Read Angguruk Yali MATIUS 15 Bible Online

MATIUS 15 - Angguruk Yali bible

MATIUS 15

¹Welatfagma Farisi inap men Musa wene onoluk inap men o Yerusalemen Yesus weregma watfareg kapal haruk lit,

²”Nonowe, nungge fahet Hat hotsiyen ninikni unumban ibag ane sokowa feseruk lit suburu nuk oho lir oho ininggik umaho eleg angge suburu naruk?” ulug kapal hibag.

³Kapal hibagma Yesusen te, ”Hiren hinikni hunumban ibahon holtul peruk lit Allahn komo nenepfag ane nungge fahet sokowa feseruk lahep?

⁴Allahn komo neneptuk lit, ’Hikni hisinga hindi roho welaruhun, ikni isinga fam siyag ane uruk lit per eneptuk ahun ino war aruhu,’ ulug Allahn komo nenepfag.

⁵Komo nenepfag angge famen hiren te, ’Ap san ikni isinga hiyag isaruk lit: Naruk angge hit fahet emberikik angge famen Allah famap tihireg hubu lahabihi uruk ahun inowen

⁶ikni isinga fam siyag ane turuk eleg,’ ulug hiren uruk lahep. Ari roho uruk lahep ane ariyen Allahn komo nenepfag ane ino mondabi apmayap turuk lit hiniknisi unumban ibag ane palimuwap tirikip.

⁷Hit henele si uruk hinap! Yesayan ibag ane aru tem toho hit fahet haharoho imbibag,

⁸’Ap aruma enembilik atogman An wel naptuk famen inindi An men sebe roho wereg eleg.

⁹Aben uruk ane fahet eneg milal eneptuk lit An nubam saplangge sembahyang uruk,’ ” ulug hiyag isibag.

¹⁰Yesusen ari ulug it hiyag isibareg ap anggolo arimano wol enepfareg hiyag isaruk lit, ”Nori, Anden iminon te hinisanggo fam holtuk lit hinindi anggar amag.

¹¹Henembilik fam naruk angge ariyen ap siyahap eneptuk eleg, ambilik fam wilip atukon ariyen ap siyahap eneptuk,” ulug hiyag isibag.

¹²Ari ulug hiyag isibagma Yesus otsiyen te onowe kapal haruk lit, ”Haren ehen ane ari fahet Farisi inap aruman siyag perukon ari Hat holuk?” ulug kapal harukmen

¹³Yesusen, ”Yabukmu yatuk angge Nikni poholmonen yaho feruk elehon obog toho umanggenet heneko hik isahu.

¹⁴Iren uruk ane ari imbisiyek. Inil hupnihon arimanowen onori inil hupnihon hondog eneptuk. Inil hupnihon arimano ininggik ilang toho larukmen enebe pirenet kiling elma mako wambuhup,” ibag.

¹⁵Ari ibagma Petrusen, ”Nowe, indit toho ehenon ari pikit toho nit hiyag nisimin,” ibag.

¹⁶Ari ibagma Yesusen, ”Nori, hir oho hinindi anggar am fug angge welahep?

¹⁷Mun angge man angge aben narukmu enehummu wambuhureg onolombik ele ke yog men wilip aruhu ane ari hit henepeleg?

¹⁸Ap siyahap eneptuk ane ari inindi fam wenggel halug enembilik fam wilip atukon ariyen ap siyahap eneptuk.

¹⁹Inindimu wenggeltuk ane ariyen onolok ane inam atuk, ap unusuruk ane men, ap unuhesi pal taruk ane men, pabi ruruk ane men, yoholiyangge waruk ane men, enele si uruk ane men, ap enebug uruk ane men obog toho ari inindi famen wilip atuk.

²⁰Ari famen ap siyahap eneptuk. Inggik umaho eleg angge narukon ariyen ap siyahap eneptuk eleg,” ulug Yesusen hiyag isibag.

²¹Welatfareg Yesusen o aru embeselug longgo imin ulug o Tirus men Sidon men libag.

²²Libagma Kanaan hiyap o pumbuk ino fam welatfahon misig Yesus ambeg watfareg ele uruk lit, ”Nowe, Hat Daud amloho welahenon aruwen an nahaloho undama siyag angge setan wereg lit ouk anggolo waruken Haren hindi niyamihinteg hihit nitnihin,” ulug heng tibag.

²³Heng tibagma Yesusen hebeloho hiyag um fug angge welatfag. Hiyag um fug angge werehen otsiyen Onowe fam heng uruk lit, ”Hiyap aru ele anggolo uruken lawag tohon hiyag imin,” ibag.

²⁴Ari ibagma Yesusen hiyap ino fam, ”An mon naptisiyon Israel inap wam domba longgo uruk hag toho longgo uruson hiyag enebuhuken an mon naptisimu waharikik,” ibag.

²⁵Ari ibagma hiyap ino Yesus iraham libareg alukema hur atfareg, ”Nowe, let nabin,” ibag.

²⁶Ari ibagma Yesusen, ”Suburu malik toron fahet wirako emberukon lisoho mene og utukon ari siyag,” ibag.

²⁷Ari ibagma hiyap inowen, ”Nowe, tem toho ehen angge famen suburu ahap siyahon aben hik isarukmu meneyen ondol heheg naruk,” ibag.

²⁸Ari ibagma Yesusen hiyap ino fam, ”Nahaloho, tem toho hindimuwen An nubam wenggel hehenma pehenon ari hag toho teko lamisi,” ibag. Ari urukmu itano ahaloho ino fano atfag.

²⁹Welatfareg Yesus o ino embeselug ik Galilea yenggelehon ayegma libareg punumu lahibareg heriyeg latfag.

³⁰Heriyegman ap anggolo arimano mondeg angge Yesus ambeg waharuk lit ap unuyug siyahon men enembol simbuk tohon men inil hupnihon men enele larehon men ouk eke hag eke hag warukon men hondog eneplug Yesus alukema imbisik waharukmu obog toho Aren hihir eneptuk latfag.

³¹Hihir eneptuk latfagma ap anggolo arimanowen yet harukmen enele larehon enele urukmu enembol simbuk tohon pikir atukmu unuyug siyahon fano atug larukmu inil hupnihon fano atug yet harukmu ap welatfahon arimanowen yihi uruk lit enekol hibareg Allah Israel inap Inikni wel turuk latfag.

³²Welatfareg Yesusen otsi niraham tiya maniyek ulug wol enepfareg, ”Ap anggolo aruma hup hinahanam suburu na fug anggeyen An men ambiyeg wahereg weregma nindi isaruk lahi. Suburu hinik larukmen keman unuyug wiyig am nowen aliyek imin fug,” ibag.

³³Ari ibagma otsiyen te, ”Ap eleg ambeg tuma welahereg ap teng-teng angge aruma nangginoho suburu og usulon fahet uruk lahen,” ibag.

³⁴Ari ibagma Yesusen, ”Suburu nombaren foroho lahep?” ulug kapal isibagma, ”Suburu sabiren men ikan toron tot foroho lahe,” ibag.

³⁵Ari ibagma Yesusen, ”Ap aruma kinangma tuma hur amusa,” ibareg

³⁶suburu sabiren men ikan men wibareg seneg lit sembahyang ibareg kut-kut otsi og isibagma otsiyen te ap anggolo arimano fibir eneptuk latfag.

³⁷Fibir eneptuk latfagma it obog toho nibareg enehum ouk atfagma minggir atfahon arimano sum sabiren yuharoho imbibag.

³⁸Ap suburu nibahon arimano hiyap men malik men winahuk fug angge ap suwon eneg teng-teng angge 4.000 arimano nibag.

³⁹Nibagma Yesusen hinibam aliyek ulug hiyag isibareg At kou fam kibareg o Magadan fil laruk latfag.