Read Angguruk Yali MATIUS 11 Bible Online

MATIUS 11 - Angguruk Yali bible

MATIUS 11

¹Yesusen wene obog toho ari otsi nisanggowen hiyag isibareg o ino embeselug libareg it inibam eke la eke la wene hiyag eseheg milal enebeheg turuk latfag.

²Yohanes penjara wereg lit hol harukmen Kristus inowen ari-ari turuk urukmu hol hibag. Hol hibareg Yohanesen otsi mon eneptuk lit,

³”Ap winon eke nangno ruruk lamuhuk ano, waruhu ibahon ino Har ano, kapal ha lalihip,” ulug otsi mon enepfag.

⁴Mon enepfagma libagma Yesusen hiyag isaruk lit, ”Hiren yet hehep ane men hol hehep ane men lalihipteg Yohanes hiyag irik lalihip.

⁵Ap inil hupnihon inil fano atug yet haruk, ap unuyug siyahon fano atug laruk, ap enehap salukangge rohon enehap fano atuk, ap inisanggo larehon husoho larikim hol haruk, ap warehon onoluk atuk, ap enengge eleg inap wene fanowon hiyag isaruk.

⁶An fahet indi nin atug nirim peruk elehon ino ahiyeg toho wereg,” ulug Yesusen Yohanes otsi itano hiyag isibag.

⁷Yohanes otsi arimano libagma Yesusen ap anggolo arimano fam Yohanes fahet hiyag isaruk lit, ”Nungge yet hul ulug farema larikip? Hame mulilik la mulilik wam turukon yet hul ulug larikip?

⁸Nungge yet hul ulug larikip? Ap sum fanowon wan tehon yet hul ulug larikip? Sum fanowon wan tehon ap suwon inibam eneg wereg.

⁹Nungge yet hul ulug larikip? Wene hiyag isaruk ahun yet hul ulug larikip? Wene atam hiyag isaruk latfag inap arimano at palimu weregma it apma reg, ari tem toho hiyag hisaruk lahi.

¹⁰At fahet tam haharoho imbibahon tu, ’Yet himin, Hat halukema laruk laruhuwon namingmingangge eke monde fuhuk. Hat waruhun ke aren hale feruk laruhu.’

¹¹It hiyaben indag eneptuson arimano Yohanes ikma pilap eneptuk latisi ahun palimu wereg hag toho misig oho wereg eleg. Wereg eleg angge famen Allah umalikisi atuson tot-toron arimano at apma regma it palimu wereg. Ari tem toho hiyag hisaruk lahi.

¹²Yohanes ap ikma pilap eneptuk latisi ahun inam atisi liyen tulug ketiya oho aben Allah weregma taluk toho hulul ulug turuk. Taluk toho hilaruk inap arimanowen ap winon Allah weregma kuhup fug ulug sok latuk.

¹³Wene hiyag isaruk latfag inap men Musa wene menen Yohanes inam aruhu ulug fulu roho haruk lit haharoho imbibag.

¹⁴Elia waruhu ibahon ino at waha. Hiren at fahet fano peruk lahep ano?

¹⁵Ap sa isanggo wereg halug uruk lahi ane aru holukag.”

¹⁶”Ap aruma werehon fahet nungge fam wirim hamin? It arimano malik toron ayeg waroho waruk ambeg heriyeg lit onori men enele uruk lit,

¹⁷’Niren waruk tel hesehe angge famen hit yunggulehep fug, nit hunu sini ehema hit uba yarehep fug,’ uruk hag toho ap aruma wereg.

¹⁸Yohanes ino waharisireg ik men suburu men na fug angge weregma at undama siyag angge wereg uruk latusa.

¹⁹Weregman At ap kinangmon atfahon ino waharisireg suburu na ik na turukmu yet harusareg, ’Ap aru ik men suburu men abuwap ahun waharisimu pemerintah amingmingangge uang embelug lalihip uruk inap men siyag ane turuk inap men enere tu,’ uruk. Mun ane man ane alemet ondomiyet Allah oluk teg ane ari Aren turukon famen fag atuk,” ulug hiyag isibag.

²⁰Ari ulug hiyag isibareg Yesusen ap wene holtuk elehon o pumbuk winon werehon per enepmin pibag. Ap arimanowen Yesusen fano ane anggolo turuk latfahon haruk latfag angge famen wenggel haruk latfag fuhon per eneptuk lit,

²¹”Hit Korazim hinap, hinindi anggin amag! Hit Betsaida hinap, hinindi anggin amag! Hit ouk warukon fano atikip hag toho Tirus inap men Sidon inap men oho fanowap eneplepma it arimano atam inindi anggar atepma fesi lahaplep.

²²Allahn ap minggir enepmin puhu sambil o Tirus men Sidon men fano welamuhup, hit eneg mondabi siyag amuhup.

²³Hit Kapernaum hinaben Allahn poholman lisoho og nenebuhu peruk lahep? Eleg o nori, ap war atukon wereg ambeg pilap henebuhu. Hit ouk warukon fano atikip hag toho o Sodom inap fanowap eneplepma ketiya oho fano welalep.

²⁴Allah ap minggir enepmin puhu sambil o Sodom tot se reg angge famen hit mondabi siyag amuhup,” ulug Yesusen hiyag isibag.

²⁵Yesusen ari hiyag isibareg, ”Nikni, Haren pohol men kinang men seneg lahenma Anden wel haptuk lahi. Mun ane man ane alem nonoluk ninap perukon Haren hiraho feruk lit ap siyahon toron enelukeman fag toho hiyag isaruk lahen.

²⁶Nikni, Hat hindiyen ari roho timin peruk lahen.

²⁷Mun angge man angge Ikniyen amloho ubam emberisimu ap misihen oho amloho onoluk teg elegma we Ikniyen eneg oluk teg lit wereg. Ap misihen oho Ikni oluk teg elegma we amlohowen eneg oluk teg lit wereg. Amlohowen Ikni fahet fag toho hiyag isarukmu holuhup inap arimanowen Ikni fahet onoluk amuhup.

²⁸Hit anggin angge waruk lit sat toho turuk lahepma An nambeg maniyek, Anden let henebuk.

²⁹E paleg Anden hununggulmu umbuhukon ha ruruk lit Anden milal henebuhuk ane fuki roho turuk lamuhup. Nindi wiyig teg lit apma imbik wamburuk lahi. Ari roho turuk lamuhupteg hinindi yuwag toho welamuhup.

³⁰E paleg Anden hununggulmu emberuk lahiyon se rehen, sum sukni hunubaharuk lahiyon seyon sukni feruk lahi,” ulug Yesusen hiyag isibag.