Read Angguruk Yali MATIUS 24 Bible Online

MATIUS 24 - Angguruk Yali bible

MATIUS 24

¹Wene ari obog toho hiyag isibareg Allah ibamen wilip atug laruk latfag. Larukmen otsiyen o Allah ibam wirihon aruma kim hamihin ulug hiyag itfag.

²Hiyag itfagma Yesusen otsi hiyag isaruk lit, ”Hiren obog toho yet haruk lahebon aruma helep misig oho eke palimu welaruhu fug, obog halog toho wambuhumu mondabi siyag aruhu. Ari tem toho hiyag hisaruk lahi,” ibag.

³Yesus zaitun punumu lahibareg heriyegma otsiyen nenemu nenele ul ulug ambeg watfag. Watfareg, ”Fahe hiyag nesehen ane ari nosambil teko lahu ane fahet ehen? Hat waruhun sambil men pohol kinang eleg aruhu sambil men enehangge nungge fam nit tam nonoluk aruhu?” ibag.

⁴Ari ibagma Yesusen hiyag isaruk lit, ”Ke hare roho larukon fahet aben hinindi ninap henebuhup tohon yet teg lamok.

⁵Ap anggolo arimanowen enele si uruk lit An nunuk il waharuk lit, ’An Mesias waharuk lahi,’ ulug ap anggolo inindi ninap enebuhup.

⁶Ap tog aptuk lit pin unusuruk urukon holuhupteg hinindimu henekol toho wereg lamuhup fug. Obog toho tuhup ane ari Allahn tam pibahon teko lahu. Teko lahuwon fahet pohol kinang ketiya eleg atmisi puk fug.

⁷O pumbuk ekeyen te o pumbuk eke min tog aptuk lamuhup. Ap ekeyen te ap eke min seli roho welamuhup. Umu fil men ahamu fil men o mek waharuk lit suburu obok eke inam aruhu.

⁸Hiyaben malik indag tik oho lit ak turuk lit ahum fato ruruk hag toho ap arimano siyag amuhup.

⁹An nunuk fahet alem hunubam emberuk lit aben sen henebuhupteg pinggi hunusuruk lit ap obog tohowen hit fahet ninirim peruk lamuhup.

¹⁰Ap anggolo owe or oho wereg angge famen inindi nin atikim ininggareg onori fahet ninirim peruk lit unusukag ulug huruwe laruk lamuhup.

¹¹Ap anggolo waharuk lit enele si ane nit Allah wene hiyag hisaruk ninap ulug ap anggolo ke hareyon hiyag isaruk lit inindi ninap eneptuk.

¹²Onolok ane turukon su atuk lit ap inindi enesug ane mondabi sun aruhu.

¹³Ap san fobik aruhu ane fahet indi wirik toho welaruhu halug at ino Allahn fanowap tuhu.

¹⁴Allah ap obog toho Inikni aruhuwon fahet wene o pumbuk munon-manon obog toho hiyag isahupmu ap obog toho holuhupmu eneg pohol kinang eleg aruhu.”

¹⁵”Suwesingga aru uruk ahunen indimu oluk teg lit welaruhu. Nabi Daniel atam haharoho imbibahon hikit toho Allah ibam fanowon ino fam siyag angge mun angge man angge siyahap turukon unduhukmu yet hahupteg

¹⁶ap o Yudea welamuhubon arimano longgo ul ulug folo-folo punumu lahakup.

¹⁷Silimu o palimu heriyeg lit welaruhuwon at anggengge olma werehon hilamin ulug kuhu fug.

¹⁸Yabukmu welaruhuwon ino nasum hilamin ulug olma lahu fug.

¹⁹Siyag aruhu sambil ino hiyap malik forohowon men ag mon tarukon men inindi anggin toho welamuhup.

²⁰Hit longgo ul ulug lahup sambil ino sun wereg li men wene uruk sambil men lahup tohon sembahyang uruk lamuhup.

²¹Pohol kinang wal tibag sambilen tibag fug ane nit ketiya welaheyon fobik welamuhubon ari hag toho tuhu fug angge famen we misihim sambil ino eneg alem angginon ap unubam aruhu.

²²Alem angginon unubam weregma amusun toho welalep angge famen Allahn il horohap tuhu. Horohap tuhu fug halug ap misig oho fano welaruhu fug. An numalikisi mumal tarikikon fano welamag ulug Allahn alem angginon ino il horohap tuhu.

²³Ari tuhu sambil ino ap ekeyen hiyag hisaruk lit, ’Yet hemek, Mesias ino tuma wereg, lumu wereg,’ uruk halug tem toho uruk puk fug.

²⁴Ap enele si uruk inap waharuk lit, ’An Mesias ino waharuk lahi, an wene hiyag hisaruk nahun nabi waharuk lahi,’ il wamuhupteg poholmonen turuk ane til ap hihir enebil wamuhup. Ari til waharuk lit Allahn mumal eneptisiyon oho ke hareyon hiyag isaruk lit inindi ninap enebuhuk puhup.

²⁵Iren tuhup ane Anden tam hiyag hisihi angge re hinindi anggat toho welamuhup.

²⁶It wamuhubon arimanowen, ’At ino farema werehen yet ha aliyek!’ uruk halug hit la fug. ’O aru werehen kim halihiben kiyek!’ uruk halug tem toho ehesa puk fug.

²⁷Lebeglu yali filen lek haruk lit asinandi hubula fil seleg turuk hag toho At ap kinangmon atfahon ino waruhu.

²⁸Sobon men pamo men enele ngu ruruk halug ari amben angge ita wereg,” ulug Yesusen hiyag isibag.

²⁹”Alem angginon ino ap unubam aruhumu mo kun atuk lit pikalem hik aruhureg suhal poholman loloho wambuhupmu pohol ine werehon oho yuk tuhu.

³⁰Yuk tuhu sambil ino At ap kinangmon atfahon warik oho lit enehangge poholma tam inam aruhumu ap kinangmon obog toho enekolen ya nga uruk lamuhup. Ya nga uruk lit poholma lahap harukmen At ap atik ibahon ino ebe ine roho il umbagpag toho o hina apmane waharukmu yet hahup.

³¹Waruk ele hum toho tung-tang tirikim itano At inowen otsi malaikat mon enebuhumu Allahn mumal eneptisiyon arimano ik eleruk fil ambut fil werehon men yali fil hubula fil werehon men pohol atogma kinang atogma werehon arimano obog toho palu arik wamuhup.

³²Sak fam wirim haruk lit iminon ari hinindi anggar amag. Sak alit anggolo yinggiltukmu sak li warik ohoreg ulug honoluk atuk.

³³Hiyag hisihi ane ari hikit toho turukmu yet hahupteg ketiya sok horogma warik ohoreg ulug hit honoluk aruhu.

³⁴Ap ketiya werehon aruma uwan eleg am fugmu Anden hiyag hisihi ane aru teko lahu. Ari tem toho hiyag hisaruk lahi.

³⁵Pohol men kinang men eleg aruhu angge famen Anden nele uruk lahi ane ari eleg aruhu fug.

³⁶Ihi ane teko lahuwon ke sambil tuhu ulug ap misihen oho oluk teg eleg. Malaikat poholma werehon men Allah amloho men enepeleg teg lit weregma we Ikni eneg amu oluk teg.”

³⁷”Ap kinangmon atfahon ino waruhu sambil ari indam hun Nuh umalikisi unubam atfahon ino hikit toho aruhu.

³⁸Ik humon ari yenggeluk fugmu ap arimano suburu nenggeg ik nenggeg aben hiyap heleheg hiyaben ap heleheg turuk lit weregma hun Nuh ino kou fam kibag.

³⁹Hun Nuh kou fam kibahon ino fahet inindiyen wenggel ha fug angge weregman ik humon yenggeltil laharuk lit it arimano waroho lin ibag. Ap kinangmon atfahon ino waruhu sambil ari hag toho welamuhup.

⁴⁰Ari tuhu sambil ino ap piren yabukmu weregman misig hilaruk lit misig umbusuhu.

⁴¹Hiyap piren misigmu roti anggen lilibug turuk lamuhup angge famen misig hilaruk lit misig umbusuhu.

⁴²Ninikni waruhu sambil ke sambil waruhu ulug henepeleg angge re hinindi honoluk toho kahaleg lamuhup.

⁴³O ngi ahun misig ibam wereg lit yoholiyangge waruk ahun hubanggo warik ohoreg ulug oluk toho welaruhu halug nibam halog tuk nowen kema lamin fug ulug kahaleg lit welaruhu.

⁴⁴At ap kinangmon atfahon ino waruhu sambil hit henepeleg tegma waruhu rohon hit hinindi anggat toho welamuhup.”

⁴⁵”Ap suwon amingmingangge asukun fano reg lit indi anggat toho wenggel harukon ino fam ikniyen te, ’Notsi winon fer enesug lit suburu og isaruk laruhun,’ ulug ikniyen unduhuk ferukon ino sa fam wirim timin?

⁴⁶Ikni waruhu sambil ino amingmingangge ikniyen hiyag itisi ane fano turukmu waruhureg, ’Namloho, hahiyeg toho welamin,’ uhu.

⁴⁷Ikni waruhureg amingmingangge ino fam anden angge obog toho hat foroho laruhun ulug hiyag uruhu. Ari tem toho hiyag hisaruk lahi.

⁴⁸Amingmingangge ino fano ane tuk fug angge

⁴⁹nikni folo waruhu fug peruk lit umalikisi winon unusuruk lit ik olokon nalug turuk inap men ambiyeg suburu nenggeg ik nenggeg turuk lit weregma

⁵⁰ikni waruhuwon ino watmisi fug puhureg apeleg toho weregma waruhu.

⁵¹At waruhureg hat siyag uruk lit ebe waroho ap inindi wenggel haruk eleg inap ambeg hik isahumu uba yatuk lit ayeg kilit matuk lit welaruhu,” ulug Yesusen hiyag isibag.