Read Angguruk Yali HAGAI 2 Bible Online

HAGAI 2 - Angguruk Yali bible

HAGAI 2

¹Wituk ane ari hun Darius o Persia inap onowe suwon weregman mo piren libagma pikalem falfalikon fam hup uhaneg fimag atfag sambil ino ak tibag. Hun Darius o Persia inap onowe suwon lahibag li mo piren libagma

²pikalem sabiron fam hup sabit fimag atfag sambil NINIKNI Allahn nabi Hagai feneyen ele uruk lit,

³”Kinang Yehuda seneg ahun Zerubabel hun Sealtiel amloho ino men Allah ibam foroho inap onowe Yosua hun Yozadak amloho men Yehuda inap we tor angge o Babilonia kinangman suhuloho waharuson men hiyag isamihinon tu:

⁴Allah ibam aru uwan halog tuk fugmu fano anggolo roho wirigmu ap san yet harikip? Ketiya ke roho weregma yet haruk lahep? We tem toho fano reg elehen

⁵ketiya hit Zerubabel men Yosua men Yehuda hinap obog toho hinindi wirik toho wereg lit o aru hinine roho wituk lamek! ulug An HINIKNI Allahn uruk lahi. An pohol ha kinang ha seneg lahiyon ino hit men welaruhuk.

⁶Hit o Mesir kinangman wilip atukmu Anden hit hunubam sali imbiyahon hikit toho An nahime hit sehelimu weregman eneg welaruhu. Ari fahet hit henekol haruk lamuhup fug.

⁷An HINIKNI Allah pohol ha kinang ha seneg lahiyonen nele uruk lahiyon tu: Anden poholet kinanget ik ahum suwonet yuk tuhukon horog teg.

⁸Horog aruhumu Anden ap o pumbuk obog toho hebel-pebel isahukmu fano-fano angge iren tohon walug An nibam imbik waharukmen eneg keleg aruhu. Ari hag toho turuk lit An nibam aru fanowap tuhuk ulug An HINIKNI Allah pohol ha kinang ha seneg lahiyonen uruk lahi.

⁹Umbagpag turuk angge perak men emas men obog toho An ngi reg lahi.

¹⁰O aru indam fano anggolo wirig latisi angge famen fobik mondabi fano aruhumu An o aru wereg lit hit let heneptukmu fano roho welamuhup ulug An HINIKNI Allah pohol ha kinang ha seneg lahiyonen uruk lahi.

¹¹Hun Darius o Persia inap onowe suwon lahibag li mo piren libagma pikalem sohowon fam hup uhaneg fimahen atfag sambil ino NINIKNI Allah pohol ha kinang ha senehon inowen nabi Hagai ubam ele uruk lit, ”Aben tuk teg ane fahet An namingmingangge imam kapal isamihinon tu:

¹³Ap ekeyen wam unu Allah fahet emberukon sum fam fani roho walug larukmen sum ino fam suburu men osoho angge winon men hele anggur ahaluwe men e zaitun ahaluwe men naruk angge winon men tung turuk halug nungge-nungge sum ino fam tung turukon arimano usa aruhu ano?” ulug hiyag itfag ane ino hikit toho kapal isibagma imam arimanowen, ”Usa aruhu fug,” ibag.

¹⁴Ibagma Hagai inowen nin eke it unubam ele uruk lit, ”Ap warehon senetukon ekeyen nungge-nungge tung turuk halug tung turuk angge arimano siyag angge unubam tag aruhu ano?” ulug kapal isibagma iren te, ”Siyag angge enebene tag aruhu,” ibag.

¹⁵Ari ibagma Hagai inowen ele uruk lit, ”NINIKNI Allahn ele urukon tu: Ap aruma An men hili roho werehen An nilmu ap warehon senetukon hag toho wereg. Siyag angge unubam tag tehen mun ane man ane ininggiken turuk aneyet An nubahet imbik emberukonet siyag aruhu,” ibag.

¹⁶Ari ibareg Hagai inowen nin ele uruk lit, ”NINIKNI Allahn ele urukon tu: O yoho tu famen hit hunubam teko lahu ane fuki roho yet haruk lamuhup! An nibam hebeloho wituk ane ak tuk fugmu

¹⁷hit ke roho welatikip? Ap ekeyen roti anggen sum teng misig palik lamin ulug iyabukmu larisi angge famen we tor angge eneg werehen sum numen eneg paloho walug waharisi. Ap ekeyen hele anggur ahaluwe kubag teng piren wak lamin ulug iyabukmu larisi angge famen kubag teng misig eneg walug waharisi.

¹⁸Anden suburu inggila siyag kurukon men foloyen hom ebe narukon men osit helep anggen hahon men monde fik waharuk lit hininggiken turuk latikibon obog toho siyaha feseruk latikik angge famen hit An nambeg hebeloho waharikip fug ulug An HINIKNI Allahn uruk lahi.

¹⁹O yoho pikalem sohowon fam hup uhaneg fimahen aha sambil tu An nibam anduli obog toho hutuk tebehep. O yoho tu famen hit hunubam teko lahu ane fuki roho kim haruk lamuhup!

²⁰Ketiya anggen fok turukon hinibam foroho lahep fug. Hele anggur men e zaitun men sawe men e anggen narukon winonen oho anggen uruk eleg angge famen o yoho tu famen Anden hit nindi hisaruk lit naruk angge anggolo og hisaruk laruhuk ehek,” ulug hiyag isibag.

²¹Hup uhaneg fimahen atfag sambil ino NINIKNI Allahn inggik pireneg angge Hagai hiyag utuk lit,

²²”Yehuda kinang seneg ahun Zerubabel hiyag itmihinon tu: NINIKNI Allahn ele uruk lit, ’Anden pohol ha kinang ha yuk isaruk lit

²³ap suwon o pumbuk kema-kema werehon arimano pilap enebuhuk. Enembohom kudan lisoho walug laruk angge kereta arimanowet ap emberimu larukonet Anden hebel isahukmu wam arimano fuk toho ying atuk lit war atukmu ap arimano it-it wat-war amuhup.

²⁴O ino sambil hat Zerubabel An namingmingangge welahenon sohomangge ninggikmu kilabehon hag toho welaruhunen lahap habuhukmu Anden teko lahu peruk lahiyon hine roho turuk laruhun. Hat Anden mumal haptikikon welahen ulug An HIKNI Allah pohol ha kinang ha seneg lahiyonen uruk lahi imihin,” ulug hiyag itfag.