Read Angguruk Yali ZAKHARIA 7 Bible Online

ZAKHARIA 7 - Angguruk Yali bible

ZAKHARIA 7

¹Hun Darius ino o Persia inap onowe lahibahon mo uhanehon fam pikalem sohowon unuk Kislew inam atfagma hup uhanam atfag sambil ino NINIKNI Allahn hun Zakharia ubam ele ibag. Ele ibag ane ari fahet Zakharia inowen ele ibahon tu:

²O ino sambil o Betel inap arimanowen hun Sarezer men Regem-Melekh otsi men NINIKNI Allahn hindi nisamihin ulug sembahyang ilihiben o Yerusalem lalihip ulug mon eneptusama waharusa.

³Waharusareg NINIKNI Allah pohol ha kinang ha senehon ibam lalug Allah amingmingangge imam men nabi men kapal isaruk lit, ”Mo ilig am wirig am turukmen pikalem fuwabon inam atukmu niren subangge roho ninindi siyahen uba yatuk lit suburu na fug angge hiyang wereg latukuk hag toho[1] nin fobik ari hag toho turuk lamuhuk ano?” ulug kapal isarusa.

⁴Kapal isarusama NINIKNI Allah pohol ha kinang ha senehon inowen an nubam ele uruk lit,

⁵”Yehuda inap men imam aruma men hiyag isamihinon tu: Pikalem uhanehon men sabiron men[2] inam atukmu hiren piya sini uruk lit hiyang welahebon ari subangge roho turukmen eneg mo ilig am wirig am turukmu teng hinahan 70 atisi. Ari roho turuk latikibon ari An nubahet turuk latikip ano?

⁶Hiren ik men suburu men naruk latikip halug oho hit hininggareg fahet eneg naruk latikip,” irisi.

⁷Irisi ane ari hikit toho NINIKNI Allahn amingmingangge nabi tam welatfahon feneyen oho ele uruk latfag. O itano li o Yerusalem men o pumbuk walinggoho werehon men ap enebe anggolo wereg lit inindi yuwag toho weregma ik ambutmu oho punumu oho ap wereg latfag.

⁸Ari roho welatfag li NINIKNI Allahn hit hunumbasi hiyag isaruk latfag ane ari fahet At inggarehen an hiyag nutuk lit,

⁹”An pohol ha kinang ha seneg lahiyonen indam oho uruk latik iyahon tu: Hit hinindi wirik toho wereg lit alem obog toho fano haltuk lamuhup. Hit-hit hinindi roho wereg lit let-ler atuk lamuhup.

¹⁰Hiyap yuwohon men malik suwarehon men ap pohon men inilaheg toho werehon men enele ying eneptuk lamuhup fug. Hit hinindimuwen nare siyahap timin ulug wenggel haruk lamuhup fug ulug hiyag isaruk latik iyag angge famen

¹¹hit hunumbasiyen holtul fug ulug inisanggo lat taruk lit enembol yig nutuk latfag.

¹²An nahime feneyen namingmingangge nabi tam welatfahon hiyag isaruk lit, ’Numalikisiyen tu men ari men turuk lamuhup ulug komo eneptuk lahi ane ap hiyag isil lalihip,’ ulug mon eneptuk latik iyag angge famen hit hunumbasi inindi helep arikon hag toho wereg lit An nele holoho embeseruk latfag. Imbisibag ane ari fahet An nolok anggolo haruk latik iyag.

¹³An nele urukmu iren hol niyaruk latfag fug hag toho Anden oho iren enele nubam urukmu holtuk latik iyag fug.

¹⁴Ari fahet siyeluwen inggilangge walug laruk hag toho Anden hit hunumbasi arimano o pumbuk kema-kema iren yet hibag fug ambeg hik-hak isiyagma kinang fanowon tu lekma hag atisi ulug ap misig oho laruk latfag fug,” ulug hiyag nitisi.