Read Angguruk Yali MALEAKHI 2 Bible Online

MALEAKHI 2 - Angguruk Yali bible

MALEAKHI 2

¹NINIKNI Allah pohol ha kinang ha senehon inowen At fahet hubu lahaptuk inap imam hunubam ele urukon tu,

²”Hiren An nele sobir isalug hinindi nubam umbuk fug angge nunuk palimuwap naptuk lamuhup fug halug Anden hit huluwap henebuhukmu fano-fano angge hit hininggikmu alep angge famen eleg laruhu. Anden hit hiyag hisaruk lahiyon wenggel haruk lahep fugmu we tik-tem toho hunumalikisi endebuhubonet huluwap heneptuk lahi. An nubahet emberuk lahep ambohom arimano yog honorohole fam naltang tubusuhukmu aben hit kililim-kililim yogma hunumbahik lahup.

⁴Hunumbahik lahup sambil ino alem nungge fahet Allahn olok toho nunubam tehek ulug hinindi anggar aruhu. Hunumba Lewi ubam Anden sali imbiyahon ino henepeleg aruhu rohon ulug nele aru hiyag hisihi.

⁵Anden Lewi umalikisi men unubam sali emberuk lit, ’Hinindi yuwag toho wereg lit honoluk welamuhup,’ ulug hiyag isiyag ane hikit toho Anden let eneptukmu inindi yuwag toho wereg latfag. ’An fahet henekol toho welamuhup,’ ulug hiyag isiyag ane hikit toho enekol toho wereg lit An nele holtuk latfag.

⁶Lewi umalikisi arimanowen An nawene fahet un ane hiyag isa fug angge ap fano roho milal eneptuk latfag. An men mangno roho wereg lit Anden peruk ane hikit toho turuk latfag. Siyag ane turuk latfag inap anggolo komo eneptukmu holtuk lit iren turukon embeseruk latfag.

⁷Imam obog toho An namingmingangge mon eneptuk lahiyon werehen Lewi umalikisiyen turuk latfag hag toho turuk lalep. An nawene tem toho milal eneptuk lalep. Aben komo nenebukag ulug enembeg waharukmu fano roho komo eneptuk lalep angge famen

⁸hiren fanowon embeselug laruk lit un ane hiyag isaruk lahepma ap anggolo mako wamburuk. Lewi umalikisi unubam Anden sali imbiyahon ino hiren siyaha feseruk lahep ulug An HINIKNI Allah pohol ha kinang ha seneg lahiyonen nele aru uruk lahi.

⁹Anden hiyag hisaruk lahiyon hikit toho laruk lahep fug. Ap henembeg waharukon yet isaruk lit tu suwon, tu toron ulug henele wal toho hiyag isaruk lahep. Hiren ari roho turuk lahepma Anden alem angginon hunubam emberukmu Israel inap obog tohowen wasubag sup isaruk lit apmayap heneptuk lamuhup.”

¹⁰Nit Israel ninap obog toho Ninikni we misig wereg eleg? Allah wal nenepfag ahun we misig. Ari reg halug nungge fahet nit-nit sali uruk laheyon pisan isaruk lit Allahn nunumbasi unubam sali imbibahon oho sobir isaruk lahe?

¹¹Allahn unubam sali imbibahon Yehuda inaben pisan isaruk lit o Yerusalem men o pumbuk obog tohowen Allahn nirim perukon turuk latusa. Israel ninap fuhon unumbasi wel eneptuk hiyap hilaruk lit Allah ibam indi reg ambeg siyahap turuk latusa.

¹²Ap ari roho turukon Israel inap enesehelimuwen obog toho NINIKNI Allahn elehap enebuhu! NINIKNI Allah pohol ha kinang ha senehon fahet wam waroho yaltuk lamuhup halug oho siyahap enebuhu!

¹³Alem pirenehon turuk lahebon tu: Hiren piya sini yiko uba yatuk lit NINIKNI Allah fahet hubu lahaptuk ambeg uban hondo rebeseruk lahep. Niren Allah fahet emberuk laheyon Aren yet ha fug angge fano embehesa peruk eleg ulug hinindi ouk haruk lit welahep.

¹⁴”Nungge fahet Aren fano embehesa peruk eleg?” ulug wenggel haruk lahep. Alem te tu: Hit kabinimu hiyap hilaruk latikibon men hinindi misig toho welam fug angge embeseruk lahebon NINIKNI Allah oluk. ”Hiyap tu men ninindi misig toho welamuhuk,” ulug Allah olohotma sali irikipteg hunuhesi men mangno roho welatikip angge famen ketiya sali irikibon sobir isaruk lit hunuhesi embeseruk lahep.

¹⁵Allah misig enehon inowen hit hunuhesi men hinindi henebe misig toho welamuhup ulug wal henepfag fug? NINIKNI Allahn nanggintuk lamuhup ulug wal henepfag? Malik indag taruk lamuhubon An numalikisi amuhup ulug hit hunuhesi men wal henepfag. Ari fahet hunuhesi umbusuhup tohon ulug hinindi honoluk toho welamuhup!

¹⁶Israel ninap NINIKNI Allahn ele urukon tu, ”Hiyap embeserukon fahet nirim peruk lahi. Hiyap embeserukon men ap watmin perukon men ambi reg. Ari fahet hinindi anggat toho wereg lit hunuhesi umbusuk fug!” ulug NINIKNI Allah pohol ha kinang ha senehon inowen ele uruk.

¹⁷Hiren henele uruk lahebon ariyen NINIKNI Allah indi angginap turuk lahep anggeyen hiren te, ”Nungge uruk lit At indi angginap turuk lahe?” uruk lahep. Hiren te, ”Siyag ane turuk inap obog toho fahet NINIKNI Allahn it fano ulug indi enesug lit wereg. Allahn siyag ane turuk inap arimano unusurukon kema wereg?” uruk lahebon ariyen Allah indi anggin atuk.