Read Angguruk Yali ZAKHARIA 4 Bible Online

ZAKHARIA 4 - Angguruk Yali bible

ZAKHARIA 4

¹Malaikat mun ane man ane seleg toho hiyag nutukon ino nin hebeloho nambeg wahareg ap nohorukmu aben elel eneptuk hag toho elel nabehekteg,

²”Haren nungge yet haruk lahen?” ulug kapal neyehek. Kapal neyehekma anden hiyag utuk lit, ”Iral emberuk ambeg emas umbagpag turukon fam wirihon eke yet haruk lahi. Iral emberuk ambeg palimu kou e zaitun ahaluwe hinanggohon fam iral sabiren topno roho wereg. Iral sabiren wal taneg e zaitun ahaluwe sul toho kilaptukon wereg.

³Iral ino fuma-fuma e zaitun piren unduhukmu yet haruk lahi,”

⁴ihireg, ”Nikni, iral aru men e piren aruma men alem nungge fahet enehangge wereg?” ulug kapal hihi.

⁵Kapal hihimu malaikat inowen, ”Hat hapeleg ano?” ehekma anden, ”Yu, napeleg,” ihi.

⁶Ari ihimu aren hiyag nutuk lit, ”NINIKNI Allah pohol ha kinang ha senehon inowen hun Zerubabel fahet urukon tu holmihinteg hiyag irik lamihin: Haren tuhuk peruk lahenon ap inine men sehen ineyon men fam hikir aruhu fug angge famen An nahime famen eneg hikir aruhu.

⁷Hat hele ying haptuk lamuhubon arimano tom yaron hag toho welamuhup angge famen Anden tom ino apmayap tuhukmu tonggo aruhu. Tonggo aruhumu haren An nibam hebeloho wiri feruk lit helep obog-obohon imbik lahakun. Imbik laharukmu itano ap enehiyehen enele hi roho fano, fano uruk lamuhup,” ehek.

⁸Ari ehekma NINIKNI Allahn nin eke ele nubam uruk lit,

⁹”Hun Zerubabel inowen Allah ibam wiruhuk ulug helep ubule yaho ferisi angge re helep obog-obohon oho imbik lahaku. Ari hag toho turukmu An numalikisiyen yet hahupteg An HINIKNI Allah pohol ha kinang ha seneg lahiyonen hat enembeg mon haptikikon fahet onoluk aruhu.

¹⁰Ketiya Allah ibam hebeloho witukmu aben yet haruk lit ket eneg ak turusareg tor angge wiri ferusa ulug inindi siyag atuk angge famen fobik Zerubabel inowen helep obog-obohon ino inggikmu senegma yet hahupteg enehiyeg haruk lamuhup,” ehek. Ehekma malaikat inowen anden fulu roho yet hihi ane fahet hiyag nutuk lit, ”Iral sabiren itano NINIKNI Allah ilanggen wereg. Il sabiren itanowen mun ane man ane kinangma teko laruk ane yet haruk,” ulug hiyag nerehek.

¹¹Hiyag nerehekma anden kapal haruk lit, ”Iral ino fuma-fuma e zaitun piren unduhukon itano alem nungge fahet enehangge wereg?” ulug kapal hihireg

¹²nin kapal haruk lit, ”E zaitun inggik piren famen e ahaluwe sul toho kilaptuk angge emas fam wirihon feneyen kou iral palimu werehon elma wamburukon itano alem nungge fahet enehangge wereg?” ulug kapal hihi.

¹³Kapal hihimu aren, ”Hapeleg ano?” ehekma anden, ”Nikni, an napeleg,” ihi.

¹⁴Ihimu malaikat inowen hiyag nutuk lit, ”It piren itano NINIKNI Allah kinang obog toho seneg ahun inowen An namingmingangge welamuhup ulug mumal eneptisiyon e zaitun ahaluwe ununggulmu hilil eneptuson wereg,” ehek.