Read Angguruk Yali ZAKHARIA 11 Bible Online

ZAKHARIA 11 - Angguruk Yali bible

ZAKHARIA 11

¹Tom Libanon welahenon, e sahi haren tohon indoken nawag ulug sok husi fin!

²E sahi ineyon mako wamburusa ulug e mur arimanowen fong watuk lamag! E ohi humon siyeluwen tukum-takam toho lin isarisimu e suwon o Basan kinangma werehonen uba yatuk lamag!

³Hol hemek! Wam fet talug inaben nenembohom foroho latukuk ambeg fanoma lekma hag atisi ulug uba yatuk. Holeg lamok! Olomene ik Yordan ayegman nibam ohimu welatikik ambeg ino siyag atisi ulug ele kuwa ruruk.

⁴NIKNI Allah anden wel turuk lahiyon inowen an nubam ele uruk lit, ”Wam aben unusuhuk perukon arimano haren fet enesug laruhun!

⁵Wam arimano iniknisiyen unusuruk angge famen unusurukon fahet siyag ane turuk lahe peruk eleg. Wam warehon ununu aben ayeg waroho warukmu enele hemet toho uruk lit, ’Onggo anggolo nininggikmu ahama NINIKNI Allah wel turuk lahe,’ uruk. Enemingmingangge wam arimano fet enesuhonen oho it fahet inindi isaruk eleg.

⁶Ari hag toho Anden oho ap kinang tu fam werehon arimano nindi enesug laruhuk fug ulug An HINIKNI Allahn uruk lahi. It-it wat-war atuk lamag ulug onori men onowesi men ininggikmu umbuhuk. Umbuhukmu iren kinang aru obog toho siyahap turuk lamuhup. Siyahap turukmu Anden ap misig oho ininggikmuwen windat enebuhuk fug,” ulug hiyag nitisi.

⁷Hiyag nitisi ane hikit toho wam ayeg waroho hilaruk inaben an mingming naptukmu wam iren unusuhuk perukon arimano fet enesug latikik. Fet enesug laruhuk ulug wanggun piren warikikteg misig ino unuk Nindiyen, pirenehon ino Mangno rohon ulug suwaltikik. Wanggun piren itano seneg lit wam arimano fet enesug latikik.

⁸Fet enesugmen eneg pikalem pirenehon uwan inam am fugmu notsi wam ambiyeg foroho latukukon enebe hinahan itano unubam, ”Wam foroho ane umbusuhup,” ulug yanggaloho wilip eneptikik.[5] Wilip eneptikikteg weregma wam arimanowen an nele ying naptukmen eneg nahum ke het atisimu

⁹anden hiyag isaruk lit, ”Hit fet henesug lahi ane umbusuhuk. War am hahon arimano war amag, siyag am hahon siyag amag, honoluk welamuhubon wat-war atuk lit honori ununu naruk lamuhup,” irikik.

¹⁰Ari irikikteg NINIKNI Allahn Israel inap obog toho men nininggik ahandip toho welamuhuk ulug sali imbibahon eleg aruhu ulug wanggun unuk Nindiyen suwaltikikon ino warikikteg fala rebeserikik.

¹¹Fala rurukmu itano Allahn sali imbibahon ino eleg atisi. Anden ari roho turukmu wam ayeg waroho hilaruk inaben yet niyarusareg NINIKNI Allahn hiyag itisi ane roho tehek ulug onoluk atisi.

¹²Onoluk atisimu anden hiyag isaruk lit, ”Hiren fano pelihip halug yabuk anden wit hisaruk latikikon fahet onggo og nitlihip. Og umul fug pelihip halug oho fano,” irikikmu iren uang perak anggen we teng misigmen nubam hilag hinahan 30 eneg og nutusa.

¹³Og nutusama NINIKNI Allahn an hiyag nutuk lit, ”Ap arimano inindimuwen hun aru Allah amingmingangge wereg angge re uang tor angge eneg og utuk lahe ulug wenggel haruk lit An ninggaliyap nabehesa. Ari fahet uang hum-ham toho og hereheson ari walug An nibam fano-fano angge foroho ambeg[6] imbik lamihin,” ulug hiyag nitisi. Hiyag nitisi ane hikit toho anden uang perak anggen teng misigmen nubam hilag hinahan itano walug Allah ibam fano-fano angge foroho ambeg imbik larikik.

¹⁴Imbik larikikteg o Yehuda inap men Israel inap men mangno roho wereg ane eleg aruhu ulug wanggun pirenehon unuk Mangno roho suwaltikikon ino oho warikikteg fala rebeserikik.

¹⁵Fala rebeserikikmu NINIKNI Allahn nin eke an nubam ele uruk lit, ”Misihim eke wam foroho inaben wan turuk angge wan teg lit ap indi sohu roho werehonen turuk hag toho turuk laruhun.

¹⁶Hol himin! Anden kinang tu famen wam foroho ahun tuk fug teg ane turukon eke unduhuk fuhuk. At inowen wam siyag am hahon kim isa fug angge longgo urukon arimano yami enebik laruk laruhu fug. Yowil angge unubam werehon tag angge eneptuk lit enebe fanowon arimano suburu og isaruk laruhu fug angge famen unuyug ahap keleg toho hik isaruk lit wam seiyon ununu naruk laruhu.

¹⁷Wam foroho ahun ubabut siyahon ino siyag amag! Ambohom embeselug laruk ane fahet inggik paloho il pikiron hililoho hik isahupmu il hupnig lit ine mondabi eleg aruhu,” irisi.