Read Angguruk Yali HAGAI 1 Bible Online

HAGAI 1 - Angguruk Yali bible

HAGAI 1

¹Hun Darius o Persia inap onowe suwon weregman mo piren libagma pikalem falfalikon ket inam atfag sambil ino NINIKNI Allahn amingmingangge nabi Hagai feneyen kinang Yehuda seneg ahun Zerubabel hun Sealtiel amloho ino men Allah ibam foroho inap onowe Yosua hun Yozadak amloho men ele hiyag isibag.

²O ino sambil NINIKNI Allah pohol ha kinang ha senehon inowen Hagai ubam ele ibahon tu, ”Ap kinang tu fam werehonen enele uruk lit, ’NINIKNI Allah ibam hebeloho wituk li uwan lahe,’ uruk,” ibag.

³Ibag ane ino hikit toho nabi Hagai inowen ap obog toho hiyag isaruk lit,

⁴”Hit hinibam fano wiroho welahep angge famen nungge fahet Allah ibam halog toho lin isibahon aru wibuk fug angge welahep?

⁵Ari fahet NINIKNI Allah pohol ha kinang ha senehon inowen ele urukon tu holeg lamek: Hit hunubam teko larukon fahet fuki roho wenggel homok!

⁶Hiren suburu ei anggolo yatuk lahep angge famen we tor angge yahal taruk lahep. Suburu naruk lahep angge famen henehum atuk eleg. Ik naruk lahep angge famen hunubam atuk eleg. Henesum wan turuk lahep angge famen henebe inahan toho welahep fug. Ap enemingmingangge roho wereg lit iniyabuk wit isaruk lahep angge famen onggo hilaruk lahebon arimano sum kiriribon fam fani ruruk lahepma wamburuk lit longgo uruk.

⁷Ari fahet hiren turuk lahep ane wenggel haruk lamuhuben An pohol ha kinang ha seneg lahiyonen uruk lahi.

⁸Tom fam lahalug e muko walug wamuhupteg An nibam hebeloho wiri fuhup. Witukmu yet hisahukteg An nunuk palimuwap naptuk ulug fano peruk laruhuk.

⁹Hiren te yatukukon anggen anggolo wilip aruhu perikip angge famen we tor angge eneg wilip atisi. Anggen we tor angge arimano paloho hinibam walug waharikipmu An nambilik ahe fu isarikikmu longgo irisi. Nungge fahet alem ari teko larisi? ulug An HINIKNI Allah pohol ha kinang ha seneg lahiyonen kapal hisaruk lahi. An nibam halog toho lin isibahon ino embeselug hininggareg hinibam eneg wit taruk lahep.

¹⁰Ari fahet poholman hibilil wambik waharuk elegma kinangman nungge-nungge wilip atuk latisi fug.

¹¹Anden osit pilabik waharikik fugmu kinanget tomet lilog atuk lit roti anggen men anggur anggen men e zaitun ahaluwe men kinangman wilip atuk angge obog toho ilim atusa. Ilim atusama abet wamet ap ininggiken turuk latusa anggeyet siyag atusa,” ulug hiyag isibag.

¹²Hiyag isibagma hun Zerubabel men Yosua men Yehuda inap we tor angge o Babilonia kinangman suhuloho watfahon arimanowen hol hibareg nit NINIKNI Allahn amingmingangge Hagai aru nenembeg monde fik waharuk lit ele hiyag nesehekon hikit toho turuk lamuhuk pibareg NINIKNI Allah fahet enekol hibag.

¹³Enekol hibagma nabi Hagai inowen Allahn hiyag itfag ane hikit toho ap arimano hiyag isaruk lit, ”An hit men welaruhuk ulug NINIKNI Allahn ele uruk,” ibag.

¹⁴Ari ibagma NINIKNI Allahn Yehuda kinang seneg ahun Zerubabel ino men Allah ibam foroho inap onowe Yosua men ap we tor angge o Babilonia kinangman suhuloho watfahon arimano men inineyap eneptukmu it INIKNI Allah pohol ha kinang ha senehon ibam hebeloho wituk latfag.