Read Angguruk Yali ZAKHARIA 3 Bible Online

ZAKHARIA 3 - Angguruk Yali bible

ZAKHARIA 3

¹ NINIKNI Allahn nin eke an nil fenggen nabehekma anden yet harukmen Allah amingmingangge imam onowe suwon Yosua NINIKNI Allahn monde fehekon malaikat ino alukema unduhukmu Iblis inggik pikit fil wereg lit suwahal ubam urukmu yet isihi.

²Yet isarukmen NINIKNI Allahn Iblis ubam ele uruk lit, ”An o pumbuk Yerusalem nindi reg lahiyonen hat hubam hele imbisin ulug komo yig hutuk lahi. Hun aru e indoken narukmu ambiyang lisoho warukon hag toho wereg,” ehek.

³Ehekma Yosua ino sum sing angge tag tehon wan teg lit malaikat olohotma unduhukmu

⁴malaikat inowen otsi hiyag isaruk lit, ”Sum sing angge tag tehon aru nonggole felihip,” ehekteg Yosua hiyag utuk lit, ”Siyag ane haren turuk latikinon anden waruk lit elehap tihireg sum keron fanowon wan hapmin,” ehek.

⁵Ehekteg otsi hiyag isaruk lit, ”Unggul asum sing angge tag teg elehon eke langguk tibiyek,” ulug hiyag esehek ane hikit toho tehesareg malaikat ino iline sum keron fanowon wan tebehesa.

⁶Wan tebehesama malaikat inowen Yosua ubam sali emberuk lit,

⁷”NINIKNI Allah pohol ha kinang ha senehon inowen ele urukon tu holeg lamin: Haren kalem Anden hiyag hutuk lahiyon laruk lit tu men ari men turuk laruhun irikik ane hikit toho turuk laruhun halug hat An nibamet elehet huk toho kilabeg ambehet foroho laruhunen hiyag huruhuk. Ari ulug hiyag hutuk lit Anden sok hut habuhukmu hat An notsi tuma unduhukon sehelimu kuk wilip am turuk laruhun.

⁸Holeg lamin! An namingmingangge unuk Ahanuk Fanowon ino monde fik waruhukon fahet hat Yosua imam onowe welahenon men hotsi men enehangge welamuhup.

⁹Ari fahet helep ilanggen sabiren werehon eke hat holohotma emberuk lahi. Helep ino fene An HINIKNI Allah pohol ha kinang ha seneg lahiyonen tuhuk peruk lahiyon eke haharoho embemin. Haharoho embemin ane ari hikit toho Anden siyag ane ap kinang tu fam werehonen turuk latuson obog toho misihim eneg elehap tuhuk.

¹⁰Elehap tuhuk sambil ino hit hinindi yuwag toho wereg lit wal tanehen honori wol enebuhupmu wamuhupteg hit men ambiyeg hele anggur men e sawe men alma heriyeg lamuhup ulug NINIKNI Allah pohol ha kinang ha senehonen ele uruk,” ehek.