Read Angguruk Yali MATIUS 23 Bible Online

MATIUS 23 - Angguruk Yali bible

MATIUS 23

¹Yesusen ap anggolo arimano men otsi men hiyag isaruk lit,

²”Musa wene onoluk inap men Farisi inap men arimanowen Musa ubalmangge nit welahe peruk.

³Ari fahet iren enele hiyag hisarukon holtuk lit fuki roho turuk lamuhup angge famen ininggik fam iren turukon ari hag toho hiren turuk lamuhup fug. Enele fam uruk angge famen ininggik fam turuk eleg.

⁴Sum angginon het toho ap ununggulmu emberuk anggeyen ininggareg ininggiken tor angge oho sen haruk eleg.

⁵Iren turukon ari fano ane turuk lahema aben yet nisalug wel nenebukag peruk lit turuk. Niren sembahyang urukmu aben yet nisawag ulug sohomangge anggeyon men sum yaron men wan toho sembahyang uruk.[5]

⁶Iren seni esetuk ambehen oho lehoma hur amul peruk lit sembahyang uruk ibamen oho olohotma hur amul peruk.

⁷Ayeg waroho waruk ambeg wereg inaben hi neneptuk lit niniknisi nonowesi ulug wel nenebukag ulug lehoma in atuk.

⁸Nori, hit-hit hi-hi atuk lit, ’Nonowe, nonowe,’ uruk lamuhup fug. Honowe we misig eneg weregma hit are men are men hag toho welahep.

⁹Hiren ap kinangmon hi ruruk lit, ’Ninikni,’ uruk lamuhup fug. We Hinikni misig poholmon ino eneg wereg, At ubam Ninikni uruk lamuhup.

¹⁰Hiren hininggareg fahet milal neneptukon tu wereg uruk lamuhup fug. We hit milal heneptukon Mesias ino wereg.

¹¹Hit sehelimu an suwon welahi perukon ino henemingmingangge amag.

¹²Ap san inggareg palimuwap tarukon ino apma aruhumu ap san inggareg apmayap tarukon ino palimu aruhu.

¹³Hit Musa wene honoluk hinap men Farisi hinap men hinindi anggin amag. Hit henele si uruk lit Allah ibam kul perukon onolohotma sok latuk lahep. Hit hininggareg kuk fug teg lahebonen ap winon kul perukon sok hembit keleg tebeseruk lahep.

¹⁴Hit Musa wene honoluk hinap men Farisi hinap men hinindi anggin amag. Hit henele si uruk hinap suburu enebit naruk hag toho hiyap yuwohon enenggengge inibam werehon feleng toho hilaruk lit aben fano helehesa ukag ulug sembahyang yaron il laruk lahebon alem angginon hunubam aruhumu mondabi siyag amuhup.

¹⁵Hit Musa wene honoluk hinap men Farisi hinap men hinindi anggin amag. Hit henele si uruk hinaben te ap misig nonot aruhureg wene niren tohon kuhu ulug ik yenggelehon paltil tom luhatil laruk lit ap eke hiyaharuk lahep halug siyahon umalikap turukmu hiren siyag ane turuk lahebon se regma aren turukon mondabi anggin teg.

¹⁶Hininggareg hinil hupnig angge famen ap hondog eneptuk lahe peruk lahebon ari hinindi anggin amag. Allah ibam fam tik-tem toho ihi ulug aben uruk halug sali ari pisan tuk teg uruk lahep. Allah ibam ili ruruk angge fam tik tem toho ihi ulug aben uruk halug sali ari pisan tuk fug teg uruk lahep.

¹⁷Hit hinindi sohu rohon men hinil hupnihon men, Allah ibam palimu wereg ano, ili ruruk angge ino palimu wereg ano? Umbagpag turuk angge ino Allah ibamen fanowap turuk.

¹⁸Hubu lahaptuk ambeg ino fam tik-tem toho ihi ulug aben uruk halug sali ari pisan tuk teg uruk lahep. Esetuk angge fam tik-tem toho ihi ulug aben uruk halug sali ari pisan tuk fug teg uruk lahep.

¹⁹Hit hinil hupnig hinap, nungge palimu wereg: Hubu lahaptuk ambeg ano, esetuk angge ano? Hubu lahaptuk ambeg inowen esetuk angge fanowap turuken hubu lahaptuk ambeg palimu wereg.

²⁰Hubu lahaptuk ambeg fam tik-tem toho uruk ahun ino hubu lahaptuk ambeg men esetuk angge men fam sali emberuk.

²¹Allah ibam fam tik-tem toho uruk ahun ino Allah ibam men o ino fam wereg ahun men fam sali emberuk.

²²Pohol fam tik-tem toho ihi uruk ahun ino Allah hur atuk ambeg men hur atuk ahun men fam sali emberuk.

²³Hit Musa wene honoluk hinap men Farisi hinap men hinindi anggin amag. Hit henele si uruk hinaben pingga men kami men amben fano angge ayeg waroho hilalug onggo og hisarukon palu numen tebelug numon ino Allah fahet emberuk lahep. Musa wene fam apma werehon hiren palimuwap turuk lahep, palimu werehon apmayap turuk lahep. Pikir ane turukon men ap hinindi enesuhon men hinindi wirik toho werehon men apmayap feseruk lahep. Eke ane turuk lit eke ane embeseruk lamuhup fug.

²⁴Hininggareg hinil hupnig angge famen ap hondog eneptuk lahe peruk lahep. Elemiyaha ik fam werehon filig toho hik isalug wam sapi hum angge famen abirangge henenggolobag ele ke kilaptuk lahep.

²⁵Hit Musa wene honoluk hinap men Farisi hinap men hit henele si uruk lahebon hinindi anggin amag. Kubag ik naruk angge men suburu narukon iya ruruk angge men sel fil werehon puhun toho umatuk lit undama fil henebuwaben yoholiyangge hilaruk lahebon arimano keleg toho weregma naruk lahep.

²⁶Hit Farisi hinap hinil hupnig lit welahebon, kubag ik naruk angge undama fil tam kul oho fuhupmu sel fil oho fano aruhu.

²⁷Hit Musa wene honoluk hinap men Farisi hinap men hit henele si uruk hinap hinindi anggin amag. Ap yal eneptukon amigmu elehet fano roho oko kilabeg lit hohol sel fil fano roho uruk angge famen undama fil ap uwag imbaluwal eneg het teg lit wereg. Ari hag toho hit nim wirim teg.

²⁸Henehap sel fil aben yet hisalug ap fanowon tuma wereg peruk angge famen hunundaman henele si uruk lit sibiling-sibiling ane uruk hinap welahep.

²⁹Hit Musa wene honoluk hinap men Farisi hinap men hit henele si uruk hinap hinindi anggin amag. Allah wene tam hiyag isaruk latfag inap sal enepfag ambeg hiren siye teberuk lit fano ane turuk latfag inap sal enepfag ambeg ungga fanowon sale feruk lahep.

³⁰Sale felug henele uruk lit, ’Nit ninikni umba welatfag li welala hahen ap atam wene hiyag isaruk latfag inap niren unusila fug,’ uruk lahep.

³¹Ari uruk lahebon ariyen atam hiyag isaruk inap unusibahon arimano unubalmangge nit welahe ulug fag toho uruk lahep.

³²Hit hinikni umban atam enesum sukun taruk latfahon hag toho hiren oho sukun taruk lamuhup.

³³Hit pisanggo umalikisi, imbalo puwami umalikisi, indok humon hunubam aruhumu nangginoho windat taruk lamuhup?

³⁴Yet teg lamok, hit henembeg Anden wene hiyag hisaruk inap men inindi anggat teg lit wene alem onoluk inap men mon eneptuk laruhuk. Mon eneptuk laruhukmu hiren winon pinggi unusuruk lit e fam tel eneptuk lamuhup. Winon wene uruk ibamen e paleg fam unusuruk lit winon o eke la eke la turukmu unusul ulug mug eneplug laruk lamuhup.

³⁵Hun Habel ino siyag ane tibag fug angge famen ap unusil laruk ane at famen ak tibareg unusil laruk lit ketiya Berekhya amloho Zakharia ino Allah ibam honggoleg wam esetuk ambeg honggoleg pulmu itanowen hiren ware feserikipmu enemep ari fahet ayeg waroho hit hunusuhup.

³⁶Ap ketiya werehon aruma unubam ihi ane ari tem toho aruhu ulug hiyag hisaruk lahi.”

³⁷Yesusen ele uruk lit, ”Yerusalem hinap nindiyen ulug hunubam uruk lahi. Wene hiyag hisaruk inap Allahn henembeg mon enebik waharisi angge famen helep fam unusil laruk lahep. Suwe ayam umaliki aherabul apma wol toho kilap eneptuk hag toho Anden hat humalikisi wol toho kilap enepmin perikik angge famen ninirim irikip.

³⁸Ninirim irikipmu hinibam aru ap eleg laruhumu ofoluk aruhu.[6]

³⁹Ketiya famen hiren An niyahup fuhon fahet tem toho hiyag hisaruk lahi. ’Ninikni Allahn mon haptisiyon waharuk lahenon tu wel haptuk lahe,’ ulug hiren uhup sambil eneg niyahup,” ulug Yesusen Yerusalem inap hiyag isibag.