Read Angguruk Yali ZAKHARIA 1 Bible Online

ZAKHARIA 1 - Angguruk Yali bible

ZAKHARIA 1

¹Hun Darius ino o Persia inap onowe lahibahon mo pirenehon fam pikalem likinon inam atfagma NINIKNI Allahn amingmingangge nabi Zakharia hun Ido inowen endetfahon Berekhya amloho ubam ele uruk lit,

²”Haren hori hiyag isamihinon tu: NINIKNI Allah pohol ha kinang ha senehon inowen ele urukon tu holeg lamek! Anden hit hunumbasi fahet nolok anggolo haruk latik iyag angge famen ketiya hit An nambeg hebeloho wamuhupmu Anden hebeloho let heneptuk laruhuk ulug An HINIKNI Allah pohol ha kinang ha seneg lahiyonen uruk lahi.

⁴Hit hunumbasi unubabut siyag toho welatfag hag toho hir oho welamuhup fug. It unubam An namingmingangge nabi tam welatfahon arimanowen enele uruk lit, ’NINIKNI Allah pohol ha kinang ha senehon inowen ele urukon tu holeg lamek: Hit un ke laruk lit siyag ane turuk lahebon ari imbisiyek!’ ulug hiyag isaruk latfag angge famen hunumbasiyen An nele holtuk latfag fug.

⁵Ketiya hunumbasi arimano kema wereg? Iret nabi wene hiyag isaruk latfahonet war atuk latfag angge famen

⁶An nele sobir isarukon arimano siyag amuhup ulug namingmingangge nabi feneyen komo eneptuk latik iyag ane arimano hikir atfag. Hikir atukmu yet halug hunumbasi An nambeg hebeloho waharuk lit, ’NINIKNI Allah pohol ha kinang ha senehon inowen nit nunubam tuhuk pibag ane hikit toho turuk lit niren siyag ane turuk latukukon fahet alem arimano nunubam emberisi,’ uruk latfag,” ibag.

⁷Hun Darius ino o Persia inap onowe lahibahon mo pirenehon fam pikalem nanggolobon unuk Shebat inam atfagma hup uhaneg fimahen atfag sambil ino NINIKNI Allahn amingmingangge nabi Zakharia hun Ido inowen endetfahon Berekhya amloho ubam ele ibag. Ibag ane ari fahet Zakharia inggarehen ele ibahon tuma hahareg:

⁸Yoho hubanggo anden fulu roho yet harukmen ap eke wam kuda oruk huluwon emberimu lahalug waharukmu yet hihi. Wam ino emberimu heriyeg lit tonggoma e owil fano urukon alma lahareg in aha. Wam ino ombolim wam kuda winon wal taneg onoruk huluwon men ip orohole hahon men yanggowon men wahasa.

⁹Wahasama Allah amingmingangge malaikat mun ane man ane seleg toho hiyag nutukon eke an niraham weregma anden at kapal haruk lit, ”Nikni, wam kuda aruma nungge fahet wahasa?” ihi. Ihimu aren, ”Nungge fahet wahasa ulug unug hitmin,” ehek.

¹⁰Ari ehekma e arimano alma unduhuk laha ahun inowen ele uruk lit, ”Nit waheyon aruma NINIKNI Allahn kinang atogman atogma aluwat ha lalihip ulug mon nenebehekma wahe,” ehek.

¹¹Ehekma wam winon enemberimu heriyeg inap arimanowen NINIKNI Allahn monde fehekon malaikat e alma unduhukon ino ubam hiyag utuk lit, ”Nit kinang atogman atogma aluwat hil larukmen ap obog toho inindi yuwag toho weregma yet esehereg wahe,” ehesa.

¹²Ehesama NINIKNI Allahn monde fehekon malaikat inowen ele uruk lit, ”NIKNI Allah pohol ha kinang ha seneg lahenon, Haren o Yerusalem men Yehuda pumbuk arimano men unubahet holok toho weregman eneg mo ilig am wirig am turukmen teng hinahan 70 atisi angge re noenam welamuhukmu Haren hebeloho hindi enesug laruhun?” ehek.

¹³Ehekma NINIKNI Allahn malaikat mun ane man ane seleg toho hiyag nutukon ubam ele fano uruk lit indi yuwahap tehek.

¹⁴Yuwahap tehekma malaikat inowen an hiyag nutuk lit, ”Hele hi roho ap hiyag isamihinon tu: NINIKNI Allah pohol ha kinang ha senehon inowen ele uruk lit, ’O Yerusalem men nantom Sion men nindi anggen teg lit nindimu sig hute naptuk angge famen

¹⁵ap o pumbuk kema-kema wereg lit inindi yuwag toho werehon arimano fahet nolok anggolo haruk lahi. Anden ap o pumbuk arimano hiyag isaruk lit numalikisi fahet we tot nolok haruk lahi angge re hiren we tot enele ying enebuhup ulug mingming eneptikik angge famen iren An numalikisi unubam onolok toho turuk lit siyahap eneptusa.

¹⁶Ari fahet An HINIKNI Allah pohol ha kinang ha seneg lahiyonen uruk lahiyon tu: Anden o Yerusalem hebeloho nindi haruk laruhukmu An nibamet ap inibamet hebeloho wiri fuhup,’ ulug ap hiyag isamihin.

¹⁷Hiyag isamihinteg nin hele hi roho hiyag isamihinon tu: NINIKNI Allah pohol ha kinang ha senehon inowen ele urukon tu holeg lamek: ’Anden nin eke o pumbuk Yerusalem mumal tahukteg numalikisi nantom Sion fam werehon arimano hebeloho let eneptuk laruhukmu o pumbuk Anden tohon arimano mun angge man angge fanowon keleg toho welaruhu,’ imihin,” ulug malaikat inowen hiyag nerehek.

¹⁸Anden nin eke fulu roho yet harukmen wam sapi andimbuk uhan weregma yet hihi.

¹⁹Yet hihireg malaikat mun ane man ane seleg toho hiyag nutukon ino ubam, ”Andimbuk aruma nungge fahet wereg?” ulug kapal hihi. Kapal hihimu aren hiyag nutuk lit, ”Andimbuk aruma ap seliyon o Yehuda inap men Israel inap men Yerusalem inap men apmayap eneptuk lit o kema-kema hik-hak isaruson wereg,” ehek.

²⁰Ari ehekma NINIKNI Allahn ap uhan helep simbuk teltuk angge ininggikmu seneg lit werehon unug nerehek.

²¹Unug nerehekma anden At ubam, ”Nungge tul ulug wahasa?” ulug kapal hihimu Allahn hiyag nutuk lit, ”Ap seliyonen Yehuda inap hik-hak isarusama enembol simbuk toho weregman it uhan aruma wamuhupteg ap seliyon enendimbuk uhan werehon arimano kong tebeselug lilibug-lalabug toho siyahap enebuhup,” ulug hiyag nerehek.