Read Angguruk Yali MATIUS 22 Bible Online

MATIUS 22 - Angguruk Yali bible

MATIUS 22

¹Yesusen wene eke indit toho hiyag isaruk lit,

²”Allah ap obog toho Inikni aruhuwon ino ap suwon misig hag toho wereg. Ap suwon ino amlohowen hiyap hilarisimu seni esetmin perisireg

³namlohowen hiyap helehekon fahet seni esetminen ap atam hiyag isarikikon seni aru na wamusan hondog enebik lalihip ulug amingmingangge mon eneptisi. Mon eneptisi angge famen ap arimano ninirim ulug pok atusa.

⁴Pok atusama amingmingangge winon eke mon eneptuk lit, ’Tam wamuhup irikikon enembeg lalihipteg hiyag isaruk lit wam sapi men senggeloho suwe pak men suburu men mangno roho eserihiyon aruma an yahaltukmu wamusa ehek ulug hiyag isa lalihip,’ irisireg mon eneptisi.

⁵Mon eneptisimu ap wol eneptisiyon arimanowen lul fug perusareg winon iniyabuk fahet wilip atusama winon ininggarehen tohon fahet pok atusa.

⁶It winonen amingmingangge itano sen eneptusareg enele ying eneptuk lit waroho lahap eneptusareg pinggi unusurusa.

⁷Unusurusama inikni ino indimu olok harisireg otsi sehen seneg inap unubam namingmingangge unuseheson fahet ap unusuruk lit inibam harep pisatihip ulug mon eneptisi.

⁸Mon eneptisireg amingmingangge fam, ’Namlohowen hiyap helehekma seni eserihireg yahale fihi angge famen ap wol enebihiyon arimano siyag ane tehesama seni aru na fug teg.

⁹Ari fahet ke handuhal teg ambeg lalihipteg weregma ap larukmu isalihibon hondog eneptug watlihipmu seni eserihiyon nalusa,’ irisi.

¹⁰Ari irisimu larusareg ap obog toho ke handuhal teg ambeg larukmu yer isaruson arimano siyag ane turuk inap men fano ane turuk inap men palu eneptusareg hondog eneplug waharusama seni esetisi ibam ino ap pohonen keleg irisi.

¹¹Ap suwon inowen pohon arimano yer isamin ulug kirisireg yer isarukmen ap misig sum fanowon wan teg eleg angge welatisi.

¹²Welatisimu ap suwon inowen, ’Nare, sum fanowon wan tehen fug angge famen nangginoho tuma kik wahen?’ irisimu ap ino ele eleg angge welatisi.

¹³Ele eleg angge welatisimu ap suwon inowen amingmingangge fam, ’Ap aru inggik men uyug men hele fam pug tebelihipteg mondabi hik teg ambeg hik isa lalihipmu uba yatuk lit ayeg kilit matuk lit welaruhu,’ irisi.

¹⁴Ap anggolo wol eneptisi angge famen tor angge eneg mumal eneptisi,” ulug Yesusen hiyag isibag.

¹⁵Welatfagma Farisi inap palu ribareg Yesusen imisi ane ari fam alem ubam umbuhukteg wabuhuken yoho kapal haruk lit aluwat hul ulug enele sahaltuk latfag.

¹⁶Enele sahaltuk latfareg Farisi inap onotsi men Herodes otsi men mon enepfagma Yesus ambeg libareg kapal haruk lit, ”Nonowe, Hat hindi wirik toho welahenon ari nit nonoluk. Allahn komo eneptukon hag toho eneg ap hiyag isaruk lit ap unubam hakol eleg toho siyag ane ehek, fano ane ehek ulug iren pelusa puk fug anggeyen uruk lahen.

¹⁷Haren peruk lahenon hiyag nisimin: Ap suwon Kaisar inowen uang heng neneptikim og um teg ano, og um fug teg ano?” ulug kapal hibag.

¹⁸Ari ulug kapal haruk lit it unundaman peruk latfag ane Yesus tam oluk atfareg ele uruk lit, ”Hit henele si uruk hinap, nungge fahet An wal niyaruk lahep?

¹⁹Uang Kaisar fahet emberukon misig An nubam unug hemek,” ibagma iren uang anggen misig unug hibag.

²⁰Unug hibagma Yesusen kapal isaruk lit, ”Orohole ilit tehon men unuk haharehon men ap sa unuk hahareg lit wereg?” ibagma

²¹iren te, ”Kaisaren tohon hahareg,” ibag. Ari ibagma Yesusen, ”Kaisar og um hahon Kaisar og umuhup. Allah og um hahon Allah og umuhup,” ibag.

²²Ibag ane aru hol hibareg enekolen Yesus embeselug libag.

²³Welatfagma o ino sambil Saduki inaben ap war atukon Allahn onolukap enebuhu fug peruk inap Yesus ambeg watfag.

²⁴Watfareg kapal haruk lit, ”Nonowe, Musan nit fahet haharoho imbibahon te, ’Ap misig umalik indag ta fug angge uhe tuhum weregma lin isalug war atukmu areyen nowe ubalmangge malik enderuhuk ulug hiyap ino hilahu,’ ulug haharoho imbibag ane fahet niren kapal huyul,” ibag.

²⁵”Inikni misihen ondohowon ap sabiren nit sehelimu welatusa. Onowe wandabon ino hiyap hilarisireg weregman war atisi. Ubalmangge eke endebuk fug anggeyen war atisimu uhe ino ot fahet lin teberisi.

²⁶Otsi pirenehon hinahanehon oho ari roho hiyap inowen og enebil larukmen sabiren obog toho war atusa.

²⁷It obog toho itano war atil larikim hiyap ino oho war atisi.

²⁸Hiyap ino it sabiren itanowen oho latusa angge re Allahn ap warehon onolukap enebuhu sambil hiyap ino san hilahu?” ulug kapal hibag.

²⁹Ari ulug kapal hibagma Yesusen te, ”Hit un ke laruk hinap haharoho imbibahon henepeleg toho welahebon ariyen Allah ine werehon ino eke henepeleg.

³⁰Allahn ap warehon onolukap enebuhu sambil ino aben hiyap heleheg hiyaben ap heleheg turuk ane eleg laruhumu Allah otsi malaikat wereg hag toho welamuhup.

³¹Ap warehon Allahn onolukap enebuhu ane fahet Allahn ibag ane iminon tu haharoho imbibahon irikip fug?

³²Allahn ele uruk lit, ’Abraham Ikni An welahi, Ishak Ikni An welahi, Yakub Ikni An welahi,’ ibag. Ibag ane aru Allah ap warehon Inikni wereg eleg, ap onoluk werehon Inikni wereg,” ulug Yesusen hiyag isibag.

³³Ari ulug hiyag isibagma ap anggolo arimano hiyag isibag ane fahet enekol hibag.

³⁴Yesusen Saduki inap ininggaliyap enepfagma enele uk fug angge weregma Farisi inaben yer isibareg it luhal arik watfag.

³⁵Luhal arik watfareg it sehelimuwen Musa wene oluk ahun misihen At wal hul ulug kapal haruk lit,

³⁶”Nowe, wene atam Musan haharoho imbibahon te keyon palimu reg,” ibagma

³⁷Yesusen te, ”Hikni Allah hindimuwen hindi reg lit hahime men hebe obog tohowen hindi reg laruhun

³⁸ulug komo enepfag ane aru eneg palimu wereg peruk lahi.

³⁹Pirenehon ari hag toho werehon te tu imin: Hinggareg hindi reg lit welahen hag toho ap winon hindi enesug laruhun.

⁴⁰Alem piren ariya eneg palimu werehen Musa wene oho atam Allah wene hiyag isaruk latfahon oho ihiyon tu apma wereg,” ulug hiyag isibag.

⁴¹Farisi inap palu roho weregma Yesusen it kapal isaruk lit,

⁴²”Hiren Mesias fahet nungge peruk lahep? At ino ap sa amloho wereg peruk lahep?” ibagma iren te, ”Daud amloho wereg,” ulug hiyag itfag.

⁴³Hiyag itfagma Yesusen hebeloho kapal isaruk lit, ”Ari reg halug Daud ino Allah hime fanowon inowen let turukmu aren ele hiyag isaruk lit nangginoho Mesias fam Nikni uk hag teg latfag.

⁴⁴Dauren ibag ane iminon tu, ’Nikni Allahn an Nikni fam ele uruk lit Hat men seli roho werehon arimano huyug apma umbuhuken ninggik pikit fil tuma hur arik ma,’ ulug Dauren ari ibag.

⁴⁵Daud inowen ele uruk lit, ’Nikni,’ ibag angge famen Ikni ino nangginoho nin amloho am teg?” ulug Yesusen kapal isibag.

⁴⁶Kapal isibag ane fahet ap misihen oho hebeloho Yesus hiyag um fug teg latfag. O ino sambil oho o wina sambil oho ap misihen oho ambong se roho kapal ha fug teg latfag.