Read Angguruk Yali MATIUS 18 Bible Online

MATIUS 18 - Angguruk Yali bible

MATIUS 18

¹O itano li Yesus otsi Onowe ambeg libareg, ”Allah wereg ambehen ap sa suwon welaruhu?” ulug kapal hibag.

²Kapal hibagma Yesusen malik toron misig wol tibareg it walinggoho weregma it sehelimuwen unduhuk fibag.

³Unduhuk fibareg, ”Hit hinindimu siyag angge werehon umbusuk fug angge malik toron indi hag toho amuhup fug halug Allah ambeg kuhup fug,” ibag.

⁴”Inggarehen apmayap tarukon malik toron hag aruhuwon ino Allah ambeg kuhureg su aruhu,” ibag.

⁵”An nubam indi wenggel haruk lit malik toron tu hahon hondog talug foroho ahun inowen An fet nasug lit wereg,” ibag.

⁶”Malik toron aruma An nubam wenggel haruk angge famen inindi nina feseruk ahun ino anggolopma helep humon ililoho ik ahummu pila feselepma fano,” ibag.

⁷”Ap o kema-kema werehonen ap eke inindi angginap feseruk inap siyag amag. Ap inindi angginon kema-kema wereg angge famen we inindi anggina feserukon arimano siyag amag.”

⁸”Hinggik men huyug menen hindi nina feseruk halug kong toho hik esemok. Hinggik huyug kong tebeselug Allah weregma kuhunmu fano. Hinggik huyug abirangge weregma indok suwon fam hik hiyahupmu ari siyag.

⁹Hilanggen fam yet halug hindi ninap haptuk halug hil misig hililoho hik isahunmu fano. Hil misig eneg weregma Allah wereg ambeg kuhunmu fano. Hil pirener angge weregma indok suwon fam hik hiyahupmu ari siyag.

¹⁰Malik toron aruma apma wereg ulug wenggel hahup tohon honoluk toho welamok. It toron aruma fer enesuhon Allah otsi malaikat likiya hupmu Allah alukema werehen Anden hiyag hisaruk lahi.

¹¹At ap atik ibahon ino it longgo urukon arimano hiyag enebuhuk ulug waharisi.”

¹²”Hiren nangginoho peruk lahep? Ap ekeyen wam domba teng uhan 100 foroho lit weregma sehelimuwon misig longgo elepma it werehon 99 itano anggenma tom alem ke embeselug longgo elebon ino yami relep fug ano?

¹³Longgo elebon ino hiyag alep halug it winon arimano wereg angge famen misig longgo elebon ino fahet ahiyeg anggolo helep ulug ari we tem toho hiyag hisaruk lahi.

¹⁴Hinikni poholmon inowen oho malik toron misig aruma longgo uhubon ari siyag peruk lit wereg.”

¹⁵”Hare eke siyag ane turuk halug ambeg lahunteg hare amu eneg weregma komo ruhun. Haren uhun ane hele holtuk halug nare indi fano aha puhun.

¹⁶Hare amu eneg weregma uhun ane holtuk eleg halug ap misig piren hondog enebuhun. Hondog enebuhunmu iren oho hare komo ruhup. Atam haharoho imbibahon te, ’Alem weregma ap piren hinahan alem ino onolukonen enele uruk lit alem haloho umbuhup,’ ulug haharoho imbibahon hikit toho iren oho hare komo ruhup.

¹⁷Iren komo rurukmu holtuk eleg halug wene onoluk inap obog toho palu roho weregma holukag ulug hiyag isahun. Iren komo ruhup ane holtuk eleg halug ap tu Allah wene apeleg ahun siyag ane eneg turuk ahun hag toho wereg puhup.

¹⁸Hiren kinangma tuman pug tebuhup halug poholman oho pug toho welaruhu. Hiren kinangma tuman lole fesuhup halug poholman oho loloho welaruhu. Ari we tem toho hiyag hisaruk lahi.

¹⁹Nin eke misig hiyag hisamin: Ap piren kinangma werehon Allah fam tu heng tul ulug inindi misig atuk halug ari Nikni poholmonen og hisahu.

²⁰Ap piren hinahan An nunuk fam palu roho welamuhup halug An pulmu unduhuk laruhuk,” ulug Yesusen hiyag isibag.

²¹Yesusen ari ulug hiyag isibagma Petrus inowen Yesus fam te, ”Nowe, nareyen nubam siyag ane turukmu ninggik winag harukmen nombarenam atuk halug nambolmayap turuk laruhuk? Siyag ane nubam turukmu ninggik sabirenam atuk halug hebeloho waruhuk ano?” ulug Petrusen Yesus kapal hibag.

²²Kapal hibagma Yesusen te, ”Sabirenam atuk halug hebeloho wabuk fug. Teng sabirenam atukmu oho hebeloho wabuk fug angge hondo rebeseruk laruhun.

²³Allah ap obog toho Inikni aruhuwon ino ap suwon misig hag toho wereg. Ap suwon inowen otsi fam, ’Anden angge paleg lahebon winag hulen maniyek,’ ulug wol eneptisi.

²⁴Wol eneptisimu otsi arimano waharusama paleg angge winag harukmu ap misig fam uang inggila teng-teng angge numen og itfahon palehon welatisi.

²⁵Paleg angge fahet og um fug teg latisimu ap suwon inowen uhe men umalikisi men aren angge obog toho hilaminon aru famen anden angge obog toho ayeg war amag perisi.

²⁶Ari perisimu ap suwon ino alukema hur atisireg, ’Nikni, nilmu wereg atuk halug hanggengge fahet fobik og huruhuken hindi yuwag toho welamin,’ irisi.

²⁷Ari irisiyon fahet ap suwon inowen indi harisireg inggik lole ferisireg, ’Paleg angge fahet fobik og nuruhun fug, lamihin,’ irisi.

²⁸Lamihin irisimu ap ino wilip atisireg larukmen are eke uang inggila misig paleg latisiyon ino men kema salkal urusa. Salkal urusareg are ino sen harisireg anggolop pete haruk lit, ’Nanggengge paleg lahenon ari og nimin,’ irisi.

²⁹Og nimin irisimu are ino alukema hur atuk lit, ’Nare, nilmu wereg atuk halug hanggengge fahet fobik og huruhuken hindi yuwag toho welamin,’ irisi.

³⁰Ari irisimu are ino ele holuk fug anggeyen hele waroho penjara fam kila feserisireg, ’Palehon fahet og nuruhun halug eneg wilip aruhun,’ irisi.

³¹Ari turukmu ori winonen yet harusareg enere fahet inindi siyag atusama inikni ap suwon ino ambeg huruwe larusa.

³²Huruwe larusama ap suwon inowen, ’Ap ari nambeg watnisiyen hondohik lalihip,’ ulug otsi mon eneptisi. Ap ino hondoholug waharusama ap suwon inowen, ’Nare, hat siyag hahun, haren an nubam hele ilaheg toho ehenma haren paleg lahenon fahet anden apmayap tihi.

³³Anden hat nindi hiyihi hag toho haren oho hare fahet hindi reg lalen,’ irisi.

³⁴Ari irisireg olok harisireg inggik hele waroho unggum kong turuk inap wereg ambeg wabusa ulug og isarisireg, ’Nanggengge palehon fahet obog toho og nuruhumu eneg wilip fesuhup,’ irisi.

³⁵Honoriyen hunubam siyag ane turukon fahet hinindi hondo rebeselug ambolmayap tuhup fugmu ap suwon inowen tirisiyon hag toho Nikni poholmonen oho hit hunubam tuhu,” ulug Yesusen hiyag isibag.