Read Angguruk Yali ZAKHARIA 8 Bible Online

ZAKHARIA 8 - Angguruk Yali bible

ZAKHARIA 8

¹NINIKNI Allahn nin eke an nubam ele uruk lit,

²”An HINIKNI Allah pohol ha kinang ha seneg lahiyonen nele uruk lahiyon tu: O pumbuk Yerusalem nindi anggen teg lit nindimu sig hute naptuken ap seliyon fahet nolok anggolo haruk lahi.

³An HINIKNI Allahn nele uruk lahiyon tu: An nin hebeloho o Yerusalem lahukteg numalikisi sehelimu welaruhuk. Sehelimu welaruhukmu o Yerusalem unuk salikap toho Sali Ibam suwalegma An nantom unuk Tom Fanowon suwaleg laruhu.

⁴An HINIKNI Allah pohol ha kinang ha seneg lahiyonen nele uruk lahiyon tu: O itano li ap hiyap men amusun toho weregman eneg sabal amuhupteg wanggun tomuk toho laruk angge ininggikmu seneg lit o silimu heriyeg lamuhup.

⁵Malik ap umalik hilani malik ying aptukon o Yerusalem keleg aruhu.

⁶An HINIKNI Allah pohol ha kinang ha seneg lahiyonen nele uruk lahiyon tu: Hit An numalikisi we tor angge honoluk welahebonen Anden ihiyon ari aben tuk fug tehon fahet ehek pelihip ano angge famen Anden eneg tuk teg lit welahi.

⁷An HINIKNI Allah pohol ha kinang ha seneg lahiyonen nele uruk lahiyon tu: An numalikisi ininggik lisoho mo lahik waharuk fil oho ubuk uruk fil oho og eneplug libagma Anden windat enebuhukteg hondog eneplug waruhukmu nin hebeloho o Yerusalem welamuhup. Wereg lit An numalikisi amuhupmu An it Inikni wereg lit ninggik obog isa fug angge fet enesug laruhuk.

⁹An HINIKNI Allah pohol ha kinang ha seneg lahiyonen nele uruk lahiyon tu: Allah ibam wibuhuk ulug helep ubule yaho ferusa sambil nabi arimanowen enele hiyag hisarusa ane fahet hiren ketiya oho wenggel haruk lit hinindi wirik toho welamek!

¹⁰An nibam hebeloho wibuk fugmu ap men wam menen yabuk asengseng toho wituk latusa angge famen anggen wilip atisi fug. Ap seliyonen kahal enesuhen ap inibamen wilip am fug teg latusa. Ap obog toho onori men wat-war atuk lamag ulug Anden seliyap eneptuk latikik angge famen

¹¹ketiya hit An numalikisi we tor angge honoluk welahebon Anden hebeloho naluke yig hisaruk laruhuk ulug An HINIKNI Allah pohol ha kinang ha seneg lahiyonen uruk lahi.

¹²An numalikisi inindi yuwag toho wereg lit anggen fok turuk lamuhupmu osit anggolo pilabik waharuken hele anggur anggen fano yihikmu kinangman oho anggen eke hag eke hag fano wilip atuk laruhu. Ari roho turuk lit hit An numalikisi we tor angge honoluk welahebon mun angge man angge fanowon og hisaruk laruhuk.

¹³Indam ap o kema-kema werehonen ap eke huluwap timin peruk latfag halug Yehuda inap men Israel inap men mondabi siyag atusa hag toho ar oho siyag amag uruk latfag angge famen ketiya Anden hit windat henebuhukmu hit feneyen ap anggolo fano amuhup. Ari fahet hit hinindi wirik toho wereg lit hiniyabuk hinine roho wituk lamuhup!

¹⁴An HINIKNI Allah pohol ha kinang ha seneg lahiyonen nele uruk lahiyon tu: Hit hunumbasiyen siyag ane turuk lit An nindi nolokap turuk latfagma An nindimuwen siyahap enebuhuk ulug wenggel halug nindi isa fug angge unusuruk latik iyag angge famen

¹⁵ketiya Anden hebeloho o Yerusalem inap men Yehuda inap men unubam fano ane turuk laruhuk ulug wenggel haruk lahi. Ari fahet henekol haruk lamuhup fug.

¹⁶Hiren turuk lamuhubon fahet Anden iminon tu: Henele tem toho uruk lit nit-nit mangno roho welamuhuk ulug alem haloho emberuk ambehen unggum fano haltuk lamuhup.

¹⁷Hinindimuwen nare siyahap timin ulug wenggel haruk lamuhup fug. Henele si ane uruk liren tem toho ihi uruk lamuhup fug. Ari obog toho fahet An nirim peruk lahi ulug An HINIKNI Allahn uruk lahi,” ulug hiyag nitisi.

¹⁸Hiyag nitisireg NINIKNI Allah pohol ha kinang ha senehon inowen nin ele nubam uruk lit,

¹⁹”An HINIKNI Allah pohol ha kinang ha seneg lahiyonen nele uruk lahiyon tu: Mo eke fam eke fam pikalem uhanehon men fuwabon men sabiron men numon men inam atukmu suburu na fug angge hiyang welamuhup li itano[3] hit Yehuda hinaben indam uba yatuk latikip hag toho tuk fug angge Allah wel tul ulug henehiyeg toho wereg lit henele hi roho yunggultuk lamuhup. We henele tem toho uruk lit hit-hit mangno roho welamuhup ane hinindiyen yami ruruk lamuhup,” ulug hiyag nitisi.

²⁰NINIKNI Allahn nin hiyag nutuk lit, ”An HINIKNI Allah pohol ha kinang ha seneg lahiyonen nele uruk lahiyon tu: Fobik ap o pumbuk kema-kema werehon o Yerusalem waharuk lamuhup.

²¹O Yerusalem lul ulug ap o pumbuk ekemon eke fam lahupteg ap unubam enele uruk lit, ’NINIKNI Allah pohol ha kinang ha senehon ambeg lulteg At ubam hindi nisamihin ulug sembahyang uhuken nit men hit men ambiyeg o Yerusalem lulen maniyek!’ uruk lamuhup.

²²Ari roho il laruk lit ap o pumbuk suwon inine roho werehon mondoko wamuhupteg An HINIKNI Allah pohol ha kinang ha seneg lahiyon nolohotma lalug hindi nisamihin ulug nubam sembahyang uruk lamuhup.

²³An HINIKNI Allah pohol ha kinang ha seneg lahiyonen nele uruk lahiyon tu: O itano li ap enele wal-wal urukon enebe numen Yahudi ahun misig iraham lalug sum atog seneg lit at ubam, ’Aben te Allah hat men wereg urukmu hol harukukteg nit hat men ambiyeg o Yerusalem lulen hiyag nimin,’ uruk lamuhup,” ulug hiyag nitisi.