog uruk lit An HINIKNI Allah pohol ha kinang ha seneg lahiyon numalikisi ininggaliyap eneptuk latusa ane fahet alem ari unubam aruhu,” uruk.

¹¹NINIKNI Allahn Moab inap men Amon inap men enekolap enebuhureg kinang atogman atogma tu Allah hag toho wereg ulug wel eneptuk angge obog toho eleha fusuhu. Eleha fusuhumu ap o pumbuk kema-kema werehon wal taneg inibamen NINIKNI Allah wel turuk lamuhup.

¹² NINIKNI Allahn ele uruk lit, ”Hit Etiopia hinap oho karog Anden tohon fam hunusuhuk,” uruk.

¹³Allah inggik ineyon ik eleruk fil leho felug o Asyur kinang siyahap turuk lit o pumbuk suwon Niniwe pin halog toho unusuhumu lekma hag aruhu.

¹⁴Lekma hag aruhu ambeg ino wam pak mene luhal atuk lamuhup. Suwe kohoniyen o halog tuhubon sehelimu ei wirigmu siyo-mayo inowen keyenteg ele keyen ele uruk laruhu. E sahi o undama lombog toho wirihon halog toho wamburuk lit kembilik hondo ruhu.

¹⁵Ap o pumbuk ari fam inindi yuk tuk fug angge enehiyeg toho yunggultukmen alem ari unubam aruhu. It inindimuwen, ”Nit men wirim tohon wereg eleg,” perukmen lekma hag aruhumu wam pak mene luhaloho welamuhup. Ari roho tuhumu ap o ino iraham ke larukon enekolen unum yinggiloho laruk lit wasubag sup isalug laruk lamuhup.