Read Angguruk Yali MATIUS 17 Bible Online

MATIUS 17 - Angguruk Yali bible

MATIUS 17

¹Wene ari hiyag isibagma hup falfalikenam atfagma Yesus otsi Petrus men Yakobus men Yohanes men hondog eneplug it ambiyeg punu yaron fam lahibareg it enemu wereg latfag.

²Enemu wereg latfagma it hinahan itano inilmu Yesus ebe nin atfagma orohole mo asinandi hag toho umbagpag turuk lit asum umbagpag turuk lit o sakan tegma hag toho teg latfag.

³Ari reg latfagma Musa men Elia men At men enele urukmu iren kilap enesug latfag.

⁴Kilap enesug latfagma Petrusen Yesus fam te, ”Nowe, nit tuma welahe ambeg fanoma welahereg Haren o sabo hinahan witihip imihinmu Hat fahet eke, Musa fahet eke, Elia fahet eke wibul,” ibag.

⁵At ele urukmu itano hina selehon ino watfareg it hililip enepfagma hina apmane ap ele eke uruk lit, ”An namloho fahet Anden fano peruk lit nindi reg lahiyon tu, At ele holtuk lamuhup,” urukmu hol hibag.

⁶Ari urukmu hol hibareg otsi enekol anggolo hibareg kinangma ying atfag.

⁷Ying atfagma Yesus it enembeg watfareg sen isaruk lit, ”Hit henekol fug, in amek,” ibag.

⁸Ari ibagma it onorohole leko yet harukmu ap winon elegma we Yesus amu eneg welatfag.

⁹Punu ino famen wambik waharuk lit, ”At ap kinangmon atfahon ino war aruhureg oluk am fugmu hiren turukmu yet hehep ane ari ap misig oho hiyag isa fug,” ibag.

¹⁰Ari ibagma otsiyen kapal haruk lit, ”Ari reg angge famen Musa wene onoluk inaben Elia tam waruhu uruk ane ari nungge fahet uruk?” ibagma

¹¹Yesusen te, ”Elia tam waruhureg obog toho arimano pikirap tuhu angge famen

¹²Elia tam waharisi, ari tem toho hiyag hisaruk lahi. At waharisi angge famen ap enepeleg toho wereg lit we it ininggarehen peruk ane ubam eneg turuk latusa. Ari hag toho At ap kinangmon atfahon ino oho it arimanowen alem angginon ubam umbuhup,” ulug Yesusen hiyag isibag.

¹³Ari ulug hiyag isarukmu Yohanes ap ikma pilap eneptuk latfag ahun ino fahet hiyag nisaruk ulug inindi anggar atfag.

¹⁴Tom famen Yesus otsi men ap anggolo wereg ambeg wambibareg weregman ap misig Yesus alukema hur atfareg

¹⁵ele uruk lit, ”Nowe, an numalik fahet hindi himin. At il fulug turuk lit indokma keheg ikma wambeheg turuk lit ouk anggolo waruk.

¹⁶Ari turuk lit werehen Hat hotsi enembeg walug waharikik angge famen iren fanowap tuk fug teg latusa,” ibag.

¹⁷Ari ibagma Yesusen, ”Hit An nubam hinindi wenggel ha fug anggeyen henepeleg toho welahepma An hit men mondabi amusun toho welaruhuk ano? Nombarenam welaruhukteg hit sehelimuwen nindi imbik wamburuk laruhuk? Malik ari ulug maniyek,” ibag.

¹⁸Malik ino ulug watfagma siyag angge undama werehon ino fam Yesusen ele ine roho pet tibagma siyag angge ino wilip atfagma malik ino fano atfag.

¹⁹Fano atfagma Yesus otsi enemu wereg lit Onowe ubam, ”Nungge fahet setan ino nit nenemuwen yanggaloho wilibuk fug teg lahe?” ulug Onowe kapal hibag.

²⁰Kapal hibagma Aren te, ”Hit An nubam wenggel haruk lahep fuhon ariyen setan ino wilibuk fug teg lahep. Hinindimu Allah fam tem peruk lit soluk anggen hahon hunubam welalepma punu aru fam, ’Heneko ahamu yag arik lag!’ elepma yag arik lelep. Mun angge man angge hiren tuk fug tohon wereg lalep fug.

²¹Setan aru hahon wereg halug we hiyang wereg lit sembahyang urukmu eneg yanggaloho wilibuk teg,” ulug otsi hiyag isibag.

²²Yesus otsi men o Galilea welatfareg Yesusen it hiyag isaruk lit, ”At ap kinangmon atfahon ino fobik ap ininggikmu aruhumu

²³iren At ino ware fesuhupmu inggik hinahaneg angge oluk aruhu,” ulug hiyag isibagma otsi inindi anggin anggolo atfag.

²⁴Yesus otsi men o Kapernaum weregma Allah ibam fahet uang emberukon heng eneptuk inap Petrus ambeg watfareg, ”Hit Honowe aruwen uang anggen piren itano Allah ibam fahet emberuk ano eleg ano,” ulug kapal hibag.

²⁵Ari ulug kapal hibagma Petrusen te emberuk ibag. Ari ibareg olma Yesus wereg ambeg kibareg Yesus hiyag itmin ulug turukmen Yesusen tam at ubam ele uruk lit, ”Simon, anden iminon tu fahet nungge pemihin. Ap suwon kinangma werehon arimanowen uang imbiyek ulug heng eneptuk ane ari ininggareg onotsi fam ano ap pohon unubam ano heng eneptukon ari fahet haren nungge pemihin?” ulug kapal hibag.

²⁶Ari ulug kapal hibagma Petrusen te, ”Ap pohon unubam heng eneptuk,” ibagma Yesusen, ”Ari ehenma ininggareg onotsi arimano umbuhuk fug ulug inindi se roho welamag,” ibag.

²⁷”Nit nunubam alem umbuhup tohon it inindi fano amag ulug haren ikan yami rik lamihin,” ibag. ”Ikan tam watnihinon ino wamihinteg ambilik kiyog hamihinmu ambilikmu uang anggen uhan weregma hamihin. Hamihinteg walug watnihinteg An faheret hat faheret it ininggikmu embemihin,” ibag.