Read Angguruk Yali ZAKHARIA 9 Bible Online

ZAKHARIA 9 - Angguruk Yali bible

ZAKHARIA 9

¹ NINIKNI Allah ilen Israel inap ununggul unuk wal taneg werehon kim isaruk hag toho o Aram inap oho kim isaruk. Ari fahet it unubam fobik teko lahuwon fahet Allahn ele kong toho irisi. Wene ari o Hadrakh kinangma larisireg amusun toho Aram inap inibam pumbuk suwon Damsyik welaruhu.

²O Damsyik embeselug kinang horogma werehon Hamat keyen ap inindi anggat tehon wereg ambeg o pumbuk Tirus men Sidon men oho lahu.

³Tirus inap arimanowen inibam walinggoho elehet yaron eke wibareg wereg lit kinang alinlan anggolo wereg hag toho ili ruruk angge perak men emas men anggolo andog toho lahabil laharusa angge famen

⁴Ninikni Allahn enenggengge obog toho oko walug ik ahummu hik isahumu inibam pumbuk ino indoken nahu.

⁵Ari roho turukmu o Askelon inaben yet hahupteg enekol haruk lamuhup. O Gaza inaben oho enekolen unuwag elek-elek angge ruruk lamuhup. O Ekron inap arimanowen nit ninibil atukon Tirus inap arimano eleg atusa ulug inindi anggin aruhu. O Gaza inap onowe suwon eleg aruhumu o Askelon inowen ap enele teng uhup.

⁶O Asdod inowen ap pohon anggolo welamuhup. Ari roho tuhuwon fahet NINIKNI Allahn ele uruk lit, ”O Filistin inap inindi winik-wonog turuk ane Anden elehap tuhuk,” uruk.

⁷Filistin inaben wam pak suwe waroho mebet angge naruk lit Allahn na fug ibag angge eneyehen saluk tegman Allahn taluk toho hik isaruk laruhu. Ari roho turuk laruhumu Filistin inap we tot onoluk welamuhubon arimano Ninikni Allah anggengge amuhupteg nit Yehuda ninap nonori welamuhup. O Ekron inap arimano oho indam Yebus inap arimano Israel inap sehelimu kuruk latfag hag toho[4] ir oho Allah umalikisi sehelimu kuruk lamuhup.

⁸NINIKNI Allahn ele uruk lit, ”Ap seliyon An nangginang ke la wam turuk lit nibam siyahap tuhup tohon ulug An ninggarehen kahaleg laruhuk. An numalikisi nilen kim isaruk lit wanggi wat enesug laruhukmu fobik ap olok toho turukon misihen oho apmayap enebik waruhu fug.

⁹Sion hinap nori, henehiyeg toho welamok! Yerusalem hinap, henele hi roho yunggultuk lamek! Hit honowe suwon henembeg waharukmu yet teg lamek! Numalikisi inibil atuk lit windat enebuhuk ulug waharuk. Indi apma roho wam keledai emberimu heriyeg lit waharuk. Wam keledai umalik kabiniyon fam heriyeg lit waharuk.

¹⁰Allahn ele urukon tu, ”Efraim inaben tog abul ulug kereta wam kudan lisoho walug larukon arimano Anden hik isahuk. Wam kuda Yerusalem inaben tohon oho eleha fusuhuk. Eneminggin tog obog toho fala roho hik isahuk. Hit honowe suwon inowen o pumbuk obog toho mangno roho welamuhup ulug hiyag isahureg ik Efrat ikman tulug saho ahik walinggoho kinang atogman atogma werehon obog toho Aren eneg sen enesug laruhu.”

¹¹NINIKNI Allahn Israel inap unubam ele urukon tu, ”Anden hit fet henesug laruhuk ulug sali emberuk lit wam amep fam ineyap tiyahon pisan isamin fug peruk lahi. Hit honori aben kiling elma pilap eneptukon hag toho werehon arimano Anden windat enebuhuk.

¹²Hit aben hele waroho fet henesuhon suhuloho maniyek! Fano amuhuk peruk lamuhup! Hinindi yuwag toho welamuhup ambeg wamuhup! Asengseng haruk latikibon fahet Anden fano ane sebe roho hunubam turuk laruhuk ulug o yoho nele hiyag hisaruk lahi.

¹³An namuwen Yunani inap men tog abuhuk ulug Yehuda inap sehen hag toho seneg lit Efraim inap minggin tog hag toho sap teg laruhukteg Sion inap karog hag toho leho laruhuk.”

¹⁴NINIKNI Allahn umalikisi inibil atuk lit enemberimu inam aruhureg tog pinel lebeg turuk hag toho pising isaruk laruhu. NINIKNI suwon Allahn tog apmin ulug waruk ele hum toho tung turuk lit At ebe ik ambut filen siyelu sehelimu waharuk.

¹⁵At pohol ha kinang ha senehonen umalikisi ili og eneptukmu iren ap seliyon waroho apmayap eneptuk lamuhup. Aben ik olokon nalug enele ngik-ngog uruk hag toho tog aptuk lit enele ngik-ngog uruk lamuhup. Allah fahet hubu lahaptuk ambeg wam mep hililtuk hag toho ap seliyon enemep it enebene anggolo sililim toho laruk laruhu.

¹⁶Ari turuk sambil ino wam domba foroho ahunen ambohom windat eneptuk hag toho NINIKNI Allahn oho umalikisi windat enebuhu. Windat enebuhumu Allah angginangma wereg lit helep umbagpag turukon hag toho welamuhup.

¹⁷At angginang fanowon fam hele anggur men roti anggen men fano wilip aruhumu ap kabiniyonet hiyap tuhumonet inine amuhup.