Read Angguruk Yali MATIUS 10 Bible Online

MATIUS 10 - Angguruk Yali bible

MATIUS 10

¹Misihim Yesusen otsi nisanggowen wol enepfareg, ”Ap unundama siyag angge werehon yanggaloho wili feseruk lamuhup, ap ouk waruk lit inine eleg toho werehon obog toho fanowap eneptuk lamuhup,” ulug Yesusen otsi inineyap enepfag.

²Otsi nisanggowen ununuk tuma ul: Tamon te Simon unuk eke Petrus, Petrus are Andreas men, Zebedeus amloho Yakobus men are Yohanes men,

³Filipus men Bartolomeus men, Tomas men, pemerintah amingmingangge Matius men, Alfeus amloho Yakobus men, Tadeus men,

⁴o Kana ahun Simon men, Yudas Iskariot huruwe libag ahun ino men, it obog toho enebe nisanggowen welatfag.

⁵Otsi nisanggowen arimano mon enepmin ulug hiyag isaruk lit, ”Nori, Allah unuk enepeleg inap enebunggalem men Samaria inap inibam pumbuk ke lahup fug.

⁶We Israel inap wam domba longgo uruk hag toho longgo uruson arimano enembeg lahup.

⁷Ninikni poholmon ap obog toho Inikni aruhuwon ino horog teg ulug hiyag isaruk lamuhup.

⁸Ap ouk warukon hihir eneptuk lamuhup. Ap warehon onolukap eneptuk lamuhup. Enehap salukangge rohon hihir eneptuk lamuhup. Ap unundama siyag angge werehon yanggaloho wili feseruk lamuhup. Anden saplangge og hisarikik angge hiren oho saplangge og isaruk lamuhup.

⁹Fano-fano angge ili ruruk angge sum hunuyugmuwon fam yuhat ta fug angge lahup.

¹⁰Sum suknuk fug angge sum henebemon piren wan ta fug angge sepatu hunuyugmu kilap ta fug angge wanggun tomuk hila fug angge lahup. Yabuk wituk inap onggo og isa reg.

¹¹Pumbuk suwon ano toron ano kuhupteg ap indi fanowon misig yami ruruk lamuhup. Hiyahakupteg ap ino men welamuhupteg o winama luk oho lit embeselug wilip amuhup.

¹²O misig kuhupteg o ari inap hi eneptuk lamuhup.

¹³It inindi fanowon hiren hi enebuhupmu it unubam fano aruhu. It inindi siyahon hi enebuhup ane ari suhuloho hit hunubam waruhu.

¹⁴Ap ekeyen, ’Hit tuma weregma henele holtul fug,’ uruk halug o pumbuk ari famen wilip atuk lit kinang hunuyugmu werehon ho roho pila feseruk lamuhup.

¹⁵Allahn unggum kong tuhu sambil ino o Sodom men Gomora men tot hayen angge famen o ari mondabi siyag aruhu. Ari we tem toho hiyag hisaruk lahi.”

¹⁶”Nori, hit wam domba hag toho olomene olokon sehelimu mon heneptuk lahi. Pisanggo indi anggat teg lit laruk hag toho laruk lamuhup. Suwe yalma olok eleg hag toho honolok eleg angge welamuhup.

¹⁷Ap obog toho kahal enesug lamok. Hininggik hele waroho pemerintah unggum kong turuk inap wereg ambeg hondog henebuhup ane, sembahyang uruk ibamen e paleg fam hunusuhup ane ari hinindimu honoluk toho welamuhup.

¹⁸At otsi wereg ulug hininggik hele waroho ap suwon men sen enesug inap men weregma hondog henebuhup. Hit hininggik hele wat henebuhup ane ariyen ap suwon men it wene enepeleg inap men An nunuk onoluk amuhup.

¹⁹Hit hondog henebuhupmu nenele nungge ulteg nanggintul ulug hinindi anggin toho welam fug. It suwon unubam hiren uhup ane Hinikni Allahn o ino sambil hiyag hisahu.

²⁰Hiren henele uhup fug, Hinikni ahime hit hunundama wereg lit ele uhu.

²¹Areyen nare ware fusukag ulug huruwe lahu. Ikniyen namloho ware fusukag ulug huruwe lahu. Unumalikiyen iknisi isingasi fam enele siyag toho uruk lit unusukag ulug huruwe lahup.

²²At otsi wereg ulug ap obog tohowen hit ninirim ulug unundama onolok hahup. Hunusila ulug onolok hahup angge famen hinindimu henekol ha fug angge yuwag toho welamuhup halug Allahn mondabi fanowap henebuhu.

²³O pumbuk misihen hunusul ulug mug hisaruk halug o pumbuk eke fam lahup. O pumbuk Israel kinang fam werehon eke la eke la turuk lamuhup angge famen pumbuk winon eke la fugmu At ap kinangmon atik ibahon ino waruhu. Ari tem toho hiyag hisaruk lahi.

²⁴Ot palimu weregma owe apma wereg lam fug teg. Amingmingangge palimu weregma ikni apma welam fug teg.

²⁵Ot men owe men ambi roho weregma fano. Amingmingangge men ikni men ambi roho weregma fano. O ngi ahun ino hat setan uruk lit pet tuhup halug o ino welamuhubon arimano oho setan uruk lit per enebuhup.

²⁶Ap arimanowen hit pet henebuhup ane fahet henekol ha fug ulug hiyag hisaruk lahi. Mapmu reg lit werehon obog toho inam aruhu. Mun angge man angge hiraho lit werehon onoluk aruhu.

²⁷Anden hik tegma hiyag hisaruk lahiyon ari hiren seleg tegma hiyag isaruk lamuhup. Hinisanggo kilabeg hiyag hisahup ane hiren te lehoma unduhuk lit hiyag isahup.

²⁸Henehap selmon hunusuk hag teg angge famen henehime hunusuk fug teg inap fahet henekol toho welam fug. Henehap selmonet henehimeyet indok humon fam yal henebuk hag tohon ino fahet henekol toho welamuhup.

²⁹Suwe wiluwe piren fahet uang anggen misig eneg wa reg. Suwe ari siyag ulug onggo we tot wa reg angge famen Hinikni Allahn mako wambuhu rohon peruk ane ariyen kinangma wambuk fug teg.

³⁰Ari regma hir oho hununggulmu honoruk wilip atukon Allahn winag harisiyon wereg.

³¹Suwe wiluwe anggolo famen ambolma weregma hit aluke fil welahebon henekol toho welam fug.

³²An fahet ap iniline fag toho uruk ahun fahet Anden oho Nikni poholmon iline fag toho uhuk.

³³An fahet ap iniline awiya waruk ahun fahet Anden oho Nikni poholmon iline awiya wahuk.”

³⁴”Ap seli roho werehon mangnowap enebik oho waharisi puk fug. Mangnowap enebuhuk ulug waharikik fug, tog walug waharikik.

³⁵Ap eke ikni men ap uwag yinggoho wereg lit hili roho welamuhup ulug waharikik. Hiyap eke isinga men ap uwag yinggoho wereg lit hili roho welamuhup ulug waharikik. Hiyap eke ahun isinga men ap uwag yinggoho wereg lit hili roho welamuhup ulug waharikik.

³⁶Ininggareg inibam o misig werehonen seli roho welamuhup.

³⁷’Nikni men nisinga men nindi pulmu reg, Yesus nindi isanggoma,’ peruk inap An niraham welam fug teg. ’Namloho men nahaloho men nindi pulmu reg, Yesus nindi isanggoma,’ peruk inap An niraham welam fug teg.

³⁸Teltuk ahen ha rulug An nombolim laruk elehon An niraham welam fug teg.

³⁹An noluk welaruhuk peruk ahun ino oluk welaruhu fug. Nowe unuk fahet war atnin peruk ahun ino tem toho oluk welaruhu.

⁴⁰Ap san hit pali wat heneptuk halug An pali wat naptuk. An pali wat naptuk ahun inowen Nikni An mon naptisiyon oho pali watuk.

⁴¹Wene hiyag isaruk ahun tu ulug pali watukon ino onggo wene hiyag isaruk ahun og utukon at aruhu. Fano ane turuk ahun tu ulug pali watukon ino onggo fano ane turuk ahun og utukon at aruhu.

⁴²Ap toron tuma werehon ik obok haruk halug Yesus ot tu ulug ik og utuk ahun ino onggo og utuk ane longgo uhu fug. Ari tem toho hiyag hisaruk lahi,” ibag.