Read Angguruk Yali ZAKHARIA 2 Bible Online

ZAKHARIA 2 - Angguruk Yali bible

ZAKHARIA 2

¹Anden fulu roho yet harukmen ap hele o wituk inaben wirim turukon inggikmu senegma yet hihi.

²Yet hihireg anden, ”Kema laruk lahen?” ulug kapal hihimu aren hiyag nutuk lit, ”An o Yerusalem laminteg o pumbuk ino hebeloho wiri fuhup ulug yat toho wirim tuhubon men horog toho wirim tuhubon men wirim hamin,” ulug hiyag nerehek.

³Hiyag nutukmu itano malaikat mun ane man ane seleg toho hiyag nutukon ino an nirahamen we tot hikip toho lahama malaikat eke ambeg waha.

⁴Wahama malaikat hikip toho lahawon inowen hiyag utuk lit, ”Folo-folo lamihinteg ap kabiniyon hele inggikmu senehon ino hiyag utuk lit, ’Abet wamet anggolo amuhupteg o Yerusalem ino keleg uhup tohon ulug elehet o pumbuk huk toho kilabehon wahup fug.

⁵Wahup fugmu NINIKNI Allah indok ambulpul turuk hag toho turuk lit o Yerusalem fahet elehet hag toho welaruhu. At umbagpag turukon o ino sehelimu welaruhu,’ imihin,” ehek.

⁶NINIKNI Allahn umalikisi unubam ele uruk lit, ”Anden hit o kema-kema yali fil, hubula fil, ik eleruk fil, ik ambut fil hik-hak hisarik iyag angge famen ketiya hik hisarik iyag ambeg o Babilonia kinang ino embeselug folo-folo o Yerusalem An nantom Sion fam wamuhup,” uruk.

⁸NINIKNI Allah pohol ha kinang ha seneg ahun unuk palimu werehon an mon naptisiyon inowen ap seliyon hit henenggengge huhulangge hilaruson fahet ele uruk lit, ”Ap san hit hunusuruk halug An nilanggen siyahap naptukon hag toho wereg.

⁹Weregma An ninggik ineyonen it apmayap enebuhukmu ap iren mingming eneptuson arimanowen enenggengge obog toho yoholiyangge hilahup. Ari obog toho teko larukmu yet hahupteg NINIKNI Allah pohol ha kinang ha senehon inowen an henembeg mon naptisi angge re honoluk aruhu.

¹⁰Hit Yerusalem hinap, An waruhukteg hit sehelimu An nibam ino welaruhuk. Ari fahet henehiyehen henele hi roho yunggultuk lamek! ulug An HINIKNI Allahn nele uruk lahi.

¹¹Ari teko lahu li ap o pumbuk anggolo NINIKNI Allah apma welamuhuk ulug nambeg wamuhupteg An numalikisi amuhupmu An hit sehelimu welaruhuk,” uruk. Ari teko larukmu yet hahupteg NINIKNI Allah pohol ha kinang ha senehon inowen an henembeg mon naptisi angge re honoluk aruhu.

¹²NINIKNI Allahn angginang winon sehelimu o Yehuda kinang eneg indi pulmu emberuk lit nin hebeloho o pumbuk Yerusalem ino mumal tahu.

¹³Hit honoluk welahebon obog tohowen henele uk fug angge welamok! NINIKNI Allah ibamen wilip arik waharuk!